‘विराट’ विक्रम मोडणे राजस्थानच्या ‘रॉयल’ साठी कठीण, पण दिग्गजांना मागे टाकण्याची संधी


Virat Kohli vs Jos Butter: मुंबई : आयपीएल २०२२ मध्ये राजस्थान रॉयल्सचा सलामीवीर जोस बटलर चमकदार लयीत दिसला. आतापर्यंत खेळलेल्या १५ सामन्यांमध्ये या इंग्लंड फलंदाजाने ५१.२९ च्या दमदार सरासरीने सर्वाधिक ७१८ धावा केल्या आहेत. मोसमाच्या सुरुवातीला बटलर खूप वेगवान फलंदाजी करत होता, पहिल्या ७ सामन्यात त्याने तीन अर्धशतकांसह तितकीच शतके झळकावली होती. त्यावेळी तो विराट कोहलीचा ९७३ धावांसह एका मोसमात सर्वाधिक धावा करण्याचा विक्रम मोडू शकेल असे मानले जात होते. परंतु उत्तरार्धात बटलर धावा करताना थोडा संघर्ष करताना दिसला. या कामगिरीच्या अभावामुळे विराट कोहली आणि त्याच्या धावांमध्ये मोठी दरी निर्माण झाली. अशा परिस्थितीत बटलरला आता कोहलीचा विक्रम मोडणे अवघड झाले असले तरी तो इतर दिग्गज फलंदाजांना मागे टाकू शकतो.

वाचा – रजत पाटीदार नव्हे तर RCBच्या विजयाचा खरा हिरो ठरला फिल्डर; पाहा व्हिडिओ

कोहली-बटलरमध्ये २५५ धावांचा फरक
आयपीएल २०१६ मध्ये विराट कोहलीने १६ डावात ८१.०८ च्या सरासरीने सर्वाधिक ९७३ धावा केल्या. यादरम्यान रन मशीन म्हणून ओळखल्या फलंदाजाने चार शतके झळकावली होती. बटलरने या मोसमात आतापर्यंत ७१८ धावा केल्या आहेत पण, तो अजूनही कोहलीपेक्षा २५५ धावांनी पिछाडीवर आहे. बटलर या मोसमात जास्तीत जास्त दोन सामने खेळू शकतो, परंतु कोहलीच्या विक्रमाच्या जवळ येणे त्याच्यासाठी खूप कठीण दिसत आहे.

वाचा – एका शस्त्रक्रियेनं आयुष्य बदललं; आरसीबीच्या शतकवीर ‘हनुमाना’ची प्रेरणादायी कहाणी

कोहली नाही तर बटलरकडे या दिग्गजांना पछाडण्याची संधी
बटलर सध्या आयपीएलच्या एका मोसमात सर्वाधिक धावा करणाऱ्यांच्या यादीत सहाव्या स्थानावर आहे. कोहली (९७३), डेव्हिड वॉर्नर (८४८), केन विल्यमसन (७३५), ख्रिस गेल (७३३) आणि मायकेल हसी (७३३) बटलरच्या पुढे आहेत. बटलरने आज रॉयल चॅलेंजर्स बेंगळुरूविरुद्धच्या दुसऱ्या क्वालिफायरमध्ये १६ धावा केल्या तर तो गेल आणि हसीला मागे टाकेल. दुसरीकडे, त्याने १८ धावा केल्यास तो विल्यमसनच्या पुढे जाईल. याशिवाय वॉर्नरला मागे टाकण्यासाठी बटलरला अद्याप १३१ धावांची गरज आहे, आणि जर राजस्थानने अंतिम फेरी गाठली तर तो हा विक्रम मोडेल अशी अपेक्षा केली जाऊ शकते.



Source link

Leave a Reply

Your email address will not be published.

%d bloggers like this: