बलात्कार, हत्येच्या गुन्ह्यात तुरुंगात काढली ३७ वर्षे; डीएनए चाचणीमुळे ठरला निर्दोष!


वॉशिंग्टन: एका व्यक्तिला हत्या आणि बलात्काराच्या गुन्ह्याखाली तब्बल ३७ वर्षे तुरुंगात काढवी लागली. ऐन उमेदीची ३७ वर्षे कारावासात काढल्यानंतर दाखल करण्यात आलेल्या गुन्ह्यात दुसराच दोषी असल्याचे समोर आले. आता निर्दोष मुक्तता झालेल्या व्यक्तीने पोलीस अधिकारी आणि न्यायवैद्यक प्रयोगशाळेच्या दंतवैद्यकाविरोधात खटला दाखल केला आहे. अमेरिकेत ही घटना समोर आली आहे.

सध्या ५६ वर्षांचे असणारे रॉबर्ट डुबोइस यांना १९८३ मध्ये बारबरा ग्राम्स या महिलेची हत्या आणि बलात्काराच्या आरोपाखाली अटक करण्यात आली होती. कोर्टाने त्यांना जन्मठेपेची शिक्षा सुनावली. शिक्षेची सुनावणी झाल्यानंतर डुबोइस यांना मृत्यूदंडाची शिक्षा सुनावण्यात आलेल्या कैद्यांसोबत ठेवण्यात आले होते.

मागील वर्षी या प्रकरणात नवीन डीएनए पुरावे तपासण्यात आले. यामध्ये बारबरा ग्राम्सची हत्या रॉबर्ट डुबोइसने केली नसल्याचे समोर आले. त्यानंतर वर्ष २०२० मध्ये रॉबर्ट डुबोइसची सुटका करण्यात आली होती. सन १९८३ च्या दरम्यान खटल्याचा तपास सुरू असताना पोलीस अधिकारी आणि न्यायवैद्यक प्रयोगशाळेच्या डॉक्टरांना पुराव्यांसोबत छेडछाड करून रॉबर्टला गुन्ह्यात फसवले असल्याचा आरोप आहे.

‘द टॅम्पा बे टाइम्स’ने दिलेल्या वृत्तानुसार, रॉबर्टने फेडरल कोर्टात तीन माजी गुप्तहेर, एक माजी पोलीस सार्जंट आणि एक न्यायवैद्यक प्रयोगशाळेतील दंतवैद्यकाविरोधात खटला दाखल केला आहे. या सर्वांनी रॉबर्टला ग्राम्सची हत्या आणि बलात्काराच्या प्रकरणात खोट्या पुराव्यांच्या आधारे फसवले असल्याचे म्हटले आहे.

बारबरा ग्राम्सचा मृतदेह १९ ऑगस्ट १९८३ रोजी टेम्पोमध्ये न्यायवैद्यकाच्या कार्यालयाच्या बाहेरील यॉर्डमध्ये आढळला होता. १९ वर्षांच्या ग्राम्सवर बलात्कार करण्यात आला. त्यानंतर तिला मारहाण करून हत्या करण्यात आल्याचे तपासात समोर आले. बारबरा ग्राम्सच्या गळ्यावर चावल्याचे वण्र दिसून आले. त्यानंतर पोलिसांनी त्याच्या आधारे रॉबर्ट डुबोइसच्या दातांचा आकार ग्राम्सच्या मानेजवळील आढळलेल्या वण्राशी आढळत असल्याचे पोलिसांनी सांगितले.

कोर्टाने या पुराव्याच्या आधारे रॉबर्टला दोषी ठरवले होते. तपासकर्त्या अधिकाऱ्यांनी घटनेच्या वेळी पीडित मृत महिलेचे डीएनए नमुने जपून ठेवले होते. त्यानंतर पुन्हा कोर्टाच्या आदेशानुसार २०२० मध्ये या डीएनएची चाचणी करण्यात आली. या चाचणीत हे नमुने आणि रॉबर्ट डुबोइस याचे ते नमुने नसल्याचे समोर आले.

नुकसान भरपाईसाठी विधानसभेत विधेयक

फ्लोरिडाच्या विधानसभेत नुकसानभरपाईसाठी एक विधेयक सादर केले जाणार आहे. या विधेयकाला मंजुरी मिळाल्यास डुबोइस यांना चुकीच्या कारणाने तुरुंगात कैद केल्याप्रकरणी नुकसानभरपाई म्हणून १.८५ दशलक्ष डॉलर इतकी रक्कम मिळू शकते.



Source link

Live Sachcha Dost TV

Leave a Reply

Your email address will not be published. Required fields are marked *

%d bloggers like this: