आज वर्ल्ड फोटोग्राफी डे आणि आजच दहीहंडी; मग पाहून घ्या थरावर थरांचे हे सर्वात कडक फोटो


Dahihandi Celebration Photo: देशभरात श्रीकृष्ण जन्माष्टमी आणि दहीहंडीचा उत्साह पाहायला मिळतो आहे. करोना काळात मागील दोन वर्षांपासून कोणतेच उत्सव साजरे होत नव्हते. पण यंदा दोन वर्षांनंतर सण-उत्सव साजरे होत असल्याने नागरिकांमध्ये मोठा उत्साह, जल्लोष पाहायला मिळतो आहे. आज मुंबई, ठाणे, नवी मुंबई अशा अनेक ठिकाणी दहीहंडीचा जल्लोष असून ठिकठिकाणी उंचच-उंच दहीहंडी उभारण्यात आल्या आहेत. दहीहंडीसाठी प्रसिद्ध असलेल्या ठाण्यातही मानाच्या हंडी फोडण्यासाठी अनेक पथकांची चढाओढ पाहायला मिळाली. मुंबई, ठाण्यासह उपनगरात गोविंदा पथकांचा जल्लोष पाहायला मिळाला. दरवर्षी विक्रमांचे थर लावणाऱ्या जय जवान पथकाकडे यंदाही सर्वांचं लक्ष होतं. जोगेश्वरी येथील ‘जय जवान’ गोविंदा पथकाने (Jay Jawan Govinda) नऊ थरांची सलामी दिली. मुख्यमंत्री एकनाथ शिंदे यांनीही दहीहंडीच्या उत्सवात सहभाग घेतला होता.

कोकण नगर जोगेश्वरी गोविंदा पथकानं रचले ९ थर

दोन वर्षांनंतर दहीहंडी साजरी होताना कोकण नगर जोगेश्वरी गोविंदा पथकाने ९ थर लावत सलामी दिली. पथकाने ९ थरांची सलामी दिल्यानंतर एकच जल्लोष करण्यात आला. यावेळी गोविंदा पथकांना रोख रक्कम आणि स्मृतिचिन्ह पारितोषिक म्हणून देण्यात आलं. महाराष्ट्र नवनिर्माण सेनेकडून मुंबईतील भांडूप इथे ही हंडी उभारली होती. यावेळी जय जवान पथकाने ९ थरांची सलामी दिली. त्यानंतर सर्व थरावरुन गोविंदा सुरक्षितरित्या खाली आले. हेही वाचा – मुंबईत यंदा ओसंडून वाहतोय दहीहंडीचा उत्साह; हे आहेत आजचे सगळ्यात भारी फोटो

मुंबई, ठाणे, नवी मुंबईत दहीहंडीचा उत्साह

मुंबईच्या रस्त्यांवर गोविंदांचा उत्साह पाहायला (Janmashtami Dahihandi Celebration) मिळाला. दादरच्या आयडियल बुक डेपो गल्लीत गोविंदांनी सात थर रचले. मुंबईतील लालबाग परिसरातही कृष्ण जन्माष्टमी उत्सवाचा उत्साह असून इथेही दहीहंडी फोडण्यासाठी थर रचण्यात आले होते. मुंबई, ठाणे उपनगरात दहीहंडीचा उत्साह ओसंडून वाहताना दिसला. ठाण्यातील हिरानंदानी मेडोज, टेंभी नाका, इतर परिसरात गोविंदा पथकांची मोठी गर्दी, तसंच सर्वाधिक थर लावण्यासाठी गोविंदा पथकांची चढाओढही पाहायला मिळाली.

हार्नेस, हेल्मेट घालून शेवटच्या थरावर चिमुकले

दहीहंडीला मोठ्यांसह चिमुकल्यांचाही उत्साह पाहायला मिळाला. दहीहंडी फोडण्यासाठी शेवटच्या थरावर हार्नेस, हेल्मेट घालून अनेक चिमुकले चढले होते. गोविंदा पथकांकडून चिमुकल्यांसाठी हार्नेस, हेल्मेटचा वापर करण्यात आला होता. दहीहंडीचा जल्लोष असताना एखादी दुर्घटना घडल्यास गोविंदांवर सरकारी रुग्णालयांमध्ये मोफत उपचार केला जाण्याची घोषणा मुख्यमंत्री एकनाथ शिंदेंनी केली होती. याअंतर्गत राज्यातील सर्व सरकारी रुग्णालयं, मेडिकल कॉलेज, जिल्हा परिषद रुग्णालयं, नगर पालिकांमध्ये मोफत उपचार करण्याचे निर्देश देण्यात आले आहेत.

‘हंडी उंच होती…पण फोडली…’

टेंभी नाक्याच्या दहीहंडीत एकनाथ शिंदेंनीही हजेरी लावली होती. यावेळी त्यांनी जन्माष्टमी, दहीहंडीच्या शुभेच्छा देत तुफान फटकेबाजीही केली. तुम्ही आता इथे सर्व हंडी फोडत आहात, आम्हीही दीड महिन्यापूर्वी सगळ्यात मोठी हंडी फोडल्याचं ते म्हणाले. हंडी कठीण होती…उंच होती पण तुमच्या शुभेच्छांमुळे, बाळासाहेबांच्या आशिर्वादामुळे ५० थर लावत हंडी फोडल्याचं ते म्हणाले. गोविंदांची पंढरी म्हणून ओळखल्या जाणाऱ्या टेंभी नाक्याच्या या दहीदंडीसाठी बॉलिवूड अभिनेत्री श्रद्धा कपूरही उपस्थित होती.

गोविंदा, दहीदंडीबाबत महत्त्वपूर्ण निर्णय

गोविंदासाठी तीन महत्त्वाचे निर्णय घेण्यात आले आहेत. यंदापासून दहीहंडीला साहसी खेळ म्हणून मान्यता देण्यात आली आहे. तसंच दहीहंडीवेळी थर लावताना काही दुर्घटना घडल्यास गोविंदांसाठी १० लाखांचा विमाही देण्यात आला आहे. पुढच्या वर्षीपासून खो-खो, कबड्डी खेळाप्रमाणेच दहीहंडी या साहसी खेळालाही मान्यता मिळेल. प्रो कबड्डीप्रमाणे, प्रो गोविंदाही सुरू होईल अशी घोषणा मुख्यमंत्री एकनाथ शिंदे यांनी केली आहे. याला स्पोर्ट्समधून ५ टक्के नोकऱ्यांमध्ये कोटा देखील मिळेल, असंही मुख्यमंत्र्यांनी सांगितलं.



Source link

Leave a Reply

Your email address will not be published.

%d bloggers like this: