Corona: आठवड्याभरात ३७ लाख नवे रुग्ण समोर, जूनमध्ये ओमिक्रॉनचा धोका वाढणार – WHO

बीजिंग : करोना विषाणूच्या संसर्गामुळे सध्या जगभरात भीषण परिस्थिती ओढावली आहे. अशात चीनमध्ये यामुळे हाहाकार माजला आहे. जागतिक आरोग्य संघटनेने (WHO) दिलेल्या माहितीनुसार, गेल्या आठवड्यात जगभरात करोना विषाणूचे ३.७ दशलक्ष नवीन रुग्ण आढळले आहेत आणि ९,००० करोनाबाधित रुग्णांचा मृत्यू झाला आहे. जानेवारीमध्ये तर करोनाच्या प्रकरणांमध्ये घट झाली आहे. सगळ्यात गंभीर बाब म्हणजे जूनमध्ये ओमिक्रॉनची भीती आणखी वाढण्याची शक्यता असल्याची माहिती आरोग्य तज्ज्ञांनी व्यक्त केली आहे.

WHO च्या म्हणण्यानुसार, जगातील फक्त अमेरिका आणि वेस्टर्न पॅसिफिक या दोनच प्रदेशांमध्ये करोनाची प्रकरणं मोठ्या प्रमाणात वाढत आहेत. तर सौदी अरेबियासह मध्य पूर्वेतील मृतांच्या संख्येत ३० टक्क्यांनी वाढ झाली.

जूनमध्ये वाढू शकतो ओमिक्रॉनचा धोका

क्वाझुलु-नताल युनिव्हर्सिटी ऑफ डर्बनच्या तज्ज्ञांच्या मते, दक्षिण आफ्रिकेत BA.4 आणि BA.5 मुळे आलेली नवी लाट आता ओसरताना दिसत आहे. गेल्या वर्षी नोव्हेंबरमध्ये दक्षिण आफ्रिकेतच ओमिक्रॉनचे पहिलं प्रकरण समोर आलं होतं. मात्र, जूनमध्ये ओमिक्रॉनमध्ये वाढ होण्याची भीती आहे. WHO ने दिलेल्या माहितीनुसार, Omicron च्या सर्व प्रकारांना ट्रॅक केले जात आहे.

करोनामुळे चीनमधील परिस्थिती अजूनच बिकट होत चालली आहे. तिथे कोट्यवधी लोक या ना त्या आजाराने ग्रस्त आहेत. राजधानी बीजिंगमधील अधिकाऱ्यांनी कर्मचारी आणि विद्यार्थ्यांना घरीच राहण्याचे आदेश दिले आहेत. इतकंच नाहीतर, तिथे पुन्हा करोनाची चाचणी करण्यावर भर देण्यात येत आहे. शांघायमध्ये लॉकडाऊन कठोर असून इतर शहरांमध्ये अद्याप असे कोणतेही निर्बंध नाहीत. शांघायमध्ये गेल्या दोन महिन्यांपासून लाखो लोक कडक निर्बंधाखाली राहत आहेत.