संत चोखामेळा अध्यासन प्रमुखपदी प्रसिद्ध साहित्यिक प्राचार्य डॉ.रामदास चवरे यांची निवड
पुणे /ज्ञानप्रवाह न्यूज- संत चोखामेळा महाराज व त्यांच्या परिवारातील संत मंडळी यांच्या जीवन कार्यावर संशोधन, साहित्य निर्मिती व विचार प्रसार कार्य आदि उद्देश समोर ठेवून कार्यरत असलेल्या संत चोखामेळा अध्यासन केंद्राच्या प्रमुखपदी संत साहित्याचे गाढे अभ्यासक प्राचार्य डॉ.रामदास चवरे अमरावती यांची निवड करण्यात आली .संत गाडगेबाबा अमरावती विद्यापीठ, राष्ट्रसंत तुकडोजी महाराज नागपूर विद्यापीठ, स्वामी रामानंद तीर्थ मराठवाडा विद्यापीठ नांदेड , सावित्रीबाई फुले पुणे विद्यापीठ पुणे इत्यादी राज्यातील प्रमुख विद्यापीठामधील मराठी अभ्यास मंडळ सदस्य ,मराठी प्राध्यापक परिषद अध्यक्ष , पी.एच.डी.मार्गदर्शक , प्राध्यापक , प्राचार्य अशा जबाबदा-या पार पाडल्या आहेत.त्यांनी जगभरात शेकडो व्याख्याने दिली आहेत.अनेक नामांकित पुरस्काराने सन्मानित संत साहित्याचे अभ्यासक असलेले प्राचार्य चवरे साहित्यिक व समीक्षक म्हणून ही ख्यातकीर्त आहेत.महाराष्ट्र ,गुजरात ,कर्नाटक राज्यातील बहुतांश विद्यापीठामधून त्यांचे साहित्य अभ्यास क्रमात समाविष्ट आहे . त्यांच्या निवडीबद्दल राज्यभरातील अभ्यासक व वारकरी संप्रदायमधून त्यांचे अभिनंदन होत आहे.
संत चोखामेळा अध्यासन केंद्र वृंदावन फाऊंडेशन व सहयोगी संस्था यांच्या वतीने चालवले जाते.अध्यासनाच्यावतीने आजवर संत चोखामेळा व परिवार सार्थ अभंग गाथा(संपादक प्रा.डॉ.ओम श्रीश दत्तोपासक ) संत चोखामेळा व परिवार चरित्र व अभंगगाथा (संपादक सचिन पाटील ) पारायण प्रत,संत सोयराबाई व्यक्तित्व आणि कर्तुत्व (सचिन पाटील – डॉ. संदीप सांगळे ) , संत चोखामेळा चरित्र ( दीपक जेवणे ) इ ग्रंथ निर्मितीसोबतच , संत चोखामेळा साहित्य संमेलन , संत चोखामेळा समता पुरस्कार असे महत उपक्रम सुरु आहेत . यामध्ये संत चोखोबा व परिवार यांच्या जीवन कार्य साहित्य संबंधित संशोधन व प्रचार प्रसार कार्य चालू असते.वारकरी संप्रदायाने सांगितलेल्या समता ,बंधुता आणि मानवता या मुल्यांच्या उत्कर्ष आणि संवर्धन कार्या करिता मागील सात वर्षांपासून महाराष्ट्रातील ९ जिल्ह्यातून १७५० किलोमीटर अंतर प्रबोधन प्रवास करणारी चोखोबा ते तुकोबा एक वारी समतेची ही समता वारी काढली जाते.
वृंदावन फाऊंडेशन मुख्य विश्वस्त मंडळ यांच्या संस्थापक निमंत्रक सचिन पाटील यांच्या अध्यक्षतेखाली झालेल्या बैठकीत प्राचार्य डॉ.रामदास चवरे यांची निवड सर्वानुमते करण्यात आली .तसेच संत चोखामेळा अध्यासनाच्या आजवरच्या वाटचालीत यशस्वीपणे ज्यांच्या नेतृत्वाखाली वाटचाल केली त्या मावळत्या अध्यक्षा प्राचार्या उल्काताई चंदनशिवे यांच्या आभाराचा ठराव करण्यात आला .
