मोदी सरकारविरोधात काँग्रेसचा हल्लाबोल; ८ प्रमुख दोष दाखवत उठवली टीकेची झोड


म. टा. विशेष प्रतिनिधी, नवी दिल्ली : पंतप्रधान नरेंद्र मोदी यांच्या नेतृत्वाखालील सरकार २६ मे २०१४ रोजी सत्तेत आल्याला गुरुवारी आठ वर्षे पूर्ण झाली. मात्र, हा आठवा वाढदिवस साजरा होण्याऐवजी काँग्रेस आणि भारतीय जनता पक्षाच्या आरोप-प्रत्यारोपांनी वाददिवस साजरा झाला.

पंतप्रधान नरेंद्र मोदी यांच्या नेतृत्वाखाली केंद्रातील सत्तेची आठ वर्षे पूर्ण करणाऱ्या भाजप सरकारने देशाला महागाई, बेरोजगारी, अज्ञान आणि आर्थिक अराजकाच्या खाईत ढकलून देशाच्या विकासाऐवजी आठ वर्षांत ३,४०० जातीय दंगली पेटविल्याचा आरोप गुरुवारी काँग्रेसने एका पुस्तिकेद्वारे केला. तर गेल्या आठ वर्षांच्या काळात पंतप्रधान नरेंद्र मोदी यांनी देशात एक युगांतर स्थापित केले असून, दृष्टिहीन झाल्यामुळे काँग्रेसला हे चित्र दिसत नसल्याचे प्रत्युत्तर भाजपने दिले.

कुत्र्याला फिरवण्यासाठी खेळाडूंना मैदानाबाहेर काढणाऱ्या IAS अधिकाऱ्याला अद्दल घडली, लडाखला बदली

मोदी सरकारची आठ वर्षे पूर्ण झाल्याच्या मुहूर्तावर काँग्रेसने एका पुस्तिकेच्या माध्यमातून ठपका ठेवला. काँग्रेसचे मुख्य प्रवक्ते रणदीपसिंह सुरजेवाला आणि अजय माकन यांनी मोदी सरकारचे आठ प्रमुख दोष दाखवत पत्रकार परिषदेत महागाई, बेरोजगारी, बेहाल अर्थव्यवस्थेवरून टीकेची झोड उठविली. भाजप म्हणजे महागाई असे वर्णन करीत आपल्या फायद्यासाठी करवाढ करून मोदी सरकारने जनतेच्या खिशावर डल्ला मारल्याचा आरोप काँग्रेसने केला. देशाला बेरोजगारी आणि अज्ञानाच्या खाईत लोटले. आर्थिक विकासाचा दर घसरला, रुपया गडगडला, ६६ वर्षांत घेतले नव्हते तेवढे कर्ज घेऊन देशाला आठ वर्षांत कर्जबाजारी केले. देशात यावेळी ४८ कोटी लोक बेरोजगार असून, ४२ लाख सरकारी पदे रिक्त आहेत. बँकांचे घोटाळे वाढले, सरकारी उपक्रम, वीज उत्पादन, विमानतळांची विक्री करण्यात आली. शेतकऱ्यांचे उत्पन्न दुप्पट करण्याऐवजी त्यांच्या वेदना शंभरपटींनी वाढल्या. भाजपचे विकासाशी काहीही देणेघेणे नसलेल्या भाजपच्या काळात गेल्या आठ वर्षांत ३४०० धार्मिक दंगली झाल्याचा आरोप काँग्रेसने केला. भाजपने मागासवर्गाला मागे टाकले आणि अनुसूचित जाती-जमातींशी नाते तोडले. चीनच्या आक्रमणामुळे मोदी सरकारच्या काळात राष्ट्रीय सुरक्षा धोक्यात आली. शौर्याच्या नावावर मते मागणाऱ्या भाजपने सैनिकांच्या हितांवर आघात केले. मोदी सरकारच्या आठ वर्षांच्या काळात बँकांमध्ये पाच लाख ३५ हजार कोटींचे घोटाळे करणाऱ्यांचेच ‘अच्छे दिन’ आले. गेल्या आठ वर्षांत देशातील जनतेला मोदी सरकारने महागाईशिवाय काहीही दिले नाही. घरगुती गॅस सिलेंडरवरील अनुदान संपविल्यामुळे २०१४मध्ये ४१० रुपयांना मिळणाऱ्या गॅस सिलिंडरचा भाव आता एक हजार रुपयांच्या वर गेला. आठ वर्षांत भाजप सरकारने पेट्रोल-डिझेलवरील अबकारी कर ११० टक्क्यांनी वाढवून २७ लाख कोटी रुपयांची कमाई केली. सीएनजीचे दर ३५ रुपये किलोवरून ७५ रुपये प्रतिकिलो झाले, अशी टीका काँग्रेसने केली.

ही दृष्टीची चूक, भाजपचा टोला

काँग्रेस पक्षाची प्रासंगिकता आणि आवश्यकता संपत चालली आहे, अशा अवस्थेकडे काँग्रेस पक्ष उत्तरोत्तर वाटचाल करीत आहे, अशा शब्दांत काँग्रेसच्या मोदी सरकारवरील टीकेचा भाजपचे राष्ट्रीय प्रवक्ते सुधांशु त्रिवेदी यांनी समाचार घेतला. देशाची सौम्य प्रतिमा, संरक्षण उत्पादनाच्या बाबतीत स्वावलंबित्व, आंतरराष्ट्रीय कूटनितीमध्ये देशाला नवा गौरव आणि आत्मसन्मानाने स्थापित करताना, मोदींच्या नेतृत्वाखाली भारताच्या राजकारणात एक युगांतर स्थापित झाले आहे. सर्वाधिक विदेशी गुंतवणूक, सर्वाधिक विदेशी चलनाचा साठा, सर्वाधिक स्टार्टअप्स या आठ वर्षांच्या काळात सुरू झाले. त्यानंतरही जर कोणाला दिसत नसेल, तर दृश्याची चूक आहे की दृष्टीची चूक हे देशातील प्रबुद्ध जनता स्वतःच ठरवू शकते. ज्याची जशी दृष्टी, तशी त्याच्या मनात सृष्टी असते. दृष्टी बदलली तर दृश्य बरेच बदलले असल्याचे काँग्रेसला जाणवेल, असा टोला त्यांनी लगावला. आज जगात अतिशय आव्हानात्मक आर्थिक परिस्थिती असतानाही पंतप्रधान नरेंद्र मोदी यांच्या नेतृत्वाखालील सरकारच्या कुशल धोरणांमुळे भारताचा विकास दर महागाईच्या दरापेक्षा जास्त आहे. आजही ताज्या आकड्यांनुसार आमचा विकास दर ८.५ टक्के, तर महागाईचा दर ७.५ टक्के आहे. आमचे शेजारी देश, युरोप किंवा अमेरिकेत महागाईचा दर दुहेरी आकड्यात आहे. एवढेच नव्हे तर गेल्या आठ वर्षांमध्ये जगातील सर्वात मोठे आर्थिक समावेशकतेचा कार्यक्रम, जगातील सर्वात मोठा आरोग्यसुश्रुषा कार्यक्रम, धान्य वितरण आणि जगातील सर्वात मोठा लसीकरणाचा कार्यक्रम राबविण्यात आले. जगाच्या ज्ञात इतिहासात पहिली वेळ असेल, जेव्हा सर्व जी-७ देशांमध्ये नकारात्मक आर्थिक वाढ नोंदविली गेली. अशा प्रतिकूल परिस्थितीवर मात करून भारतात प्रत्येक गावात वीज आणि रस्ते तसेच प्रत्येक घरात नळाद्वारे पाणीपुरवठा करण्याची व्यवस्था करण्यात आली, याकडे त्रिवेदी यांनी लक्ष वेधले.



Source link

Leave a Reply

Your email address will not be published.

%d bloggers like this: