निवडणूक कामात टाळाटाळ करणाऱ्यांवर होणार फौजदारी कारवाई – निवडणूक निर्णय अधिकारी सचिन इथापे

निवडणूक कामात टाळाटाळ करणाऱ्यांवर होणार फौजदारी कारवाई -निवडणूक निर्णय अधिकारी सचिन इथापे

पंढरपूर /ज्ञानप्रवाह न्यूज,दि.13 :- सार्वत्रिक विधानसभा निवडणूक २०२४ च्या अनुषंगाने पंढरपूर विधानसभा मतदारसंघात 20 नोव्हेंबर रोजी मतदान प्रक्रिया पार पडणार आहे तसेच 23 नोव्हेंबर रोजी मतमोजणी होणार आहे.या निवडणूक कामकाजाकरिता विविध आस्थापनांच्या मनुष्यबळाची नियुक्ती केली आहे.निवडणूक नियुक्त जे अधिकारी, कर्मचारी निवडणूक प्रशिक्षणास गैरहजर राहतील अथवा निवडणुकीच्या कामात हयगय करतील अशांवर लोकप्रतिनिधित्व अधिनियम 1951 अंतर्गत फौजदारी कारवाई करण्यात येणार असल्याचे निवडणूक निर्णय अधिकारी सचिन इथापे यांनी सांगितले आहे.

पंढरपूर विधानसभा मतदारसंघातील निवडणूक प्रक्रिया सुरळीत पार पाडण्यासाठी मोठ्या प्रमाणात मनुष्यबळाची आवश्यकता असल्याने मतदारसंघात आवश्यक अधिकारी, कर्मचारी यांची नियुक्ती केली आहे. निवडणुकीचे काम हे राष्ट्रीय कर्तव्य असून अशा प्रकारे जे कर्मचारी निवडणुकीसाठी त्यांना प्राप्त झालेले आदेश नाकारतील, निवडणूक प्रशिक्षणास गैरहजर राहतील अथवा निवडणुकीच्या कामात हयगय करतील त्यांच्यावर लोकप्रतिनिधीत्व अधिनियम 1951 अंतर्गत थेट फौजदारी कारवाई करावी, असे निर्देश निवडणूक निर्णय अधिकारी यांना जिल्हा निवडणूक कार्यालयाकडून देण्यात आले आहेत.

पंढरपूर विधासभा मतदार संघात मतदान प्रक्रिया व्यवस्थित आणि सुलभपणे व्हावी यासाठी मतदान यंत्राची हाताळणी, मतदान प्रक्रिया यासंबंधीचे सखोल ज्ञान तसेच मतदारांची गैरसोय होवू नये यासाठी घ्यावयाची काळजी आणि सर्व बाबींचे प्रशिक्षण संबंधित अधिकारी- कर्मचारी यांना देण्यात येत आहे. या प्रशिक्षणास गैरहजर राहिलेल्या अधिकारी व कर्मचाऱ्यांवर लोकप्रतिनिधित्व अधिनियम 1951 अंतर्गत फौजदारी कारवाई करण्यात येईल. तसेच संबधितांवर गुन्हा दाखल करुन खाते अंतर्गत चौकशी लावण्यात येईल. त्यामुळे अशा अधिकारी व कर्मचाऱ्यांनी याबाबत नोंद घेऊन तत्काळ निवडणूक कर्तव्यावर हजर व्हावे,असे आवाहनही निवडणूक निर्णय अधिकारी सचिन इथापे यांनी केले आहे.