गुगल अडचणीत; ‘या’ कारणामुळे ब्रिटनमध्ये सुरू झाली चौकशी


ईटीवृत्त, लंडन :

गुगलच्या जाहिरात धोरणावर (अॅडटेक) पुन्हा एकदा प्रश्नचिन्ह उपस्थित करण्यात आले असून, यामुळे गुगल अडचणीत आले आहे. ब्रिटनमधील स्पर्धा आणि बाजार प्राधिकरणाने (कॉम्पिटिशन अँड मार्केट्स अॅथॉरिटी अर्थात सीएमए) गुगलचे जाहिरात धोरण, तसेच ते कसे वापरले जाते? याची दुसऱ्यांदा चौकशी सुरू केली आहे. या वर्षाच्या सुरुवातीला गुगल आणि फेसबुकची मातृकंपनी मेटा यांच्यातील ‘जेडी ब्लू’ कराराच्या चौकशीच्या नंतर ‘सीएमए’ने ही नवीन चौकशी सुरू केली आहे.

जगभरातील सरकारे गुगलवरील नियमन कठोर करीत आहेत. अमेरिका आणि युरोपियन युनियनसह जागतिक स्तरावर त्यांच्या बाजाराच्या स्थितीबद्दल अनेक चौकशा सुरू आहेत. गुगल आणि फेसबुक यांना त्यांचे वर्चस्व वापरून छोट्या कंपन्यांना हुसकावून लावता येऊ नये, तसेच त्यांना ग्राहकांचे नुकसान करण्यापासून रोखण्यासाठी ब्रिटनने गेल्या वर्षी नवीन स्पर्धा व्यवस्था लागू केली होती.

‘शरद पवारांचा ‘जुम्मा’ असल्याने Non-Veg खाल्ल्याचं सांगून दगडूशेठच्या मंदिरात जाणं टाळलं’

या निर्णयामुळे ‘सीएमए’मध्ये एक समर्पित डिजिटल मार्केट्स युनिट तयार करण्यात आले. यामुळे टेक फर्म्सनी घेतलेले निर्णय स्थगित करणे, ब्लॉक करणे आणि परतवून लावण्याचे अधिकार दिले जाऊ शकतात. तसेच त्याचे पालन न केल्यास आर्थिक दंडही आकारला जाऊ शकतो. दरम्यान, कंपन्या ग्राहकांचा डेटा कशाप्रकारे वापरतात याबद्दल अधिक पारदर्शक असणे आवश्यक आहे, असे कंपन्यांना सांगण्यात आले आहे.

गुगलने डिजिटल जाहिरात क्षेत्रात आपल्या वर्चस्वाचा गैरफायदा घेतल्याचा प्राधिकरणाला संशय आहे. यापूर्वी मार्चमध्येही फेसबुक आणि गुगल यांच्यातील कराराची चौकशी केल्याचे ब्रिटनच्या अधिकाऱ्यांनी म्हटले होते. उभय कंपन्यांमधील या कराराला ‘जेडी ब्लू’ असेही म्हटले जाते. याखेरीज, युरोपियन युनियननेही, आपण गुगलच्या जाहिरात धोरणाची चौकशी करणार असल्याचे गेल्या वर्षी म्हटले होते. विशेष म्हणजे, ब्रिटनमधील २.३ अब्ज डॉलरच्या ऑनलाइन जाहिरात बाजारपेठेतील गुगल हा सर्वात मोठा स्पर्धक आहे.

डिजिटल जाहिरातींमध्ये स्पर्धा मर्यादित करून गुगलने कायद्याचे उल्लंघन केले आहे, की नाही याचा तपास करत असल्याचे ‘सीएमए’ने जारी केलेल्या प्रसिद्धपत्रकात म्हटले आहे. गुगलने डिजिटल जाहिरात क्षेत्रात ‘अॅडटेक स्टॅक’ म्हणून महत्त्वाचे स्थान व्यापलेले आहे. याद्वारे गुगल प्रकाशक आणि जाहिरातदार अशा दोघांकडूनही फी घेतो. सन २०१९मध्ये ब्रिटनमधील जाहिरातदारांनी ऑनलाइन जाहिरातींवर १.८ अब्ज डॉलर खर्च केले. ब्रिटनमधील बहुसंख्य लोक ऑनलाइन कंटेन्टचा सर्वाधिक उपयोग करतात, म्हणून जाहिरातदारांनी ही एवढी मोठी रक्कम खर्च केली होती.

दरम्यान, अॅडटेक तंत्रज्ञानातील आपल्या मजबूत स्थितीचा वापर करून गुगल आपल्या प्रतिस्पर्ध्यांना नुकसान पोहोचवू शकते. याचा परिणाम आमच्या ग्राहकांवर आणि पर्यायाने त्यांची सेवा घेणाऱ्या ग्राहकांवर होणार आहे. परिणामी या क्षेत्रातील स्पर्धा कमकुवत होऊ शकते आणि प्रकाशकांच्या जाहिरातींच्या महसुलातही घट होऊ शकते. यामुळे त्यांना खर्चात कपात करावी लागू शकते किंवा त्यांची सामग्री (कंटेन्ट) ‘पेवॉल’च्या (पैसै दिल्याशिवाय कंटेन्ट पाहता येणार नाही.) मागे ठेवण्यास भाग पाडले जाऊ शकते किंवा मग सामग्रीच्या गुणवत्तेशी तडजोड करावी लागू शकते, अशी आम्हाला शंका आहे, असं ‘सीएमए’चे मुख्य कार्यकारी आंद्रिया कोसेली यांनी म्हटलं आहे.



Source link

Leave a Reply

Your email address will not be published.

%d bloggers like this: