महाराष्ट्र बंदः जळगावात कार्यकर्ते व व्यापारी वर्गात शाब्दिक चकमक


हायलाइट्स:

  • आज महाविकास आघाडीकडून ‘महाराष्ट्र बंद’ची हाक
  • जळगावात बंदला संमिश्र प्रतिसाद
  • बंदचे आवाहन करण्यासाठी आघाडीचे नेते रस्त्यावर

म. टा. प्रतिनिधी, जळगावः उत्तर प्रदेशमधील लखीमपूर खेरीमध्ये आंदोलक शेतकऱ्यांवरील अत्याचाराचा निषेधार्थ महाविकास आघाडी सरकारने आज सोमवारी महाराष्ट्र बंदची हाक दिली आहे. जळगावात सकाळच्या सत्रात बंदचा कोणत्याही प्रकारचा परिणाम जाणवला नाही. त्यानतंर आघाडीमधील काँग्रेस, राष्ट्रवादी व शिवसेनेचे नेते बंदचे आवाहन करण्यासाठी रस्त्यावर उतरले होते. त्यानतंर मुख्य बाजारपेठ तासभर बंद होती. मात्र, नेते निघून जाताच व्यापाऱ्यांनी पुन्हा दुकाने उघडलीत. दुपारपर्यंत सुरु- बंद चा खेळ सुरु होता. कृषी उत्पन्न बाजार समितीमध्ये भाजीपाला खरेदी व विक्रीचे व्यवहार सुरळीतपणे झालेत.

आघाडी सरकारमधील शिवसेना, राष्ट्रवादी काँग्रेस व काँग्रेस पक्षांनी आज महाराष्ट्र बंदचे आवाहन केले होते. मात्र, सकाळ सत्रात शहरातील बाजारपेठ नेहमीप्रमाणे उघडली होती. शहरातील गोलाणी मार्केट, टॉवर चौक, सेंट्रल फुले मार्केट, सराफ बाजार, दाणाबाजारातील दुकाने उघडली होती. मात्र, त्यानंतर सकाळी साडेदहा वाजेच्या सुमारास महाविकास आघाडीचे नेते कॉंग्रेस भवन परिसरात एकत्र आले. यात काँग्रसेचे जिल्हाध्यक्ष प्रदीप पवार , माजी खासदार डॉ. उल्हास पाटील, आमदार शिरिष चौधरी, राष्ट्रवादीचे जिल्हाध्यक्ष अॅड. रविंद्र पाटील, शिवसेनेचे महानगराध्यक्ष तायडे यांच्यासह पदाधिकारी व कार्यकर्ते उपस्थित होते. सर्वांनी शहरात फिरून महाराष्ट्र बंद करण्याचे आवाहन व्यापारीवर्गाला केले. त्यानंतर व्यापाऱ्यांनी आपली दुकाने बंद केली. दाणाबाजार परिसरात काही ठिकाणी व्यापारी व राजकीय पक्षांच्या कार्यकर्त्यांमध्ये दुकाने बंद करण्याच्या मुद्द्यावरून शाब्दिक चकमक उडाली होती. परंतु, पोलिसांनी वेळीच हस्तक्षेप केल्यामुळे काही अनुचित प्रकार घडला नाही.

LIVE मुंबईत क्राॅफर्ड मार्केटमध्ये कडकडीत बंद

केंद्र सरकारच्या विरोधात घोषणाबाजी

शहरात फिरून व्यापाऱ्यांना बंद पाळण्याचे आवाहन करत असताना महाविकास आघाडीचे नेते व कार्यकर्त्यांनी केंद्र सरकारच्या विरोधात जोरदार घोषणाबाजी केली, उत्तरप्रदेशातील शेतकऱ्यांवरील अत्याचाराची घटना अत्यंत दुर्देवी व निषेधार्ह आहे, अशी भावना आंदोलकांनी व्यक्त केली.

मोदी सरकारकडून शेतकऱ्यांवर अत्याचार

यावेळी महाविकास आघाडीच्या स्थानिक नेत्यांनी केंद्र सरकार घणाघाती टीका करत केंद्र सरकार हे शेतकरी विरोधात असल्याची भावना व्यक्त केली. यावेळी काँग्रेसचे आमदार शिरीष चौधरी यांनी सांगितले की, केंद्रातील मोदी सरकारने जनतेवर अनन्वित अत्याचार चालवले आहेत. लोकशाही मूल्यांना पायदळी तुडवण्याचे काम मोदी सरकार करत आहे. दरम्यान, आजच्या बंदमध्ये जनतेने चांगला सहभाग दिला आहे. मोदी सरकारला ही चपराक असून, आता तरी मोदी सरकारने आपली भूमिका बदलली पाहिजे, असे माजी खासदार डॉ. उल्हास पाटील म्हणाले. राष्ट्रवादी काँग्रेसचे जिल्हाध्यक्ष अड. रवींद्र पाटील यांनी, शेतकरी, सर्वसामान्य जनतेला आज अनेक अडचणी येत आहेत. मोदी सरकारला जाब विचारला पाहिजे, असे आवाहन केले.

जामनेरात दुकानदार व कार्यकर्त्यांमध्ये वाद

जिल्ह्यातील जामनेर शहरात महाराष्ट्र बंद पाळण्याच्या कारणावरून महाविकास आघाडीचे कार्यकर्ते आणि एका दुकानदारामध्ये जोरदार वाद रंगला. दुकान बंद करण्याच्या मुद्द्यावरून हा वाद झाला. झेरॉक्स दुकानदाराने बंद न पाळण्याचे सांगत दुकान बंद करण्यास नकार दर्शवला. त्यामुळे राजकीय पक्षाच्या कार्यकर्त्यांनी आक्रमक होत त्याला दुकान बंद करण्यास सांगितले. परंतु, त्याने ऐकले नाही म्हणून वाद विकोपाला गेला. शेवटी राजकीय पक्षाच्या कार्यकर्त्यांनी सामंजस्याची भूमिका घेत तेथून काढता पाय घेतला.

अनिल देशमुख यांचा पाय आणखी खोलात?; सीबीआयचं पथक नागपुरच्या घरी

धान्य बाजार राहणार बंद

शेतकरीवर्गाची गैरसोय होऊ नये, म्हणून कृषी उत्पन्न बाजार समितीत सकाळी भाजीपाला खरेदी-विक्री सुरू ठेवण्यात आलेली आहे. मात्र, दिवसभर सुरू राहणारा धान्य बाजार व तेथील संपूर्ण व्यवहार आजच्या बंदमुळे बंद ठेवण्यात येणार असल्याचे कृषी उत्पन्न बाजार समिती प्रशासनाने सांगितले.

वाचाः मुंबईत बेस्ट बसची तोडफोड; जयंत पाटलांनी व्यक्त केली ‘ही’ शंका

व्यापारी महामंडळाचा बंदला विरोध

जळगाव जिल्हा व्यापारी महामंडळाने महाविकास आघाडी सरकारच्या वतीने पुकारण्यात आलेल्या बंदला विरोध दर्शवला आहे. शेतकऱ्यांवरील अत्याचाराची घटना निषेधार्थ आहे. व्यापारीवर्ग या घटनेचा निषेध करत आहे. मात्र, बंद करून सर्वसामान्य जनतेला वेठीस धरणे चुकीचे आहे. करोनामुळे आधीच व्यापारीवर्ग संकटात सापडला आहे. सध्या सणासुदीचे दिवस आहेत. त्यामुळे एक दिवस जरी बाजारपेठ बंद राहिली तर व्यवहारांची साखळी विस्कळीत होते. त्यामुळे जे व्यापारी स्वयंस्फूर्तीने बंदमध्ये सहभागी होतील, त्यांनी सहभागी व्हावे. पण ज्यांचा बंदमध्ये सहभागी होण्यास नकार असेल, त्यांना नाहक त्रास देऊ नये, अशी भूमिका व्यापारी मंडळाने घेतली होती.

वाचाः ‘महाराष्ट्र बंद’चा वाहतूकीवर परिणाम; बेस्टची तोडफोड, पीएमपी, टीएमटी बंद



Source link

Live Sachcha Dost TV

Leave a Reply

Your email address will not be published. Required fields are marked *

%d bloggers like this: