IAF Helicopter Crash हेलिकॉप्टर दुर्घटना: ‘हा’ एकमेव अधिकारी बचावला; शौर्यगाथा आहे थक्क करणारी


हायलाइट्स:

  • तामिळनाडू हेलिकॉप्टर दुर्घटनेत १३ जणांचा मृत्यू.
  • शौर्यचक्र विजेते वरुण सिंह गंभीररित्या जखमी.
  • वेलिंग्टन येथील रुग्णालयात मृत्यूशी झुंज सुरू.

कुन्नूर: तामिळनाडूत भारतीय हवाई दलाचे हेलिकॉप्टर कोसळून झालेल्या दुर्घटनेत हेलिकॉप्टरमधील संरक्षण दल प्रमुख बिपीन रावत, त्यांची पत्नी मधुलिका यांच्यासह १३ जणांचा मृत्यू झाला. या दुर्घटनेत केवळ ग्रुप कॅप्टन वरुण सिंह हे बचावले असून वेलिंग्टन येथील लष्कराच्या रुग्णालयात त्यांची मृत्यूशी झुंज सुरू आहे. सिंह यांची प्रकृती चिंताजनक असल्याचे सांगण्यात आले. दरम्यान, वरुण सिंह यांची शौर्यगाथा थक्क करणारी असून याचवर्षी राष्ट्रपतींच्या हस्ते शौर्यचक्र पुरस्कार देऊन त्यांना सन्मानित करण्यात आलेले आहे. ( IAF Helicopter Crash Varun Singh Health Update )

वाचा:संरक्षण दल प्रमुख बिपीन रावत यांचे हेलिकॉप्टर दुर्घटनेत निधन

वरुण सिंह हे भारतीय हवाई दलात ग्रुप कॅप्टन म्हणून सेवेत असून हेलिकॉप्टर दुर्घटनेत ते गंभीररित्या जखमी आहेत. वेलिंग्टन येथील लष्कराच्या रुग्णालयात त्यांच्यावर उपचार सुरू आहेत. वरुण सिंह हे भारतीय हवाईदलातील कर्तबगार अधिकारी म्हणून ओळखले जातात. तेजस हे लढाऊ विमान दुर्घटनाग्रस्त होण्यापासून त्यांनी वाचवलं होतं. १२ ऑक्टोबर २०२० रोजी ही घटना घडली होती. तेजस विमानाने उड्डाण घेतले आणि १० हजार फूट उंचीवर विमान पोहचताच फ्लाइट कंट्रोल सीस्टीम आणि लाइफ सपोर्ट सीस्टीममध्ये तांत्रिक बिघाड झाला. ही बाब लक्षात येताच प्रसंगावधान दाखवत वरुण सिंह यांनी दुर्घटना टाळण्यासाठी शर्थीचे प्रयत्न केले. सर्वप्रथम त्यांनी १० हजार फुटांवरून कमी उंचावर विमान आणले. मात्र त्यानंतरही फ्लाइट कंट्रोल सीस्टीम काम करत नव्हती. तरीही आपले पूर्ण कसब पणाला लावत वरुण सिंह यांनी विमानाचे सेफ लँडिंग करण्यात यश मिळवले होते. मुख्य म्हणजे आजपर्यंत तेजस या लढाऊ विमानाचा एकदाही अपघात झालेला नाही. वरुण यांना या कामगिरीसाठी शौर्यचक्र जाहीर करण्यात आले होते. यावर्षी स्वातंत्र्यदिनी राष्ट्रपती रामनाथ कोविंद यांच्याहस्ते त्यांना हा सन्मान प्रदान करण्यात आला.

वाचा:धक्कादायक: हेलिकॉप्टरमधील १४ पैकी १३ जणांचा मृत्यू

राजनाथ यांनी केली प्रार्थना

संरक्षण मंत्री राजनाथ सिंह यांनी हेलिकॉप्टर दुर्घटनेबाबत तीव्र शोक व्यक्त करताना बिपीन रावत, त्यांची पत्नी तसेच अन्य अधिकाऱ्यांना श्रद्धांजली वाहिली आहे. या संकटाच्या क्षणी आम्ही तुमच्यासोबत आहोत, असा धीर राजनाथ यांनी मृतांच्या कुटुंबीयांना दिला आहे. राजनाथ यांनी वरुण सिंह यांच्याबाबतही चिंता व्यक्त केली असून वरुण सिंह यांच्या प्रकृतीत वेगाने सुधारणा व्हावी, अशी प्रार्थना केली आहे.

वाचा:रावत यांच्यासोबत हेलिकॉप्टरमध्ये होते हे वरिष्ठ अधिकारी; नावं जाहीर



Source link

Leave a Reply

Your email address will not be published. Required fields are marked *

%d bloggers like this: