UP Elections: पंतप्रधान मोदींनी उद्घाटन केलेल्या वैद्यकीय महाविद्यालयांची सद्यस्थितीही जाणून घ्या… .


आगामी वर्षात उत्तर प्रदेशसहीत पाच राज्यांच्या निवडणुकांची तयारी सुरू झालीय. राजकीयदृष्ट्या महत्त्वाच्या असलेल्या उत्तर प्रदेशात सर्वच पक्ष आपापल्या परीनं जोमानं कामाला लागले आहेत. राज्यातील आणि केंद्रातील सत्ताधारी भाजपचे नेतेही यासाठी झटून कामाला लागलेत. याच पार्श्वभूमीवर पंतप्रधान नरेंद्र मोदी यांनी गेल्या सोमवारी उत्तर प्रदेशच्या सिद्धार्थनगरहून राज्यातील तब्बल नऊ नव्या वैद्यकीय महाविद्यालयांचं उद्घाटन केलं. मात्र, पंतप्रधानांनी उद्घाटन केलेल्या या वैद्यकीय महाविद्यालयांची कामं समोर आल्यानंतर मात्र नागरिकांना आणि विद्यार्थ्यांना धक्का बसलाय. सिद्धार्थनगरसहीत एटा, हरदोई, प्रतापगड, फतेहपूर, देवरिया, गाझीपूर, मिर्झापूर आणि जौनपूर इथं ही वैद्यकीय महाविद्यालये उभारण्यात आली आहेत. अतिरिक्त मुख्य सचिव नवनीत सहगल यांनी दिलेल्या माहितीनुसार, सर्व वैद्यकीय महाविद्यालयांत ‘नॅशनल मेडिकल कमिशन’नं निश्चित केलेल्या मानकांनुसार, ३०० बेड असतील हे सुनिश्चित करण्यात आलंय. मात्र, या निर्माणाधीन महाविद्यालयांची सद्यस्थिती वेगळंच सांगतेय….

​मिर्झापूर वैद्यकीय महाविद्यालय

मिर्झापूरमध्ये ‘माँ विंध्यवासिनी स्वशासी राज्य वैद्यकीय महाविद्यालय’ नावानं वैद्यकीय महाविद्यालय उभारण्यात आलंय. महाविद्यालय परिसरात १५ छोट्या – मोठ्या इमारती उभारण्यात आल्या आहेत. परंतु, महाविद्यालय इमारतीत अद्याप वीजेचं कामही पूर्ण झालेलं नाही.

३०.५६ एकर जमिनीवर उभारण्यात आलेल्या या महाविद्यालयासाठी २३२.९७ कोटी रुपयांचा खर्च करण्यात आलाय. यात एमबीबीएसच्या विद्यार्थ्यांसाठी १०० जागा उपलब्ध होतील. महाविद्यालयात प्राध्यापकांसहीत इतर कर्मचाऱ्यांनी आपलं काम सुरू केलंय. यातील काही जागा भरण्याचं काम अद्याप सुरू आहे.

​हरदोई वैद्यकीय महाविद्यालय

हरदोईमध्ये उभारण्यात आलेल्या महाविद्यालयासाठी २०६ कोटी रुपयांचा खर्च दाखण्यात आलाय. महाविद्यालय इमारतीचं ९० टक्के काम पूर्ण झालंय. तसंच प्राध्यापकांच्या नियुक्तीचंही काम जवळपास पूर्ण झालंय. ज्युनियर-सिनिअर रेसिडन्ट डॉक्टर्सची पदंही भरण्यात आली आहेत. महाविद्यालय कॅम्पसपासून जवळपास १० किलोमीटर दूर जिल्हा रुग्णालयात रुग्णांवर उपचार केले जातील. जिल्हा रुग्णालयात नऊ मजल्यांची इमारत आणि वैद्यकीय महाविद्यालयाच्या ओपीडीचं निर्माण अद्याप सुरू आहे. हे काम अद्याप प्राथमिक टप्प्यात आहे. इमारतीचा पहिला मजलाही अद्याप उभारण्यात आलेला नाही.

​जौनपूर वैद्यकीय महाविद्यालय

५५४ कोटी रुपयांचा खर्च करून उभारण्यात येत असलेल्या या वैद्यकीय महाविद्यालयात आतापर्यंत ३०० कोटी रुपये उपलब्ध करून देण्यात आले आहेत. या वैद्यकीय महाविद्यालयाचं भूमीपूजन २०१४ मध्ये तत्कालीन मुख्यमंत्री अखिलेश यादव यांच्या हस्ते पार पडलं होतं. यंदा २५ ऑक्टोबर रोजी पंतप्रधान नरेंद्र मोदी यांनी या महाविद्यालयाचं उद्घाटन केलं असलं तरी या इमारतीचं अद्याप काम पूर्णही झालेल नाही. हे काम पूर्ण होण्यासाठी आणखीन दोन ते तीन वर्षांचा कालावधी लागण्याची शक्यता वर्तवण्यात येतेय.

महाविद्यालयाच्या प्राध्यापकांनी दिलेल्या माहितीनुसार वर्ग, ग्रंथालय आणि हॉस्टेल तयार आहेत. उच्च पदांवरच्या काही नियुक्त्याही पार पडल्या आहेत. ७०-७५ पदांवर आयोगाकडून नियुक्त्या केल्या जातील. ‘नीट’ परीक्षा पार पडलीय. निकाल लागल्यानंतर १०० विद्यार्थी या अर्धवट काम झालेल्या इमारतीत आपलं शिक्षण सुरू करणार आहेत.

​प्रतापगड वैद्यकीय महाविद्यालय

प्रतापगडमध्ये सोनेलाल पटेल नावानं वैद्यकीय महाविद्यालय उभारण्यात येतंय. या महाविद्यालयाचं उद्घाटन पार पडलं असलं तरी इथं अद्याप इमारतीचा पायाही व्यवस्थित उभा राहिलेला नाही. मुख्य रस्त्यापासून महाविद्यालयापर्यंत जाण्यासाठी रस्ताही उपलब्ध नाही.

वैद्यकीय शिक्षण मंत्री सुरेश खन्ना यांनी दिलेल्या माहितीनुसार, या महाविद्यालयात ३४५ बेड उपलब्ध असतील यातील २० आयसीयू बेड असतील. लवकरच महाविद्यालयात ओपीडी सुरू होईल, असा दावाही त्यांनी केलाय.

​देवरिया वैद्यकीय महाविद्यालय

देवरियामध्ये महर्षी देवरहा बाबा मेडिकल कॉलेज जिल्हा रुग्णालयाशी संलग्न करत वैद्यकीय सेवा उपलब्ध करून देण्यास प्रारंभ करण्यात आला आहे. ‘नीट’ परीक्षेचा निकाल जाहीर झाल्यानंतर इथल्या १०० जागांवर एमबीबीएसच्या विद्यार्थ्यांना संधी मिळेल.

या महाविद्यालयासाठी तब्बल २०८ कोटींचा खर्च अपेक्षित आहे. महाविद्यालयाच्या इमारतीचं ८० टक्के काम पूर्ण झालंय. या महाविद्यालयात ५० पीजी रेसिडन्ट, २४ सीनिअर रेसिडन्ट डॉक्टर उपलब्ध असतील.

​फतेहपूर वैद्यकीय महाविद्यालय

फतेहपूर जिल्ह्यात अमर शहीद जोधा सिंह अटैया ठाकूर दरियाव सिंह वैद्यकीय महाविद्यालयाचं काम मार्च २०२१ पर्यंत पूर्ण होईल, असं सांगण्यात येत होतं. परंतु, अद्याप महाविद्यालयाची इमारतही धड उभी राहू शकलेली नाही.

शहरापासून आठ किलोमीटर दूर राष्ट्रीय महामार्ग २ वर स्थित अल्लीपूर गावाजवळ या वैद्यकीय महाविद्यालयाचं काम सुरू आहे. सध्या तरी इथे इमारतीचा सापळा दिसून येतोय. मात्र, हे मेडिकल कॉलेज संपूर्णत: उघडण्यात आल्याचा दावा यूपी सरकारचे कॅबिनेट मंत्री रामनरेश अग्निहोत्री यांनी केलाय. यंदा १०० एमबीबीएस जागा या महाविद्यालयात उपलब्ध होतील.

​एटा वैद्यकीय महाविद्यालय

३०० बेडची व्यवस्था असणाऱ्या या वैद्यकीय महाविद्यालयात जिल्हा रुग्णालयातील १०० बेडची ओपीडी सेवा सुरू करण्यात आलीय. परंतु, अद्याप या महाविद्यालयाच्या इमारतीचं कामही पूर्ण झालेलं नाही. विद्यार्थ्यांसाठी वर्ग, रेसिडन्ट डॉक्टर आणि प्राध्यापकांसाठी निवासस्थानाचं काम जवळपास पूर्ण करण्यात आलंय. परंतु, जिल्हा रुग्णालयात उभारण्यात येणाऱ्या ट्रॉमा सेंटरचं काम अद्याप पूर्ण झालेलं नाही. जुलै – ऑगस्ट २०२२ पर्यंत हे काम पूर्ण होण्याची शक्यता वर्तवण्यात येतंय. या महाविद्यालयातही एमबीबीएसच्या १०० विद्यार्थ्यांना प्रवेश दिला जाणार आहे.



Source link

Leave a Reply

Your email address will not be published. Required fields are marked *

%d bloggers like this: