Mumbai Rave Party Raid: नवाब मलिक यांचा NCBवर गंभीर आरोप; उद्या मोठा गौप्यस्फोट करणार!

मुंबई: मुंबईजवळ क्रूझवरील ड्रग्ज पार्टी नार्कोटिक्स कंट्रोल ब्युरोने उधळली होती. या कारवाईत अभिनेता शाहरुख खान याचा मुलगा आर्यन खान व अन्य आरोपींना अटक करण्यात आली आहे. ही संपूर्ण कारवाईच फेक असल्याचा दावा केल्यानंतर राज्याचे अल्पसंख्याक मंत्री व राष्ट्रवादी काँग्रेसचे प्रवक्ते नवाब मलिक आता नवा गौप्यस्फोट करणार आहेत. उद्या (शनिवारी) दुपारी १२ वाजता मलिक हे मुंबईतील राष्ट्रवादी भवन येथे पत्रकार परिषद घेणार आहेत. ( Mumbai Rave Party Raid Update )

वाचा: आर्यन खानला १४ दिवसांची न्यायालयीन कोठडी; NCBची ‘ती’ विनंती कोर्टाने फेटाळली

नवाब मलिक यांची पत्रकार परिषद शुक्रवारी होईल, असे आधी राष्ट्रवादी काँग्रेसकडून सांगण्यात आले होते. मात्र, मलिक यांनी नंतर ट्वीट करत ही पत्रकार परिषद शुक्रवार ऐवजी शनिवारी (९ ऑक्टोबर) होणार असल्याचे सांगितले आहे. नार्कोटिक्स कंट्रोल ब्युरोच्या कारवायांबाबत मला आणखी पोलखोल करायची आहे. त्यासाठी मी माहिती गोळा करत असून थोडा आणखी वेळ लागणार आहे. म्हणून पत्रकार परिषद आता शनिवारी होईल, असे मलिक यांनी नमूद केले आहे. त्याआधी माध्यमांशी बोलताना मलिक यांनी पुन्हा एकदा एनसीबीवर गंभीर आरोप केला.

सेलिब्रिटींच्या अटका पब्लिसिटीसाठी

महाराष्ट्राला, महाराष्ट्र सरकारला बदनाम करण्याचं तसेच बॉलीवूडमधील स्टार कलाकारांना लक्ष्य करून पूर्ण फिल्म इंडस्ट्रीला बदनाम करण्याचं मोठं षडयंत्र एनसीबीला हाताशी धरून रचलं गेलं आहे. गेल्या एका वर्षात अभिनेत्री रिया चक्रवर्ती, भारती सिंग, अर्जुन रामपाल, दीपिका पदुकोण, आर्यन खान यांच्यावर केलेली कारवाई केवळ पब्लिसिटीसाठी होती. याच्या मुळाशी गेल्यास धक्कादायक माहिती पुढे येऊ शकते. याआडून खंडणीवसुलीचे काम केले जात आहे. मुंबईत फिल्म इंडस्ट्री आणि अन्य क्षेत्रातील बड्या व्यक्तींच्या मागे या यंत्रणा लावण्यात आल्या आहेत. त्यांना भीती घालण्यासाठी खासगी लोकांना हाताशी धरले गेले आहे. फ्रॉड आणि प्रायव्हेट डीटेक्टिव्ह असलेल्या व्यक्ती यात सामील आहेत. त्यांच्या माध्यमातून बदनामी करून लोकांना घाबरवून खंडणी वसुल केली जात आहे, असा गंभीर आरोप नवाब मलिक यांनी केला. एनसीबीचं मुंबईतील नेटवर्क आणि खंडणीखोर यांनी संगनमताने चालवलेलं खंडणीचं रॅकेट मी उघड करणार आहे, असा इशाराही मलिक यांनी दिला.

भानुशालीवर पुन्हा आरोप

मनीष भानुशाली हा भाजपचा हायप्रोफाइल नेता आहे. तो काही छोटा कार्यकर्ता नाही. भानुशालीचा पंतप्रधानांसोबत फोटो आहे. गृहमंत्री अमित शहा, भाजपाध्यक्ष जे. पी. नड्डा यांच्यासोबतही त्याचे फोटो आहेत. अनेक केंद्रीय मंत्री, गुजरातमधील मंत्री, महाराष्ट्राचे माजी मुख्यमंत्री देवेंद्र फडणवीस, भाजप नेते आशिष शेलार यांच्यासोबतही हा भानुशाली वावरताना दिसतो आहे. अशा व्यक्तींचा या रॅकेटमध्ये सहभाग असून त्याचा पर्दाफाश मी करणार असल्याचे मलिक यांनी सांगितले. याआधी मलिक यांनी बुधवारी पत्रकार परिषद घेऊन क्रूझवरील पार्टीवर एनसीबीने केलेली कारवाई फेक असल्याचा आरोप केला होता. या कारवाईत कोणतेही ड्रग्ज जप्त करण्यात आले नाही, असा दावा करताना एनसीबी अधिकाऱ्यांसोबत कारवाईदरम्यान खासगी व्यक्ती का होत्या, असा सवाल मलिक यांनी केला होता. मलिक यांचे हे सर्व आरोप एनसीबीने पत्रकार परिषद घेऊन फेटाळलेले आहेत.

वाचा: ड्रग्ज पार्टी: मंत्री नवाब मलिक यांचा ‘तो’ आरोप एनसीबीने फेटाळला