‘महाराष्ट्राला आता शमीच्या झाडावरील शस्त्रे काढावीच लागतील’


हायलाइट्स:

  • शिवसेनेच्या दसरा मेळाव्याकडं राजकीय वर्तुळाचं लक्ष
  • ‘सामना’तून भाजप व मोदी सरकारवर हल्लाबोल
  • भाजपची अवस्था मेंढरासारखी झालीय – शिवसेना

मुंबई: ‘महाराष्ट्रातील सरकार नीट चालू नये म्हणून दिल्लीश्वरांनी मोठा खटाटोप आणि आटापिटा चालवला आहे. खोटेपणाची सर्व आयुधे वापरून सरकारच्या पाठीत घाव घालण्याची एकही संधी राजकीय विरोधकांनी सोडली नाही. त्या सगळ्यांना चोख उत्तर देण्यासाठी महाराष्ट्राला शमीच्या झाडावरील शस्त्र आता काढावीच लागतील,’ असा इशारा शिवसेनेनं दिला आहे. (Shiv Sena Targets BJP in Saamana Editorial)

दसऱ्याच्या निमित्तानं शिवसेनेचा परंपरागत दसरा मेळावा (Shiv Sena’s Dussehra Rally) आज मुंबईत होत आहे. राज्यात शिवसेनेचा मुख्यमंत्री झाल्यानंतरचा हा दुसरा मेळावा आहे. मुख्यमंत्री उद्धव ठाकरे (Uddhav Thackeray) दसरा मेळाव्यात काय बोलणार याकडं सर्वांचं लक्ष लागलं आहे. शिवसेनेचं मुखपत्र ‘सामना’तून याबाबतचे जणू संकेतच देण्यात आले आहेत. आजच्या अग्रलेखातून शिवसेनेनं भाजपवर व केंद्र सरकारवर जोरदार हल्ला चढवला आहे. ‘राज्यात महाविकास आघाडीचं सरकार आल्यापासून आणि शिवसेनेचा मुख्यमंत्री झाल्यापासून कळपात वाघ शिरल्यावर मेंढरांची जशी अवस्था होते तशी अवस्था भाजपची झाली आहे,’ अशी बोचरी टीका शिवसेनेनं केली आहे. ‘महाराष्ट्राला कमजोर करायचं, महाराष्ट्राचा स्वाभिमान, अभिमान मोडून काढायचा हे दिल्लीचं धोरणच आहे, पण या बेईमान धोरणाची पालखी वाहणारे सूर्याजी पिसाळ आजही महाराष्ट्रात निपजत आहेत व महाराष्ट्राला याच दुश्मनांपासून सगळ्यात जास्त धोका आहे,’ असं शिवसेनेनं म्हटलं आहे.

वाचा: भारतीय संस्कृतीवर सामूहिक हल्ले करण्याचे प्रयत्न सुरू – मोहन भागवत

‘महाराष्ट्रातील महाविकास आघाडीनं एकजुटीची ताकद दाखवली आहे. महाविकास आघाडीत शिवसेनेसारखा हिंदुत्वाचा पाठीराखा पक्ष सामील झाल्यानं भाजपचा बुरखाच फाटला आहे. शिवसेनेचे विचार व शिवसेनेच्या भीतीनं ते भुई थोपटत सुटले आहेत. एरवी मराठी माणसाला पाण्यात पाहणारे, मराठी माणसाच्या बाबतीत शत्रुत्वाची भूमिका घेणारे, बेळगावात मराठी माणूस हरला म्हणून महाराष्ट्रात पेढे वाटणारे हे ढोंगी आज मुंबईत ‘मराठी कट्टे’ सजवीत आहेत. मुंबई महापालिकेच्या निवडणुकीसाठी सुरू असलेल्या या ढोंगबाजीचा मुखवटाही मराठी माणूस ओरबाडून काढल्याशिवाय राहणार नाही. शिवसेना हा एक ज्वलंत विचार आहे. सदैव उसळणारा ज्वालामुखीच आहे. शिवसेनेमुळं राजकीय विरोधकांची झोप उडाली असून त्यांना मोगलांच्या घोड्याप्रमाणे जळी-स्थळी शिवसेनाच दिसू लागली आहे. या मंडळींची कींव करावीशी वाटते,’ असा टोलाही शिवसेनेनं हाणला आहे.

संपूर्ण देश बंदिवान बनवला गेलाय!

‘केंद्रातलं भाजप सरकार आझादीचा अमृत महोत्सव साजरा करीत आहे. पण देशात बोलण्याचं, लिहिण्याचं स्वातंत्र्य आज खरंच उरलं आहे का? जे सरकारला प्रश्न विचारतात, खडे बोल सुनावतात त्यांच्यावर सीबीआय, ईडी, एनसीबी, आयकर खात्याच्या धाडी घालून दहशत निर्माण केली जाते. खोटे गुन्हे दाखल करून रावणी राज्याची पताकाच फडकवली जाते. याला काय स्वातंत्र्य म्हणायचे? शेतकऱ्यांना त्यांचे हक्क मागण्याचे स्वातंत्र्य नाही. आपले न्याय्य हक्क लोकशाही मार्गानं मागणाऱ्या शेतकऱ्यांना मंत्रीपुत्र कारखाली चिरडून मारतात. या गुन्हेगारांना अटक करा, अशी मागणी करण्याचं स्वातंत्र्य राजकीय पक्षांना नाही. बेरोजगारांना काम करण्याचं स्वातंत्र्य नाही. विद्यापीठांत मोकळेपणानं बोलण्याचं स्वातंत्र्य नाही. संपूर्ण देश जणू बंदिवान बनवला आहे. बेड्यांत जखडून टाकला आहे. कसली आहे आझादी? कसलं स्वातंत्र्य उरलं आहे? त्यामुळं आझादीचा अमृत महोत्सव साजरा करण्याचं ढोंग करू नका,’ असं शिवसेनेनं केंद्र सरकारला सुनावलं आहे.

वाचा: …तर मी मुख्यमंत्री झालो असतो; छगन भुजबळ यांचा गौप्यस्फोट



Source link

Leave a Reply

Your email address will not be published. Required fields are marked *

%d bloggers like this: