पोलिस निरीक्षकाचा प्रताप! व्यापाऱ्याला मारहाण, तोंडात पिस्तुल घुसवले

बुलंदशहरः गोरखपूरमध्ये मनीष गुप्ताच्या हत्येनंतरही यूपी पोलिसांचा आणखी एक कारनामा समोर आला आहे. आता बुलंदशहरमधील पोलिसांचं एक नवं प्रकरण समोर आलं आहे. कोतवाली शहरात तैनात असलेल्या एका अतिरिक्त पोलिस निरीक्षकाने वरिष्ठ अधिकाऱ्यांच्या परवानगीशिवाय कुलुप व्यापाऱ्याच्या कंपनीवर छापा टाकला. अतिरिक्त पोलिस निरीक्षकाने व्यापाऱ्याचे अपहरण करून त्याला मारहाण केल्याचा आरोप आहे. एवढचं नव्हे तर व्यापाऱ्याच्या तोंडात पिस्तुल घालून धमकावले. याप्रकरणी संबंधित पोलिस निरीक्षकाला निलंबित करण्यात आले आहे. पोलीस अधिकारी या प्रकरणाच्या तपासात व्यस्त आहेत.

अतिरिक्त पोलिस निरीक्षक अजय कुमार यांनी वरिष्ठ अधिकाऱ्यांना माहिती न देता एका कुलुप व्यापाऱ्याच्या कंपनीत गेले. तिथे मोठा वाद झाला. या प्रकरणाची माहिती अलिगढ पोलिसांना दिली गेली. अलिगढ पोलिस दाखल झाल्यावर आपण अतिरिक्त पोलिस निरीक्षक असल्याची माहिती अजय कुमार यांनी दिली. यानंतर बुलंदशहर पोलिस व्यापाऱ्याला स्कॉर्पिओत घेऊन गेले. पण नंतर पोलिसांनी व्यापाऱ्याला हरदुआगंड अलिगढ पोलिस ठाण्यात सोडलं. या प्रकरणी पीडित व्यापाऱ्याने मेरठ पोलिस महानिरीक्षकांकडे (IG) तक्रार केली आहे. आयजींनी या प्रकरणी बुलंदशहर एसएसपींना चौकशीचे आदेश दिले आहेत. या चौकशीत अतिरिक्त पोलिस निरीक्षक अजय कुमार हे यांची भूमिका संशयास्पद आढळली. यानंतर एसएसपी संतोष कुमार सिंह यांनी पोलिस निरीक्षक अजय कुमार यांना निलंबित केलं.

मनीष गुप्ता हत्या : रामगढताल पोलीस हद्दीत आणखी एका तरुणाचा मारहाणीनंतर मृत्यू

अलिगढच्या अभिषेक तिवारीविरोधात १६ सप्टेंबरला राजीव कुमार नावाच्या व्यक्तीने बुलंदशहर सिटी कोतवाली पोलिस ठाण्यात ६.६० लाख रुपयांचा चेक बाऊन्सचा गुन्हा दाखल केला होता. या प्रकरणात वरिष्ठ अधिकाऱ्यांच्या परवानगीशिवाय अतिरिक्त निरीक्षक अजय कुमार अलिगढ येथे अटकेसाठी गेले होते. चेक बाऊन्स झाल्यास पोलिस अटक करू शकत नाहीत. तरीही अतिरिक्त निरीक्षक अटकेसाठी गेले. त्यामुळे निरीक्षकाची भूमिका संशयास्पद मानली जात आहे. अलिगढ हरदुआगंज पोलीस ठाण्यात निरीक्षक अजय कुमार यांच्यासह तिघांविरुद्ध गुन्हा दाखल करण्यात आला आहे, असं एसएसपी म्हणाले.

Manish Gupta Murder Case: यूपीत व्यापाऱ्यांमध्ये असंतोष; योगींनी घेतली पीडित कुटुंबाची भेट