सरकोली ता.पंढरपूर जि सोलापूर पर्यटन स्थळावर जागतिक पर्यटन दिन मोठ्या उत्साहात साजरा
सरकोली ता.पंढरपूर/ ज्ञानप्रवाह न्यूज – आज दि.२७ सप्टेंबर २०२३ रोजी सरकोली ता.पंढरपूर जि सोलापूर पर्यटन स्थळावर जागतिक पर्यटन दिन मोठ्या उत्साहात साजरा करण्यात आला.
कार्यक्रमाची सुरुवात सकाळी अशोक संभाजी भोसले सर यांनी दिलेली २०० सुपारी,काजू, आंबा ही रोपे कार्यक्रमाचे प्रमुख महाराष्ट्र साहित्य परिषद सोलापूर जिल्हा प्रतिनिधी कल्याणराव शिंदे सर, माजी प्राचार्य हनुमंतराव लामकाने, गावाचे सरपंच शिवाजीराव भोसले, संचालक विठ्ठल सह सा.का.संभाजी भोसले, संचालक चंद्रभागा सह.सा.का मारुती दादा भोसले,श्री.भैरवनाथ विद्यालय व जि.प.प्रा.शाळा सर्व शिक्षक वर्ग,पर्यटन स्थळ निर्मिती चे सेवक यांच्या हस्ते वृक्षारोपणाने झाली.
त्यानंतर श्री.भैरवनाथ विद्यालय व जि.प.प्रा. शाळा सरकोली चे विद्यार्थी व विद्यार्थिनी यांची हातात रोपे घेवून वृक्ष दिंडी काढण्यात आली. सदर दिंडीमध्ये गावचे नागरिक व प्रमुख पाहुणे सामील झाले होते.
श्री.भैरवनाथ मंदिर सभागृह येथे श्री.भैरवनाथ विद्यालयाच्या ११ खेळाडूंनी शालेय क्रीडा स्पर्धेत यश संपादन केल्याबद्दल पर्यटन स्थळनिर्मितीच्यावतीने प्रमुख पाहुण्यांच्या हस्ते सत्कार /सन्मान करण्यात आला.
त्यानंतर पर्यटन स्थळ निर्मितीच्या श्रमदानामध्ये लहान मुले मदत करतात व पर्यटनाच्यावतीने चालवण्यात येणाऱ्या अभ्यासिकेच्या १८ विद्यार्थ्यांना शालेय साहित्य वाटत करण्यात आले .
विद्यार्थी व उपस्थित गावकर्यांचा पर्यटन दिना निमित्त शपथ ग्रहण समारंभ घेण्यात आला.माजी पोलीस कर्मचारी विलास भोसले यांनी ही शपथ दिली.
आण्णासाहेब भोसले सर यांनी पर्यटन स्थळ निर्मितीच्यावतीने चालवण्यात येणाऱ्या अभ्यासिकेची प्रगती सांगितली. अशोक भोसले सर सिंधुदुर्ग कोकण यांनी कोकण व गोवा या ठिकाणी पर्यटनाच्या माध्यमातून होणारी उलाढाल व स्थानिक नागरिकांची प्रगती याबाबत माहिती दिली .
सरकोली पर्यटन स्थळ निर्मितीसाठी सरकारी पातळीवर प्रयत्न करण्यासाठी विधानपरिषद उपसभापती डॉ निलम गोऱ्हे यांनी मान्य केले होते .त्यांनी एक वेळ सरकोली येथे भेट देऊन पाहणी करावी अशी सरकोली ग्रामस्थांची अपेक्षा आहे.
या कार्यक्रमाचे प्रमुख कल्याणराव शिंदे महाराष्ट्र साहित्य परिषद सदस्य यांनी आपल्या मनोगतामध्ये सरकोली हे गाव ऐतिहासिक असून या गावाची आतापर्यंतची ओळख जेष्ठ साहित्यिक डॉ.द.ता.भोसले, कै.आमदार भारत भालके, कृषिभूषण प्रभाकर भोसले,पैलवान परंपरेच,बागायतदार व अधिकार्याचे गाव म्हणून आहे .आता नव्याने पर्यटन स्थळ गाव म्हणून ओळख होवू लागली आहे .या पर्यटन स्थळ निर्मिती मध्ये श्रमदान करणाऱ्या सेवकांना सर्वांनी सहकार्य करावे.या निर्मितीमध्ये गावातील व परगावातील पर्यटक प्रेमी आर्थिक व इतर स्वरुपात मदत करतात याचा आनंद वाटतो.या मतदार संघाचे आमदार यशवंत माने हे ही शासकीय स्तरावरील सर्व मदत मिळवून देण्यासाठी मदत करत आहेत. या पर्यटन स्थळ निर्मितीसाठी डॉ.संजयकुमार भोसले हे मार्गदर्शन करत आहेत .या पर्यटन स्थळास देश पातळीवर प्रसिद्धी मिळेल असे सांगितले.
सदर कार्यक्रमाचे आभार प्रदर्शन मोहन भोसले सर यांनी केले. उपस्थित विद्यार्थी व नागरिकांना अल्पोपहार मा.प्राचार्य श्रीमंत गणपत भोसले यांनी दिला.
