करो या मरो सामन्यात मुंबई इंडियन्सने दाखवला जलवा, आता राजस्थानवर विजयासह या गोष्टीची सुवर्णसंधी


शारजा : महत्वाच्या सामन्यात कशी दमदार कामगिरी करायची, याचा उत्तम वस्तुपाठ आज मुंबई इंडियन्सच्या संघाने दाखवून दिला. मुंबईच्या संघाने सामन्याच्या सुरुवातीपासूनच राज्थान रॉयल्सच्या संघावर अंकुश ठेवला. त्यामुळे मुंबईला राजस्थानच्या संघाला ९० धावांत गुंडाळता आले. त्यामुळे आता या सामन्यात विजयाबरोबर मुंबई इंडियन्सला एक सुवर्णसंधी चालून आली आहे.

मुंबई इंडियन्सने आजच्या सामन्यात नाणेफेक जिंकत प्रथम गोलंदाजी करण्याचा निर्णय घेतला आणि रोहित शर्माचा हा निर्णय त्यांच्या गोलंदाजांनी योग्य असल्याचे दाखवून दिले. मुंबई इंडियन्सचा वेगवान गोलंदाज नॅथन कल्टर नाइलने यावेळी राजस्थाला पहिला धक्का दिला. राजस्थानचा यश्सवी जैस्वाल हा भन्नाट फॉर्मात होता, पण नॅथनने त्याला १२ धावांवर बाद करत राजस्थानला पहिला धक्का दिला. त्यानंतर जसप्रीत बुमरानेही यावेळी भेदक मारा करत राजस्थानचा सलामीवीर इव्हिन लुईसला बाद केले आणि मुंबईला दुसरे यश मिळवून दिले. मुंबईसाठी यावेळी सर्वात यशस्वी गोलंदाज ठरला तो जेम्स निशाम. या महत्वाच्या सामन्यात निशामला कृणाल पंड्याच्या बदली संधी देण्यात आली होती. निशामने यावेळी राजस्थानचा कर्णधार संजू सॅमसन आणि फॉर्मात असलेल्या शिवम दुबेला बाद करत मुंबई इंडियन्सला दुहेरी यश मिळवून दिले. त्यानंतर राहुल तेवातियालाही बाद केले आणि आपला तिसरा बळी मिळवला.

मुंबईने या सामन्यात राजस्थानच्या धावसंख्येला चांगलेच वेसण घातल्याचे पाहायला मिळाले. मुंबईने १०व्या षटकात राजस्थानचा अर्धा संघ गारद केला होता आणि त्यांना फक्त ५० धावाच करता आल्या होत्या. मुंबईच्या गोलंदाजांनी कमी धावांमध्ये राजस्थानच्या संघाला गुंडाळले. त्यामुळे आता मुंबई इंडियन्सच्या संघाला विजयाची आशा निर्माण झाली आहे. त्याचबरोबर मुंबईच्या संघाला आता एक सुवर्णसंधीही आहे. कारण मुंबई इंडियन्सने हा सामना कमी षटकांमध्ये जिंकला तर त्यांचा रनरेट चांगलाच वाढू शकतो आणि याचा फायदा त्यांना प्ले-ऑफमध्ये पोहोचण्यासाठी होऊ शकतो. त्यामुळे मुंबईचा संघ हा सामना किती षटकांमध्ये जिंकतो, याकडे सर्वांचेच लक्ष आता लागलेले असेल.



Source link

Leave a Reply

Your email address will not be published.

%d bloggers like this: