‘यूपीतील ‘हा’ अंडरकरंट भाजपच्या हेकेखोरीला चिरडून टाकेल’


हायलाइट्स:

  • उत्तर प्रदेश विधानसभा निवडणुकीकडे देशाचे लक्ष
  • देशभरातील नेते व्यक्त करताहेत वेगवेगळे अंदाज
  • आमदार रोहित पवार म्हणतात, भाजपविरोधात रोष!

अहमदनगर: ‘जनता बोलून दाखवत नसली तरी एक धगधगता रोष जनतेच्या मनात होता आणि याच रोषाचा अंडरकरंट सध्या उत्तर प्रदेशमध्ये दिसत आहे. उत्तर प्रदेशची जनता भाजपच्या भुलथापांचे, ढोंगीपणाचे फुगे फोडल्याशिवाय राहणार नाही हे स्पष्ट दिसत आहे. उत्तर प्रदेशमधील हेच परिवर्तन देशातील उद्याच्या परिवर्तनाला वाट करून देणारे ठरणार असून भाजपच्या हेकेखोर वृत्तीला ‘चिरडून’ काढेल यात कुठलीही शंका नाही,’ अशा शब्दांत राष्ट्रवादीचे आमदार रोहित पवार (Rohit Pawar) यांनी उत्तर प्रदेशातील घडामोडींवर आणि त्याच्या संभाव्य पडसादांवर भाष्य केले आहे.

वाचा: प्रा. एन डी पाटील यांची प्रकृती चिंताजनक; उपचारास प्रतिसाद नाही!

आमदार पवार यांनी म्हटले आहे, दिल्लीतील सत्तेचा मार्ग उत्तर प्रदेशातून निश्चित होत असल्याने येथील विधानसभेच्या निवडणुकीच्या निमित्ताने संपूर्ण देशभरात राजकीय वातावरण तापलेले आहे. गोवा हे महाराष्ट्राच्या शेजारील राज्य असल्याने गोव्याच्या निवडणुकीचा महाराष्ट्राशी संबंध असणे साहजिकच आहे. उत्तरप्रदेश महाराष्ट्रापासून दूर असले तरी महाराष्ट्रात मागील काळात घडलेल्या घटनांचा उत्तरप्रदेशमध्ये तयार होत असलेल्या जनभावनेशी थेट संबंध दिसून येत आहे. काही महिन्यापूर्वी मजबूत स्थितीत दिसणारी भारतीय जनता पक्षाची गणिते आज मात्र मोठ्या प्रमाणात विस्कटताना दिसत आहेत. भाजप सोडणाऱ्या नेत्यांच्या प्रतिक्रिया बघितल्या तर कुठेतरी इतर मागासवर्गीय तसेच दलित समाजावर होत असलेल्या अन्यायाची भावना प्रकर्षाने जाणवते. ज्या नेत्यांनी भाजपला सोडचिठ्ठी दिली ते सर्वच प्रभावशाली नेते आहेत. केंद्रात-राज्यात एकहाती सत्ता असताना, सीबीआय ईडी यासारख्या यंत्रणा ताब्यात असताना, अनेक सर्व्हे देखील भाजपाचीच सत्ता येईल असं दाखवत असताना देखील सत्ताधारी पक्षाचे वजनदार मंत्री, आमदारांचे पक्ष सोडून जाणं हे उत्तरप्रदेशातील जनतेच्या मनात काय चाललं आहे, हे सांगण्यास पुरेसे आहे.
उत्तरप्रदेशच्या मनात काय चाललं आहे याचा विचार केल्यास त्यात शेतकऱ्यांना कशाप्रकारे वेठीस धरले, कायदा सुव्यवस्था, महिलांवरील अत्याचार, बेरोजगारी-महागाई हे महत्वपूर्ण विषय होते, परंतु या विषयांवर नेहमीप्रमाणे धार्मिक ध्रुवीकरणाच्या आक्रमक प्रचाराने मात करता येऊ शकते हा भाजपचा अंदाज आहे आणि दुर्दैवाने धार्मिक ध्रुवीकरणाच्या भाजपच्या आक्रमक प्रचारासमोर जनतेच्या दैनंदिन आयुष्याशी निगडित मुद्दे प्रभावहीन ठरतात ही वस्तुस्थिती देखील आहे. परंतु तरीदेखील अनेक राजकीय विश्लेषकांनी उत्तरप्रदेशमध्ये सामाजिक अन्यायाच्या भावनेचा एक अंडरकरंट निर्माण होत असल्याचे बोलून दाखवले होते आणि आज हाच अंडरकरंट उत्तरप्रदेशातील राजकीय हवेची दिशा बदलताना दिसतोय. हा अंडरकरंट इतका प्रभावशाली आहे की अयोध्या-मथुरेतून निवडणूक लढवण्याच्या प्रयत्नात असलेल्या मुख्यमंत्री-उपमुख्यमंत्र्यांना देखील स्वतःच्याच सुरक्षित मतदारसंघातून निवडणूक लढवावी लागत आहे. गेल्या तीन चार महिन्यांपासून पुसटपणे जाणवणारा हा अंडरकरंट महाराष्ट्रात घडलेल्या ओबीसी आरक्षणासंबंधित घडामोडींमुळे मोठ्या प्रमाणात तीव्र झालेला आहे.

वाचा: भारतीय संगीताची लय थांबली! कथ्थक सम्राट पंडित बिरजू महाराजांचे निधन

आरक्षणाला भाजपने सामाजिक न्यायाच्या दृष्टिकोनातून कधी बघितलेच नाही, केवळ एक राजकीय मुद्दा म्हणून बघितले आहे आणि आज भाजपची हीच भूमिका देशाच्या लक्षात आलेली आहे. शेतकरी आंदोलन अमानुषपणे चिरडण्याचा प्रयत्न, धार्मिक ध्रुवीकरणाच्या सहाय्याने बेरोजगारी-महागाई या महत्वाच्या मुद्द्यांना साईडलाईन करण्याचा प्रयत्न, आरक्षण संपवण्याचा डाव या साऱ्या गोष्टी जनतेच्या लक्षात कधीच आल्या आहेत, असेही पवार यांनी म्हटले आहे.



Source link

Leave a Reply

Your email address will not be published.

%d bloggers like this: