‘दसरा मेळाव्यात बाळासाहेबांचं भाषण म्हणजे पर्वणी असायची, आता…’


हायलाइट्स:

  • शिवसेनेच्या दसरा मेळाव्यातील भाषणाचे राजकीय वर्तुळात पडसाद
  • भाजपनंतर आता मनसेची मुख्यमंत्र्यांच्या भाषणावर टीका
  • संदीप देशपांडे यांनी केलं खोचक ट्वीट

मुंबई: शिवसेनेच्या दसरा मेळाव्यात मुख्यमंत्री उद्धव ठाकरे यांनी केलेल्या भाषणाचे तीव्र पडसाद राजकीय वर्तुळात उमटत आहेत. राज्यातील मुख्य विरोधी पक्ष असलेल्या भाजपनं उद्धव ठाकरे यांच्या भाषणावर शेलक्या शब्दांत टीका केली आहे. महाराष्ट्र नवनिर्माण सेनेनंही मुख्यमंत्र्यांच्या भाषणाची खिल्ली उडवली आहे. (MNS on Shiv Sena’ Dussehra Rally)

प्रथेप्रमाणे शिवसेनेचा दसरा मेळावा काल मुंबईत पार पडला. राज्यातील सध्याची राजकीय परिस्थिती, सत्ताधारी महाविकास आघाडीच्या मागे लागलेला केंद्रीय तपास यंत्रणांचा ससेमिरा व सरकार पाडण्यासाठी होत असलेल्या कथित प्रयत्नांच्या पार्श्वभूमीवर उद्धव ठाकरे यांचं भाषण झालं. अपेक्षेप्रमाणे त्यांनी विरोधी पक्ष भाजपवर सडकून टीका केली. भाजपच्या हिंदुत्वावरही प्रश्नचिन्ह उपस्थित केलं. तसंच, हिंमत असेल तर अंगावर या असं थेट आव्हानही दिलं. त्यांच्या या भाषणावर विरोधी पक्षनेते देवेंद्र फडणवीस, भाजपचे आमदार आशिष शेलार यांनी जोरदार टीका केली आहे. ‘शिवसेनेच्या दसरा मेळाव्यात फक्त विचार काहीच नव्हता, फक्त गरळ ओकली गेली,’ अशी बोचरी टीका फडणवीसांनी केली आहे. उद्धव ठाकरे यांना मुख्यमंत्री बनायचंच होतं, आता ते वेगळं सांगताहेत. स्वत:च्या महत्त्वाकांक्षेला तत्त्वज्ञानाची जोड देताहेत, असा टोलाही फडणवीसांनी हाणला आहे. तर, मुख्यमंत्र्यांच्या तोंडी तुकडे-तुकडे गँगची भाषा होती, असं आशिष शेलार यांनी म्हटलं होतं.

वाचा: मनोहर जोशी प्रकरणाची पुनरावृत्ती टाळण्यासाठी रामदास कदमांची दसरा मेळाव्याकडे पाठ?

भाजपनंतर आता मनसेचे सरचिटणीस संदीप देशपांडे (Sandeep Deshpande) यांनी ट्वीटरच्या माध्यमातून मुख्यमंत्र्यांच्या भाषणावर टीका केली आहे. ‘एके काळी दसरा मेळाव्याच्या दिवशी हिंदुहृदयसम्राट बाळासाहेब ठाकरे यांचं भाषण म्हणजे पर्वणी असायची. आता मात्र सगळंच अळणी. गरम पाण्याच्या नावाखाली नुसतंच कोमट पाणी,’ असा खोचक टोला देशपांडे यांनी हाणला आहे.
वाचा: ब्राझीलमधील दुष्काळाचा भारताला होऊ शकतो ‘असा’ फायदा



Source link

Leave a Reply

Your email address will not be published. Required fields are marked *

%d bloggers like this: