मैदानातच राडा; सामना संपताच दोन्ही संघाचे खेळाडू एकमेकांशी भिडले; एकमेकांना जमिनीवर पाडले अन्…

नवी दिल्ली : सामना संपल्यावर दोन्ही संघांच्या खेळाडूंमध्ये जोरदार राडा झाल्याचे पाहायला मिळाले. या वेळी एका खेळाडूने जोरदार पंच मारल्यामुळे दुसरा खेळाडू थेट मैदानातच पडला. हे सर्व प्रकरण हाताबाहेर जात असल्याचे पाहिल्यावर सुरक्षारक्षकांना बोलावण्यात आले. नेमकं घडलं तरी काय, पाहा…आफ्रिका कप ऑफ नेशन्समध्ये अशीच घटना पाहायला मिळाली. फुटबॉल सामन्यानंतर मैदानावरच उडालेल्या या धुमश्चक्रीचा व्हिडिओ सध्या मोठ्या प्रमाणात व्हायरल होत आहे. ही मारामारी एवढी अनियंत्रित झाली होती की, ते थांबवण्यासाठी सुरक्षा कर्मचाऱ्यांना मध्यस्ती करावी लागली. आफ्रिका कप ऑफ नेशन्समध्ये घाना आणि गॅबॉन या संघांमध्ये सामना सुरू होता. दोन्ही संघांनी हा सामना १-१ असा बरोबरीत सोडवला, पण सामना संपताच मैदानात नवाच खेळ सुरू झाला, ज्याची कुणीही कल्पना केली नसेल.

सामना संपताच संघ एकमेकांशी भिडले
१४ जानेवारीच्या संध्याकाळी खेळल्या गेलेल्या या सामन्यानंतर दोन्ही संघाचे खेळाडू एकमेकांना भिडले. सामन्याच्या निकालामुळे आलेली निराशा या भांडणाचे कारण होते. घानाचा संघ जवळपास शेवटपर्यंत सामन्यात १-० गोलने पुढे होता, पण ८८ व्या मिनिटाला गॅबॉनने गोल करत सामना बरोबरीत रोखला. यामुळे घानाच्या बाद फेरीच्या निकालावर परिणाम झाला आहे. त्यामुळेच खेळाडू संतापले होते.

घानाचा स्ट्रायकर बेंजामिन टेटेहने गॅबॉनच्या एका खेळाडूच्या तोंडावर जोरदार ठोसा मारला. त्यामुळे बेंजामिन टेटेहला त्याच्या चुकीची शिक्षा देताना रेफ्रींनी लाल रंगाचे कार्ड दाखवले. यामुळे २४ वर्षीय दोषी खेळाडू टेटेह मंगळवारी कोमोरोसविरुद्ध होणाऱ्या सामन्यात खेळू शकणार नाही. हा सामना अनिर्णित राहिल्याने घानाच्या अडचणी वाढल्या आहेत. फुटबॉलच्या मैदानात खेळाडूंमधील भांडणे ही काही नवीन गोष्ट नाही, पण मारहाण करणे, एखाद्याला दुखापतग्रस्त करणे, हानी पोहोचवणे हे क्वचितच पाहायला मिळते. पण यावेळी तर दोन्ही संघांतील खेळाडू चांगलेच भडकलेले पाहायला मिळाले आणि त्यानंतर मैदानात एवढा मोठा राडा झाला की, ते आरवणे कोणाच्याही हातात नव्हते, अखेर सुरक्षारक्षकांनाच पाचारण करण्यात आले आणि त्यांनी हा सर्व प्रकार थांबवला.