INDWvsAUSW : जर्सी क्रमांक १८ भारतासाठी लकी; विराटनंतर स्मृती मंधानाने रचला इतिहास


क्वीन्सलँड : भारताची स्टार सलामीवीर फलंदाज स्मृती मंधानाने (Smriti Mandhana) ऑस्ट्रेलियाविरुद्धच्या पिंक बॉल कसोटी सामन्यात नवा इतिहास घडवला आहे. क्वीन्सलँडच्या कॅरारा ओवल मैदानात खेळवल्या जात असलेल्या एकमेव डे-नाईट कसोटी सामन्याच्या दुसऱ्या दिवशी शानदार शतक झळकावले आहे. गुलाबी चेंडू (पिंक बॉल) कसोटी सामन्यात शतक झळकावणारी स्मृती दुसरी भारतीय खेळाडू ठरली आहे. याआधी पिंक बॉल कसोटीमध्ये भारतीय कर्णधार विराट कोहलीने शतकी खेळी केली होती.


२५ वर्षीय स्मृतीचं कसोटी कारकीर्दीतील हे पहिलं शतक आहे. ५२व्या षटकात एलिस पेरीला चौकार लगावत १७० चेंडूत आपलं शतक पूर्ण केलं. १२७ धावांवर ती बाद झाली. २१६ चेंडूत २२ चौकार आणि १ खणखणीत षटकार तिने लगावला. ऑस्ट्रेलियाच्या भूमीवर शतक करणारी स्मृती पहिली महिला क्रिकेटपटू ठरली आहे. स्मृतीच्या कारकीर्दीतील हा चौथा कसोटी सामना होता. यापूर्वी कसोटीत तिची सर्वोत्तम धावसंख्या ७८ होती.

दरम्यान, स्मृती अगोदर विराट कोहलीने २०१९मध्ये कोलकाताच्या ऐतिहासिक ईडन गार्डनवर बांगलादेशविरुद्ध असा पराक्रम केला होता. विराटने डे-नाईट कसोटी सामन्यात १३६ धावांची खेळी केली होती. स्मृतीने शतक झळकावल्यानंतर सोशल मीडियात जर्सी क्रमांक १८ वरून जोरदार चर्चा सुरू झाली आहे.

स्मृती मंधाना आणि विराट कोहली या दोघांच्या जर्सीचा क्रमांक १८ आहे. एका क्रिकेट चाहत्यानं म्हटलं आहे की, जर्सी क्रमांक १८ नेहमी गर्जते. टीम इंडियाचा माजी कसोटी सलामीवीर वसीम जाफरने स्मृतीला ऑफसाइडची देवी असं म्हटलं आहे. आणखी एका नेटकऱ्यानं म्हटलं आहे की, जर्सी क्रमांक १८ मध्ये नक्कीच काहीतरी रहस्य आहे.

चौथ्या कसोटीत शतक
अनुभवी सलामीवीर स्मृतीने तिच्या चौथ्या कसोटी सामन्यात शतक झळकावले आहे. याआधी तिने पदार्पणाच्या कसोटी सामन्यातही अर्धशतक झळकावले होते. २०१४ मध्ये इंग्लंडविरुद्ध कसोटी पदार्पण करणाऱ्या स्मृतीने तीन महिन्यांपूर्वी ब्रिस्टलमध्ये इंग्लंडविरुद्धच ७८ धावांची दमदार खेळी केली होती.



Source link

Leave a Reply

Your email address will not be published.

%d bloggers like this: