पांडुरंग निघाले संत सावता माळींच्या भेटीला – संत परंपरेचा अद्वितीय सोहळा
पहिल्यांदाच लोकप्रतिनिधींच्या उपस्थितीत पांडूरंग पालखीचे पंढरपुरातून प्रस्थान
आमदार अभिजीत पाटील यांनी दिंडीसोबत पंढरपूर ते रोपळे पायी चालत नोंदवला सहभाग
पंढरपूर /ज्ञानप्रवाह न्यूज,दि.२०/०७/२०२५- पांडुरंग निघाले संत सावता माळीच्या भेटीला या अभंगाप्रमाणे संत सावता माळी यांची कर्मभूमी असणाऱ्या माढा तालुक्यातील अरण या गावची आख्यायिका आहे. कामातच देव मानणाऱ्या कांदा, मुळा,भाजी अवघी विठाई माझी अशी ओळख असणाऱ्या संत सावता माळी यांच्या भेटीसाठी रविवारी कानड्या विठुरायाच्या पालखीचे अरणकडे प्रस्थान झाले.हा सोहळा अध्यात्मिकदृष्ट्या अत्यंत महत्त्वाचा मानला जातो.
या सोहळ्याचा पहिला मुक्काम पंढरपूर ते रोपळे पर्यंत असतो.यामध्ये लोकप्रतिनिधींचा सहभाग म्हणून पहिल्यांदाच माढाचे आमदार अभिजीत पाटील हे पांडुरंगाच्या पालखी आणि तमाम वारकरी भाविकांसोबत जय हरी विठ्ठल नामाचा जयघोष करत कांदा, मुळा,भाजी अवघी विठाबाई माझी म्हणत पालखीबरोबर पायी चालत सामील झाले होते.
दि.२० जुलै रोजी पंढरपूरहून संत शिरोमणी सावता माळी यांच्या अरण ता.माढा येथील समाधीस्थळाकडे दरवर्षीप्रमाणे यावर्षीही पांडुरंगाची पालखी प्रस्थान ठेवून तीन दिवसांच्या पायी प्रवास केल्यानंतर २६ जुलै रोजी अरण येथे पोहोचणार आहे.
संत सावता माळी पुण्यतिथी सोहळ्यानिमित्त पारंपरिक भक्ती,श्रद्धा आणि सेवा यांचे प्रतीक असणारा हा अनोखा सोहळा उत्साहात पार पडतो.या भक्तिसोहळ्यात माढा विधानसभा मतदारसंघाचे आमदार अभिजीत धनंजय पाटील यांनी स्वतः पायी चालत दिंडीमध्ये सामिल झाले होते.रोपळे येथे पहिला मुक्काम असून आमदार पाटील यांनी पालखीचे स्वागत केले आणि पायी चालत रोपळे येथे आले.
याप्रसंगी बोलताना आ.अभिजीत धनंजय पाटील यांनी सांगितले की,संत सावता माळी यांच्या जीवनमूल्यांचा वारसा आम्हा सर्वांसाठी प्रेरणादायी आहे.लोकप्रतिनिधी म्हणून श्री पांडुरंग पालखीत उपस्थित राहणार असल्याचे सांगितले.अरण या संत भूमीत पांडुरंगाची पालखी येते ही आपल्या माढा तालुक्यासाठी गौरवाची गोष्ट आहे. पालखी सोहळ्याच्या माध्यमातून ग्रामीण भागात भक्तीचा व सांस्कृतिक वारसा वृद्धिंगत होत आहे.हा सोहळा अधिक व्यापक करण्यासाठी पुढील वर्षांमध्ये शासन स्तरावरून आवश्यक त्या योजना राबविण्याचा मानस आहे.
यावेळी मंदिर समितीचे सह अध्यक्ष गहिनीनाथ महाराज औसेकर,मंदिर समिती सदस्य संभाजी शिंदे,ज्ञानेश्वर महाराज देशमुख जळगावकर,शकुंतला नडगिरे,काशी कापडी समाज बांधव,नागेश गंगेकर, वारकरी संप्रदायातील अनेक मान्यवर मंडळी, कीर्तनकार, भक्तगण, सावता परिषदेचे पदाधिकारी, युवा कार्यकर्ते आणि ग्रामस्थ मोठ्या संख्येने उपस्थित होते.
