६ चौकार आणि ६ षटकार; २० वर्षीय खेळाडू पुढे बाबर आझमने टेकले गुडघे
२० वर्षीय हैदर अली नॉर्दर्नच्या विजयाचा शिल्पकार ठरला. त्याने नाबाद ९१ धावा केल्या आणि संघाला विजयाकडे नेले. सेंट्रल पंजाबकडे हसन अली, फहीम अशरफ, वहाब रियाज, उस्मान कादिरसारखे आंतरराष्ट्रीय क्रिकेट खेळणारे स्टार गोलंदाज होते, पण ते संघाला विजय मिळवून देऊ शकले नाहीत. या विजयासह नॉर्दनचा संघ दुसऱ्या स्थानावर पोहोचला. त्यांचे चार सामन्यात सहा गुण आहेत. दुसरीकडे, सेंट्रल पंजाबचे चार सामन्यांत चार गुण आहेत.
वाचा- INDWvsAUSW : जर्सी क्रमांक १८ भारतासाठी लकी; विराटनंतर स्मृती मंधानाने रचला इतिहास
नाणेफेक जिंकल्यानंतर प्रथम फलंदाजी करताना सेंट्रल पंजाबने वेगवान धावा काढल्या. अहमद शहजाद (३७) आणि बाबर आझमने पहिल्या विकेटसाठी ६७ धावांची भागीदारी केली. यादरम्यान शहजादने सोहेल तन्वीरच्या एका षटकात पाच चौकार लगावले. २० चेंडूत आठ चौकारांसह ३७ धावा करून तो मोहम्मद नवाजचा बळी ठरला. यष्टीरक्षक मोहम्मद अखलाफने दोन षटकारांसह २१ धावा केल्या, पण कर्णधार बाबरने सर्वांचं लक्ष्य वेधून घेतलं. त्याने ११ चौकार आणि तीन षटकारांसह शतक झळकावले. टी-२० क्रिकेटमधील त्याचे हे सहावे शतक आहे. शेवटच्या काही षटकांत शोएब मलिकने २१ चेंडूत चार चौकारांसह नाबाद ३१ धावा केल्या. त्यामुळे सेंट्रल पंजाबचा संघ २०० धावांपर्यंत मजल मारू शकला.
हैदरने पाडला षटकार आणि चौकारांचा पाऊस
लक्ष्याचा पाठलाग करताना नॉर्दनने ५६ धावांत दोन गडी गमावले, पण २० वर्षीय हैदर अलीने भरारी घेतली. मोहम्मद नवाजसोबत त्याने सेंट्रल पंजाबच्या गोलंदाजांची धुलाई करण्यास सुरवात केली. नवाजने २१ चेंडूत दोन चौकार आणि चार षटकारांसह ४१ धावा केल्या. त्याने हैदरसोबत ८४ धावांची भागीदारी केली. त्याच्या जाण्यानंतर आसिफ अलीने १४ चेंडूत तीन चौकार आणि एका षटकारासह २८ धावा केल्या आणि संघाला विजयाच्या जवळ आणले. हैदर अलीला शतक पूर्ण करता आलं नाही. तो ५३ चेंडूत सहा चौकार आणि सहा षटकारांसह ९१ धावांवर नाबाद राहिला. नॉर्दर्नच्या फलंदाजांनी सामन्यात ११ षटकार लगावले, तर सेंट्रल पंजाबला फक्त पाचच षटकार मारता आले.
