IPL 2021 Latest Points Table: किंग्ज नव्हे ‘किंग’; गुणतक्ता पुन्हा एकदा बदलला, दिल्लीने अव्वल स्थान गमावले

अबुधाबी: आयपीएलच्या १४व्या हंगामात चेन्नई सुपर किंग्जने अखेरच्या चेंडूवर कोलकाता नाईट रायडर्सवर विजय मिळवला आणि प्लेऑफमधील स्थान निश्चित केले. रविवारी झालेल्या सामन्यात केकेआरने प्रथम फलंदाजी करत चेन्नईपुढे १७२ धावांचे लक्ष्य दिले होते. धावांचा पाठलाग करताना चेन्नईची सुरुवात चांगली झाली. पण मधळ्या फळीत अंबाती रायडू, सुरेश रैना आणि महेंद्र सिंह धोनी पुन्हा एकदा धावा करण्यात अपयशी ठरले. १९व्या षटकात रविंद्र जडेजाने २२ धावांचा पाऊस पाडला आणि पारडे चेन्नईच्या बाजून झुकवले. तरी देखील चेन्नई विजयापासून दूर होता. लढत शेवटच्या चेंडूपर्यंत रंगली आणि अखेर चेन्नईने बाजी मारली.

वाचा- CSK Win: चेन्नई सुपर किंग्जचा थरारक विजय, प्ले ऑफमध्ये दिमाखदार प्रवेश

चेन्नईच्या या विजयामुळे गुणतक्त्यात पुन्हा एकदा बदल झाला आहे. चेन्नईने १० पैकी ८ सामन्यात विजय मिळवत पहिले स्थान मिळवले. त्यांनी पुन्हा एकदा दिल्ली कॅपिटल्सला मागे टाकले. दिल्ली आणि चेन्नई यांचे समान म्हणजे १६ गुण आहेत. पण चेन्नईची सरासरी फारच चांगली आहे. चेन्नईची सरासरी प्लस १.०६९ इतकी तर दिल्लीची प्लस ०.७११ इतकी आहे.

वाचा- अखेरच्या चेंडूवर पराभव; चॅम्पियन कर्णधाराचा संघ प्लेऑफ शर्यतीतून बाहेर

तिसऱ्या स्थानावर रॉयल चॅलेंजर्स बेंगळुरू असून त्याचे १० गुण आहेत. चौथ्या स्थानावर कोलकाता नाईट रायडर्स, पाचव्या स्थानावर पंजाब किंग्ज, सहाव्यावर मुंबई इंडियन्स, सातव्यावर राजस्थान रॉयल्स तर सनरायझर्स हैदराबाद आठव्या स्थानावर आहेत. हैदराबादचा संघ प्ले ऑफच्या शर्यतीतून बाहेर पडला आहे.

वाचा- Video: संघाबाहेर असलेल्या खेळाडूने घेतला सनसनाटी कॅच; होत आहे कौतुक

आज होणाऱ्या दुसऱ्या लढतीत आरसीबीने विजय मिळवल्यास ते तिसरे स्थान भक्कम करतील. जर मुंबईने विजय मिळवाल तर ते चौथ्या स्थानावर झेप घेतील.