मद्यपान करून वाहन चालवणे हा गंभीर गुन्हा असून यामुळे अपघातांची शक्यता वाढते. स्वतःचे व इतरांचे प्राण धोक्यात न घालता सुरक्षित प्रवासासाठी वाहतूक नियम पाळावेत,असे आवाहन रायगड पोलिसांनी केले आहे.

Raigad news : रायगड | ज्ञानप्रवाह न्यूज : मद्यपान करून वाहन चालवणे हा कायद्याने गंभीर गुन्हा असून अशा निष्काळजीपणामुळे अनेक निष्पापांचे प्राण जात असल्याची दुर्दैवी उदाहरणे सातत्याने समोर येत आहेत. स्वतःच्या क्षणिक मजेसाठी स्वतःसह इतरांच्या जीवाशी खेळू नका, असा कडक इशारा रायगड पोलिसांकडून देण्यात आला आहे.

दारूच्या नशेत वाहन चालवताना चालकाच्या निर्णयक्षमतेवर परिणाम होतो, प्रतिक्रिया वेळ वाढते आणि वाहनावरील नियंत्रण सुटण्याची शक्यता वाढते. यामुळे गंभीर अपघात, कायमस्वरूपी अपंगत्व किंवा मृत्यू ओढवू शकतो. त्यामुळे Don’t Drink and Drive हा संदेश केवळ घोषवाक्य नसून प्रत्येक नागरिकाने अंगीकारण्याची गरज असल्याचे पोलिसांनी स्पष्ट केले आहे.रायगड जिल्ह्यात महाराष्ट्र पोलीस मुख्यालय, जिल्हा माहिती कार्यालय रायगड व संबंधित यंत्रणांच्या माध्यमातून रस्ता सुरक्षा व वाहतूक नियमांबाबत जनजागृती मोहीम राबवली जात आहे.

मद्यपान करून वाहन चालवणाऱ्यां विरोधात कठोर कारवाई करण्यात येत असून, वाहन जप्ती, दंड व परवाना निलंबनासारख्या शिक्षेची तरतूद असल्याचेही पोलिसांनी सांगितले.

सुरक्षित प्रवास म्हणजे सुरक्षित जीवन

घरी सुरक्षित पोहोचणे हेच खरे यश आहे, असा संदेश देत पोलिसांनी नागरिकांना जबाबदारीने वाहन चालवण्याचे आणि नियमांचे पालन करण्याचे आवाहन केले आहे.