Rakesh Tikait: राकेश टिकैत यांचा पाठिंबा कोणत्या पक्षाला?; अखेर भूमिका केली स्पष्ट


हायलाइट्स:

  • राकेश टिकैत यांनी अखेर आपली भूमिका केली स्पष्ट.
  • उत्तर प्रदेशात कोणत्याही पक्षाला पाठिंबा देणार नाही.
  • योगींनी जिंकावं, राज्यात मजबूत विरोधी पक्षाची गरज!

लखनऊ:उत्तर प्रदेश विधानसभा निवडणुकीत शेतकरी नेते राकेश टिकैत यांची भूमिका नेमकी काय असणार, याकडे सर्वच पक्षांचे लक्ष लागले आहे. टिकैत हे समाजवादी पक्षाला पाठिंबा देतील, अशाही चर्चा रंगल्या आहेत. या पार्श्वभूमीवर टिकैत यांनी आज आपली भूमिका स्पष्ट केली असून मुख्यमंत्री योगी आदित्यनाथ यांच्याबाबतही मोठे विधान केले आहे. ( Rakesh Tikait Latest Breaking News )

वाचा : यूपीत शिवसेनेची मोठी चाल!; राऊत टिकैतांना भेटले, उद्धव ठाकरेही बोलले

दिल्लीच्या वेशीवर शेतकऱ्यांचं ऐतिहासिक आंदोलन झालं. या आंदोलनात राकेश टिकैत हे अग्रभागी होते. त्यांनी सातत्याने केंद्रातील मोदी सरकारविरुद्ध कणखर भूमिका घेतली. त्यामुळेच उत्तर प्रदेश विधानसभा निवडणुकीत राकेश टिकैत यांची भूमिका महत्त्वाची मानली जात आहे. त्यांचे समर्थन मिळवण्यासाठी समाजवादी पक्षाकडून जोरदार प्रयत्न सुरू आहेत. शिवसेना नेते संजय राऊत यांनीही टिकैत यांची त्यांच्या निवासस्थानी जाऊन भेट घेतली होती. या अनुषंगाने आज टिकैत यांनी माध्यमांकडे आपली भूमिका स्पष्ट केली.

वाचा : भाजपची वेगळी चाल! योगी अयोध्येतून नाही, ‘या’ मतदारसंघातून लढणार

उत्तर प्रदेश विधानसभा निवडणुकीत मी किंवा भारतीय किसान युनियनने कोणत्याही राजकीय पक्षाला समर्थन दिलेले नाही, असे राकेश टिकैत यांनी स्पष्ट शब्दांत सांगितले. सपा-आरएलडी आघाडीला टिकैत यांनी पाठिंबा जाहीर केल्याची चर्चा होती. त्याबाबत विचारले असता त्याचा टिकैत यांनी इन्कार केला. एक उमेदवार आशीर्वाद मागण्यासाठी आला होता. त्याला मी आशीर्वाद दिला. त्यात मला काही गैर वाटत नाही. ही आपली संस्कृती आहे, असे नमूद करताना मी एका उमेदवाराला आशीर्वाद दिला म्हणजे कोणत्यातरी पक्षाला किंवा आघाडीला पाठिंबा दिला असा अर्थ काढू नये, असे टिकैत म्हणाले. राजकीय पक्षांपासून आम्ही नेहमीच अंतर राखलं असून संयुक्त किसान मोर्चा आमच्यासाठी सर्वकाही आहे, असेही टिकैत यांनी निक्षून सांगितले. योगी आदित्यनाथ यांच्याबद्दलही टिकैत बोलले. योगी गोरखपूरमधून लढत आहेत. ते तिथे जिंकावेत यासाठी माझ्या शुभेच्छा आहेत. आम्हाला राज्यात एक मजबूत विरोधी पक्ष हवा आहे, असा टोला टिकैत यांनी लगावला.

दरम्यान, संयुक्त किसान मोर्चाने १ फेब्रुवारीपासून मिशन उत्तर प्रदेश सुरू करण्याची घोषणा केली आहे. या मिशन अंतर्गत शेतकरी नेते ठिकठिकाणी शेतकऱ्यांशी संवाद साधणार आहेत. यादरम्यान एमएसपीसह इतर मुद्द्यांवर शेतकऱ्यांची मते जाणून घेतली जाणार आहेत.

वाचा: पंजाब विधानसभा निवडणूक पुढे ढकलली, आयोगाने केली नव्या तारखेची घोषणा



Source link

Leave a Reply

Your email address will not be published.

%d bloggers like this: