मध्य रेल्वेवरील लोकलप्रवास नववर्षात होणार सुखकर


म. टा. प्रतिनिधी, मुंबई

मध्य रेल्वेच्या लाखो प्रवाशांचा दैनंदिन लोकल प्रवास नव्या वर्षात अधिक सुखकर होणार आहे. ठाणे-दिवादरम्यान मेल-एक्स्प्रेस आणि लोकलसाठी स्वतंत्र मार्ग खुला करण्यासाठी नव्या वर्षाचा मुहूर्त ठरवण्यात आला आहे. हा मार्ग उपलब्ध झाल्यानंतर ८०-१०० लोकलफेऱ्या वाढवण्याचा पर्याय उपलब्ध होईल.

मध्य रेल्वेवरील लोकलफेऱ्यांच्या विस्तारामधील प्रमुख अडथळा म्हणजे ठाणे-दिव्यादरम्यानच्या पाचव्या-सहाव्या मार्गिकेची अनुपलब्धता. मार्ग नसल्याने जादा फेऱ्या चालवणे शक्य नसल्याचे मध्य रेल्वेकडून वारंवार सांगण्यात येते. आता हा अडथळा कायमस्वरूपी दूर होणार आहे.

नवीन रेल्वे मार्गाला जुन्या रेल्वे रुळांची जोडणी देण्याची आणि यार्ड जोडणीची कामे सध्या बाकी आहेत. ठाणे आणि दिवा या दोन्ही ठिकाणी ही जोडणी द्यावी लागणार आहे. तांत्रिक काम अचूक पद्धतीने पूर्ण व्हावे, यासाठी अनुभवी ज्येष्ठ अधिकाऱ्यांची जादा कुमक तैनात करण्यात आली आहे, असे मुंबई रेल्वे विकास महामंडळाच्या (एमआरव्हीसी) वरिष्ठ अधिकाऱ्यांनी सांगितले.

‘एमआरव्हीसीकडून प्रकल्पाचे काम पूर्ण करण्यात येईल. मात्र, लोकलफेऱ्या किती वाढणार, त्या साध्या असतील की वातानुकूलित, यांचा निर्णय मध्य रेल्वेने घ्यायचा आहे, असे रेल्वे अधिकाऱ्यांनी सांगितले. जानेवारीत प्रकल्प पूर्ण झाल्यानंतर टप्प्याटप्याने लोकल फेऱ्या वाढविण्यात येणार आहेत. विनावातानुकूलित एका लोकलगाडीच्या साधारण १०-१२ फेऱ्या होतात. यामुळे एकाचवेळी फेऱ्या वाढवण्याऐवजी प्रवासी मागणी लक्षात घेऊन आवश्यक त्या ठिकाणी वाढीव लोकल चालविण्यात येतील, असे मध्य रेल्वेच्या अधिकाऱ्यांनी स्पष्ट केले.

अडथळ्यांची शर्यत

२००८मध्ये हा प्रकल्प कागदावर मंजूर झाला. अतिक्रमण, खारफुटी, परवानगी या अडथळ्यांची शर्यत पार करत या प्रकल्पाचे काम आता जानेवारी २०२२मध्ये पूर्ण होणार आहे. २००८ मध्ये प्रकल्पखर्च १३० कोटी होता. प्रकल्प पूर्ण होईपर्यंत खर्चाने ५४० कोटीपर्यंत उड्डाण केले असल्याची माहिती एमआरव्हीसीने दिली.

ठाणे-दिवादरम्यानची पाचवी आणि सहावी मार्गिका नववर्षाच्या मुहूर्तावर अर्थात जानेवारी २०२२ मध्ये खुला करण्यात येणार आहे. तांत्रिक कामे वगळता अन्य कामे पूर्ण झाल्याने प्रवाशांचा नव्या वर्षात सुखकर प्रवास शक्य होईल.

– रवी अग्रवाल, अध्यक्ष आणि व्यवस्थापकीय संचालक, मुंबई रेल्वे विकास महामंडळ



Source link

Leave a Reply

Your email address will not be published. Required fields are marked *

%d bloggers like this: