कागिसो रबाडाची हॅट्रिक; पण विजयानंतरही दक्षिण आफ्रिका विश्वचषकातून बाहेर, पुन्हा ठरले चोकर्स…


शारजा : दक्षिण आफ्रिकेने इंग्लंडवर १० धावांनी थरारक विजय साकारला खरा, पण या विजयानंतरही दक्षिण आफ्रिकेला उपांत्य फेरीत पोहोचता आले नाही. कारण या सामन्यात दक्षिण आफ्रिकेने जर इंग्लंडला १३१ धावांमध्ये रोखले असते तर ते उपांत्य फेरीत पोहोचले असते. पण दक्षिण आफ्रिकेच्या संघाला ते जमले नाही आणि विजयानंतरही त्यांचे आव्हान संपुष्टात आले.

दक्षिण आफ्रिकेची सुरुवात चांगली झाली नाही. कारण त्यांना १५ धावांवर पहिला धक्का बसला. पण त्यानंतर क्विंटन डीकॉक आणि रॅसी व्हॅन डर दुसेन यांनी दुसऱ्या विकेटसाठी ७१ धावांची भागीदारी रचली आणि संघाची गाडी रुळावर आणली. डीकॉकला आदिल रशिदने बाद करत ही जोडी फोडली, त्याने चार चौकारांच्या जोरावर २७ चेंडूंत ३४ धावा केल्या. डीकॉक बाद झाला, पण त्यानंतर दुसेन आणि अॅडम मार्करम यांची जोडी चांगलीच जमली. या जोडीने इंग्लंडच्या गोलंदाजीचा खरपूस समाचार घेतल्याचे पाहायला मिळाले. या दोघांनी तिसऱ्या विकेटसाठी १०३ धावांची अभेद्य भागीदारी रचली. दुसेनने यावेळी धडाकेबाज फटकेबाजी करत ६० चेंडूंत पाच चौकार आणि सहा षटकारांच्या जोरावर नाबाद ९४ धावांची दणदणीत खेळी साकारली, दुसेनला यावेळी मार्करमची सुयोग्य साथ मिळाली. मार्करमने यावेळी २५ चेंडूंत २ चौकार आणि चार षटकारांच्या जोराव नाबाद ५२ धावांची खेळी साकारली. दुसेन आणि मार्करम यांच्या धमाकेदार फटकेबाजीच्या जोरावर दक्षिण आफ्रिकेला इंग्लंडपुढे १९० धावांचे आव्हान ठेवता आले. धावांचा डोंगर उभारत दक्षिण आफ्रिकेने यावेळी विजयाचा पाया रचला होता.

दक्षिण आफ्रिकेच्या आव्हानाचा पाठलाग करताना इंग्लंडची सुरुवात चांगली झाली नसली तरी इंग्लंडच्या फलंदाजांनी कमी चेंडूंमध्ये जास्त धावा करत विजयापर्यंत पोहोचण्याचा प्रयत्न केला होता. पण इंग्लंडला यावेळी दक्षिण आफ्रिकेवर विजय मात्र साकारता आला नाही. दक्षिण आफ्रिकेचा वेगवान गोलंदाज कागिसो रबाडाने यावेळी २०व्या षटकाच्या पहिल्या तीन चेंडूवर हॅट्रिक नोंदवली. रबाडाने पहिल्या चेंडूवर ख्रिस वोक्सला बाद केले, त्यानंतर त्याने कर्णधार इऑन मॉर्गनची विकेट काढली आणि तिसऱ्या चेंडूवर त्याने ख्रिस जॉर्डनला तंबूत धाडत आपली हॅट्रीक पूर्ण केली.



Source link

Leave a Reply

Your email address will not be published. Required fields are marked *

%d bloggers like this: