ब्राझीलमधील दुष्काळाचा भारताला होऊ शकतो ‘असा’ फायदा


हायलाइट्स:

  • दुष्काळामुळं ब्राझीलमध्ये साखर उत्पादन घटणार
  • भारतीय साखर उद्योगाला आहे मोठी संधी
  • सहकार तज्ज्ञ शंकरराव कोल्हे यांचं मत

अहमदनगर: ‘जगातील साखरेचे कोठार म्हणून ओळखल्या जाणाऱ्या ब्राझीलमध्ये यावर्षी दुष्काळ पडल्याने साखर उत्पादन कमी होणार आहे. अशा परिस्थितीत भारतातील साखर उद्योगाला (Indian Sugar Industry) चांगली संधी मिळाली आहे,’ असे भाकीत सहकारातील ज्येष्ठ नेते, माजी मंत्री शंकरराव कोल्हे (Shankarrao Kolhe) यांनी केले. ‘ब्राझीलमध्ये उत्पादनानुरूप धोरण ठरविले जाते, त्याचप्रमाणे आपल्याकडे साखर व इथेनॉल उत्पादनांला सुसंगत ठरतील अशी धोरणे तात्काळ ठरवून साखर उद्योग व त्यावर अवलंबून असणारी व्यवस्था टिकवावी,’ असे आवाहनही त्यांनी केले.

वाचा: मनोहर जोशी प्रकरणाची पुनरावृत्ती टाळण्यासाठी रामदास कदमांची दसरा मेळाव्याकडे पाठ?

कोपरगावमध्ये बोलताना कोल्हे म्हणाले, ‘राज्यात १८१ साखर कारखाने आहेत. त्यापैकी फक्त २५ साखर कारखाने सुस्थितीत आहेत. अन्य कारखान्यांची स्थिती हलाखीची आहे. दिवसेंदिवस साखर साठवणुकीचा प्रति पोते खर्च वाढत आहे. व्याजाचे ओझे वाढत आहे. ब्राझीलमध्ये १७ टक्के साखर उतारा मिळतो. त्यामुळे तेथे साखर उद्योगातील खर्चाचा ताळमेळ बसतो, महाराष्ट्र राज्यातील शेतकऱ्यांनीसुद्धा जादा साखर उतारा देणाऱ्या उसाच्या जातींची लागवड करावी. अत्याधुनिक तंत्रज्ञानाने कमी मनुष्यबळात साखर कारखाने चालविण्याचे तंत्र अवगत केले पाहिजे. उपपदार्थ, औषध, बायोगॅस निर्मितीवर भर द्यावा, तरच भविष्यात हा उद्योग तग धरू शकेल. आम्ही खासगीशी दोन हात केले, पण आता पुन्हा खासगीचेच आव्हान सहकारी साखर कारखानदारी समोर उभे राहिले आहे. सभासद, कामगार, व्यवस्थापन, त्यावर अवलंबून असणाऱ्या घटकांचा विचार करत आम्ही सहकारी साखर कारखानदारी चालविली. आता डिझेलच्या किंमती वाढल्या आहेत. त्यामुळे दूरवरून ऊस आणणे महागात पडणार आहे. कारखान्यांत तयार झालेले साखर पोते १८० दिवस सांभाळायचे म्हटले तर प्रती पोत्यावर ३६० रुपयांचा व्याजाचा भुर्दंड साखर कारखानदारांना सोसावा लागतो तर दुसरीकडे एफआरपी तुकडे करून देता येत नाहीत. आपल्याकडे एका कारखान्यांत एक ते दीड हजार कामगार काम करतात, तर परदेशात कमी कामगारांत साखर उद्योग चालविला जातो. कारखान्यांनी उपपदार्थ निर्मिती करून भारताच्या आत्मनिर्भर अभियानाला बळ द्यावे, तरच हा उद्योग टिकून राहील. केंद्र सरकार मदत करीत आहे, राज्य सरकारनेही मदत केली पाहिजे,’ असेही कोल्हे म्हणाले.

वाचा: राज ठाकरेंना पक्षातून बाहेर का जावं लागलं?; मुख्यमंत्रीपदावरुन फडणवीसांचा सवाल



Source link

Leave a Reply

Your email address will not be published. Required fields are marked *

%d bloggers like this: