मान्सून केरळमध्ये दाखल; महाराष्ट्रातही आनंदवार्ता; पुढच्या चार दिवसांत…

मुंबईः उन्हाच्या काहिलीने हैराण झालेल्या नागरिकांसाठी एक आनंदाची बातमी समोर येत आहे. मान्सून आज केरळमध्ये दाखल झाल्यानंतर राज्यासाठीही शुभवार्ता आहे. ३० मेपासून पुढील चार दिवस महाराष्ट्रात पावसाची शक्यता वर्तवण्यात आली आहे. (monsoon in maharashtra)

मान्सून अंदमानमध्ये १६ मे रोजी दाखल झाला होता. त्यानंतर काही काळ श्रीलंकेच्या वेशीवर मान्सून काही काळ अडकला होता. अखेर आज तो केरळमध्ये दाखल झाला आहे. यंदा मान्सून वेळेच्या आधी दाखल झाल्याने शेतकरी राजाही सुखावणार आहे. तसंच, यंदा उन्हाचा तडाखा अधिक होत्या. मार्चमहिन्यातच उष्णतेच्या लाटेमुळं नागरिक हैराण झाले होते. तर, उष्माघाताने अनेकांना प्राणही गमवावे लागले होते. मात्र, आता उकाड्यापासून लवकरच नागरिकांची सुटका होणार आहे.

मोठी बातमी, मान्सून केरळमध्ये दाखल, हवामान विभागाची माहिती

हवामान विभागाचे अधिकारी के.एस. होसाळीकर यांनीदेखील केरळमध्ये मान्सून दाखल झाल्याची माहिती दिली होती. त्यानंतर त्यांनी आणखी एक ट्विट केलं आहे. उद्यापासून पुढील चार दिवस दक्षिण कोकण, दक्षिण मध्य महाराष्ट्र आणि मराठवाड्यातील लगतच्या काही भागात गडगडाटासहसह पाऊस पडण्याची शक्यता आहे, असं होसाळीकर यांनी ट्वीट करत म्हटलं आहे.आज सकाळी आठ वाजता केरळ राज्यातील अनेक भागात हलका ते मध्यम स्वरुपाच्या पावसाची नोंद झाली आहे. त्यामुळं सध्या आकाश अंशतः ढगाळ असेल, असंही त्यांनी म्हटलं होतं.

केरळमध्ये मान्सूनचे आगमन कसे जाहीर केले जाते?

१० मेनंतर केरळमधील १४ हवामान केंद्रांपैकी किमान ६० टक्के केंद्रांवर सलग दोन दिवस २.५ मिलीमीटर किंवा त्यापेक्षा अधिक पावसाची नोंद झाली, तर दुसऱ्या दिवशी मान्सूनचे केरळमधील आगमन जाहीर केले जाते. पण, त्यासोबत हवामानाचे इतरही काही घटक गृहीत धरले जातात.

वाचाः मान्सूनची प्रगती का संथावली, काय आहेत कारणं? पाहा…
दरम्यान, मान्सूनने या वर्षी सर्वसाधारण वेळेआधीच अंदमान-निकोबार आणि दक्षिण अरबी समुद्रात प्रवेश केला. केरळमध्ये मान्सून २७ मे रोजी दाखल होऊ शकतो, असा अंदाज भारतीय हवामानशास्त्र विभागाने (आयएमडी) वर्तवला होता. मात्र, सर्वसाधारण वेळेआधी प्रवास सुरू केलेल्या मान्सूनचा उत्तरेकडील प्रवास संथावला असल्याचे दिसून येत आहे.