विराट कोहली झाला हैदराबादच्या ‘स्पीड किंग’चा फॅन; सामन्यानंतर दिलं खास गिफ्ट


अबुधाबी : इंडियन प्रीमियर लीग (IPL 2021) च्या शेवटच्या फेरीत एका युवा गोलंदाजानं आयपीएलमध्ये पदार्पण केलं आणि त्याने आपल्या वेगवान गोलंदाजीमुळे क्रिकेट विश्वात वादळ निर्माण केलं आहे. याच गोलंदाजाने आयपीएल २०२१ चा सर्वात वेगवान चेंडू टाकला आहे. सनरायझर्स हैदराबादच्या या गोलंदाजाचं नाव आहे उमरान मलिक. बुधवारी (६ ऑक्टोबर) रॉयल चॅलेंजरविरुद्धच्या सामन्यात उमरान मलिकने मोसमातील सर्वात वेगवान चेंडू टाकण्याचा विक्रम केला. त्याने १५३ किमी प्रतितास वेगाने चेंडू फेकला. आरसीबी आणि टीम इंडियाचा कर्णधार विराट कोहली मलिकच्या कामगिरीने खूप प्रभावित झाले आहेत. सामन्यानंतर त्याने उमरानला एक खास भेट दिली.

वाचा- मुंबई इंडियन्ससाठी मोठी बातमी; प्ले ऑफमध्ये पोहोचण्यासाठीचे ठरले नवे समीकरण

जम्मू -काश्मीरचा वेगवान गोलंदाज उमरान मलिकने आयपीएलमध्ये आतापर्यंत फक्त दोनच सामने खेळले आहेत. सामन्यानंतर कर्णधार विराट कोहलीने उमरानचे कौतुक केले. विराट म्हणाला, “ही स्पर्धा दरवर्षी नवीन प्रतिभावान खेळाडूंना समोर आणते. उमरानला १५० पेक्षा अधिक वेगाने गोलंदाजी करताना पाहून बरे वाटले. वेगवान गोलंदाजांनी भारतीय क्रिकेटसाठी नेहमीच चांगले संकेत दिले आहेत.

वाचा- कोलकाता विरुद्ध राजस्थान; मुंबई इंडियन्स आव्हान ठरवणारी लढत

वाचा- मी राजीनामा देतोय, टी-२० वर्ल्डकपनंतर भारतीय संघासोबत असणार नाही

उमरान बनला स्पीड किंग
आरसीबीच्या डावाच्या दरम्यान नवव्या षटकात उमरान मलिकने १४७, १५०, १५१.९ आणि १५३ किलोमीटर प्रतितास वेगाने गोलंदाजी केली. मलिकने आपल्या वेगाने सर्वांना आश्चर्यचकित केले. सामन्यानंतर जम्मू -काश्मीरच्या या वेगवान गोलंदाजाने विराट कोहलीचा ऑटोग्राफ घेतला. उमरानने हैदराबादच्या विजयात महत्वाची भूमिका बजावली आणि चार षटकांत २१ धावा देऊन एक विकेटही घेतली. विराट कोहलीने त्याचा आनंद द्विगुणित केला. कोहलीने सामन्यानंतर ऑटोग्राफ केलेली जर्सी उमरानला दिली.

विल्यमसनने केलं कौतुक
सामन्यानंतर हैदराबादचा कर्णधार केन विल्यमसननेही उम्रान मलिकचे कौतुक केले. तो म्हणाला, उमरान नक्कीच खास आहे. आम्ही त्याला नेटमध्ये सराव करताना पाहिले. तो संथ खेळपट्ट्यांवरही खूप प्रभावी असल्याचे सिद्ध होत आहे. उमरानच्या आधी आयपीएल २०२१ मध्ये सर्वात वेगवान चेंडू टाकण्याचा विक्रम कोलकाता नाइट रायडर्स (केकेआर) च्या लॉकी फर्ग्युसनच्या नावावर होता. फर्ग्युसनने १५२.७५ किमी प्रतितास वेगाने चेंडू टाकला. हा विक्रम उमरान मलिकने आता आपल्या नावावर केला आहे. त्याच्या आयपीएल पदार्पण सामन्यात उमरानने १४६ किमी प्रतितास वेगाने चेंडू टाकला. या सामन्यातच त्याला आयपीएल २०२१ मधील सर्वात वेगवान गोलंदाजांच्या टॉप-१० यादीत समाविष्ट करण्यात आले. या यादीत समाविष्ट होणारा उमरान हा पहिला भारतीय गोलंदाज ठरला.



Source link

Leave a Reply

Your email address will not be published.

%d bloggers like this: