आयडीसाठी आधार कार्डचा वापर करता? वेळीच सावध व्हा! सरकारकडून नियमावली जारी


मुंबई: आधार कार्ड महत्त्वाचा दस्तावेज मानलं जातं. अनेक सरकारी आणि बिगर सरकारी कामं करताना आधार कार्ड आवश्यक असतं. बँकेत खातं उघडायचं असो वा हॉटेलमध्ये रूम बूक करणं असो, आधार कार्डची मागणी केली जाते. मात्र आता सरकारनं आधार कार्डबद्दल नवी नियमावली प्रसिद्ध केली आहे. केंद्रीय इलेक्ट्रॉनिक्स आणि माहिती तंत्रज्ञान मंत्रालयानं याबद्दलचं एक निवेदन प्रसिद्ध केलं आहे. आधार कार्डचा गैरवापर टाळण्यासाठीच्या सूचना यामधून देण्यात आल्या आहेत.

प्रत्येक संस्थेला तुमच्या आधार कार्डची फोटोकॉपी देऊ नका. अन्यथा त्या फोटोकॉपीचा दुरुपयोग होऊ शकतो. त्याऐवजी मास्क आधार कार्डचा वापर करा. मास्क आधार कार्डमध्ये आधार क्रमांकातील केवळ शेवटचे चार आकडेच दिसतात. यूआयडीएआयच्या अधिकृत संकेतस्थळावरून मास्क आधार कार्ड डाऊनलोड करता येतं.

प्रत्येक कामासाठी तुम्ही ओळखपत्र म्हणून आधार कार्डचा वापर करत असाल, तर वेळीच सावध व्हा. आधार कार्ड वापरत असताना दाखवलेला बेजबाबदारपणा नुकसानदायक ठरू शकतो. आधार कार्डच्या फोटोकॉपीऐवजी मास्क आधार कार्डचा वापर करा, अशा सूचना केंद्र सरकारकडून देण्यात आल्या आहेत. अनेकजण हॉटेल चेक इन किंवा अन्य कारणांसाठी आधार कार्डचा वापर करतात. मात्र हॉटेल्स, चित्रपटगृह यासारख्या खासगी संस्थांना आधार कार्डची प्रत घेण्याची आणि त्यांच्याकडे ठेवण्याची परवानगी नाही. यामुळे आधार कार्ड कायदा २०१६चं उल्लंघन होतं.

यूआयडीएआयकडून परवाना मिळालेल्या संस्थाच एखाद्या व्यक्तीची ओळख पटवण्यासाठी आधार कार्डचा वापर करू शकतात. यूआयडीएआयचा परवाना नसलेल्या संस्थांना आधार कार्ड मागण्याची परवानगी नाही. एखाद्या खासगी संस्थेनं तुमच्याकडे आधार कार्डची फोटोकॉपी मागितल्यास त्या संस्थेकडे यूआयडीएआयनं दिलेला परवाना आहे का, याची खातरजमा करून घ्या.

इंटरनेट कॅफे, कियॉस्क यासारख्या ठिकाणाहून ई-आधार डाऊनलोड करू नका, अशीही सूचना सरकारनं केली आहे. इंटरनेट कॅफे, कियॉस्कवरून ई-आधार डाऊनलोड करणं अतिशय गरजेचं असल्यास, कॉम्प्युटरवरून ई-आधारची डाऊनलोडेड कॉपी कायमची डिलीट केली आहे ना, याची खातरजमा करा.



Source link

Leave a Reply

Your email address will not be published.

%d bloggers like this: