आदित्य ठाकरेंनी मुंबईत परतताच मर्मावर बोट ठेवलं; एकनाथ शिंदेंना चांगलंच कात्रीत पकडलं


मुंबई : शिवसेना आमदार आणि खासदारांनी केलेल्या बंडखोरीनंतर पक्षात पडलेल्या फुटीच्या पार्श्वभूमीवर युवासेनेचे प्रमुख आदित्य ठाकरे हे भलतेच सक्रिय झाले आहेत. आदित्य यांचा राज्यभरात झंझावाती दौरा सुरू असून थेट रस्त्यावर उतरून ते बंडखोरांवर निशाणा साधत आहेत. राज्यातील विविध जिल्ह्यांमध्ये सभा घेतल्यानंतर ते मुंबईत परतले आहेत. मुंबईत येताच आदित्य यांनी शिवसेनेच्या शाखांना भेट देण्यास सुरुवात केल्याचं पाहायला मिळत आहे.

आदित्य ठाकरे यांनी मुंबईतील विभागवार शिवसेना शाखांचा आढावा घेण्यास गुरुवारपासून सुरुवात केली. पहिल्या दिवशी त्यांनी भायखळा, वरळी आणि प्रभादेवी येथील काही शाखांमध्ये भेटी देऊन शाखाप्रमुख, विभागप्रमुख आणि पदाधिकाऱ्यांच्या भेटी घेत स्थानिक राजकीय स्थितीचा आढावा घेतला. मुंबईतील इतरही शिवसेना शाखांमध्ये ते आता नियमित भेटी देणार आहेत.

मंत्रीमंडळ विस्ताराचा मुहूर्त कधी; आमदारांची यादी अमित शहांकडे, भाजपकडून पुन्हा धक्कातंत्र?

एकनाथ शिंदे यांना कात्रीत पकडलं

शिवसेनेच्या आमदार आणि खासदारांनी ज्यांच्या नेतृत्वात बंडखोरी केली त्या मुख्यमंत्री एकनाथ शिंदे यांच्यावरच आदित्य ठाकरे यांनी थेट निशाणा साधला आहे. ‘हे सरकार निवडणुकीला घाबरत आहे. ज्या नगरविकास मंत्र्यांनी नवीन वार्ड रचना जाहीर केली होती, त्याच नगरविकास मंत्र्यांनी मुख्यमंत्री झाल्यानंतर ती वार्ड रचना रद्द केली, त्यामुळे हे सरकार निवडणुकीला घाबरत असल्याचं स्पष्ट झालं आहे,’ असा हल्लाबोल त्यांनी केला.

मुंबई जिंकण्यासाठी थेट शाखेत जाऊन शिवसैनिकांना दिला कानमंत्र

मुंबई महानगरपालिका निवडणूक जवळ आल्याने सर्वच राजकीय पक्षांच्या हालचालींना वेग आला आहे. पक्षातील फुटीनंतर मुंबईतील सत्ता कायम ठेवण्याचं मोठं आव्हान शिवसेनेसमोर असणार आहे. या पार्श्वभूमीवर आदित्य ठाकरे यांनी शिवसैनिकांना मार्गदर्शन केलं. ‘आपण केलेली कामं घरा-घरापर्यंत पोहोचवा. केलेल्या कामाची माहिती द्या. नवीन मतदारयादीत मतदार राजाची नोंद वाढवा. हे सरकार बेकायदेशीर आहे आणि ते पडणारच आहे. त्यामुळे आपण केलेल्या कामाची माहिती देऊन मतदारराजाला जागृत करा,’ असंही आदित्य ठाकरे म्हणाले.



Source link

Leave a Reply

Your email address will not be published.

%d bloggers like this: