IPL 2021 : धोनीने ६ चेंडूंच्या खेळीत केले ६ मोठे विक्रम

दुबई : ‘अनहोनी को होनी करदे…’ असं ज्याच्याबद्दल म्हटलं जातं तो धोनी सध्या सर्वांच्या चर्चेचा विषय बनला आहे. खेळी लहान असो किंवा मोठी. त्या खेळीचा परिणाम काय झाला, हे महत्वाचं. आयपीएल २०२१च्या पहिल्या क्वॉलिफायरमध्ये दिल्ली कॅपिटल्सविरुद्ध धोनीने ६ चेंडूंच्या खेळीत अनेक विक्रम बनवले.

वाचा-ऋतुराजच्या डोक्यात काय चालू असतं? अंतिम फेरी गाठल्यानंतर धोनीनं केला खुलासा

दिल्लीविरुद्धच्या सामन्यात धोनीने ६ चेंडूत नाबाद १८ धावा केल्या. यावेळी त्याचा स्ट्राईक रेट होता ३००. आयपीएलमध्ये धोनीची ही आतापर्यंतची सर्वाधिक स्ट्राईक रेटने खेळलेली खेळी ठरली. यापूर्वी त्याने मुंबई इंडियन्सविरुद्ध २८१.२५ च्या स्ट्राईक रेटने धावा केल्या होत्या.

दिल्ली कॅपिटल्सला पराभूत केल्यानंतर धोनी आयपीएलचा १० वा अंतिम सामना खेळणारा पहिला खेळाडू ठरला आहे. ९ वा अंतिम सामना तो चेन्नई सुपर किंग्जकडून खेळताना दिसेल. याआधी त्याने रायझिंग पुणे सुपरजायंट्सकडून १ अंतिम सामना खेळलेला आहे.

वाचा- दोन वर्षानंतर चाहत्यांना वाटले, माही मार रहा है! पाहा चेन्नईच्या विजयाचे VIDEO एका क्लिकवर

चेन्नई सुपर किंग्सने दिल्लीला हरवत आयपीएल २०२१ ची अंतिम फेरी गाठली आहे. यासह, आयपीएलच्या अंतिम सामन्यात सर्वाधिक ९ वेळा कर्णधारपद भूषवताना तो दिसणार आहे. सर्वाधिक वेळा अंतिम सामन्यात नेतृत्व करणारा धोनी पहिला कर्णधार ठरणार आहे. त्याच्यानंतर मुंबई इंडियन्सचा रोहित शर्मा दुसऱ्या क्रमांकावर आहे. रोहितने ५ आयपीएल फायनलमध्ये कर्णधारपद भूषवले आहे.

वाचा- धोनीच्या ६ चेंडूत १८ धावा: विराट म्हणाला, किंग इज बॅक; ओम फिनिशाय नम:

दिल्लीविरुद्धच्या विजयासह सीएसकेने आयपीएल २०२१ च्या अंतिम फेरीत प्रवेश केला. यासह अंतिम सामन्यात सहभागी होणारा सर्वात वयस्कर खेळाडू बनण्याचा मानही धोनीच्या नावावर जमा होणार आहे. ४० वर्षे आणि १०० दिवसांच्या वयात आयपीएलचा अंतिम सामना खेळून तो इम्रान ताहिरचा विक्रम मोडेल. आयपीएलमध्ये धोनीचा संघ सहकारी असलेल्या ताहिरने ४० वर्ष आणि ६९ दिवस वय असताना २०१९ मध्ये आयपीएलची अंतिम फेरी खेळली होती.

दिल्लीविरुद्धच्या सामन्यात आणखी एक विक्रम धोनीच्या नावावर जमा झाला आहे. धोनी आयपीएलमध्ये सर्वाधिक प्ले-ऑफ सामने खेळणारा खेळाडू ठरला आहे. दिल्लीविरुद्धचा पहिला क्वालिफायर सामना हा त्याचा आयपीएलच्या खेळपट्टीवरील २५ वा प्ले-ऑफ सामना होता. यासह २४ प्ले-ऑफ सामने खेळणाऱ्या सुरेश रैनालाही त्याने मागे टाकले आहे.

वाचा- मुंबई इंडियन्स घेणार मोठा निर्णय; या खेळाडूंना मिळणार डच्चू!

यंदाच्या आयपीएलच्या पहिल्या क्वॉलिफायरमध्ये सीएसकेला जिंकण्यासाठी शेवटच्या षटकात १३ धावांची गरज होती. हे आव्हानही धोनीने २ चेंडू शिल्लक राखत पूर्ण केले. शेवटच्या षटकात १० किंवा अधिक धावांचा पाठलाग करण्याचा मानही आता धोनीला मिळाला आहे. धोनीने सर्वाधिक ७ वेळा १० पेक्षा जास्त धावांचा पाठलाग केला आहे. तसेच सर्वाधिक २५ वेळा नाबाद राहण्याचा मानही धोनीला मिळाला आहे.