फलटणच्या महिला डॉक्टरच्या आत्महत्येने हादरलं राज्याचं राजकारण – त्या खासदाराचा कॉल ठरला संशयाचं केंद्र
चार बलात्कार, एक आत्महत्या आणि अनेक प्रश्न- पोलीस-राजकारण-सिस्टीमचा काळा चेहरा उघडकीस?
फिटनेस सर्टिफिकेटपासून मृत्यूपर्यंतचा प्रवास – महिला डॉक्टरच्या शेवटच्या ओळींनी हलवले मन
पोलीस अधिकाऱ्यांवर बलात्काराचा आरोप, खासदारांचा फोन आणि अखेर मृत्यू – फलटण प्रकरणात नवा खुलासा
डॉक्टरची आत्महत्या की सिस्टीमची हत्या? – चौकशीसमोर उभे अनेक राजकीय प्रश्न
फलटण प्रकरण – महिला डॉक्टरच्या मृत्यूमागील सत्तेचा आणि सिस्टीमचा काळा चेहरा
फलटण / ज्ञानप्रवाह न्यूज,दि. 26 ऑक्टों 2025 : भाऊबीजेच्या रात्री फलटण शहरातील एका नामांकित हॉटेलच्या खोलीत एका महिला डॉक्टरने आत्महत्या केल्याची घटना घडली आणि महाराष्ट्रातील राजकीय वर्तुळात प्रचंड खळबळ उडाली. उपजिल्हा रुग्णालयात कार्यरत या डॉक्टरने आत्महत्येपूर्वी आपल्या हातावर लिहिलेल्या शब्दांनी प्रशासन,पोलिस आणि राजकीय सत्तेच्या गाठी उलगडण्यास सुरुवात केली.
या डॉक्टरने आपल्या हातावर लिहिलेल्या शेवटच्या संदेशात चार वेळा बलात्कार झाल्याचा उल्लेख करत पोलीस उपनिरीक्षक गोपाळ बदने याच्यावर तसेच ती राहत असलेल्या घरमालकाचा मुलगा प्रशांत बनकर यांच्यासह मानसिक आणि शारीरिक छळ केल्याचा गंभीर आरोप केला मात्र यानंतर पुढे येणारी माहिती आणखी धक्कादायक ठरते कारण या प्रकरणात एका खासदाराचा शेवटचा कॉल आणि त्यानंतर वाढलेला मानसिक दबाव आता संशयाच्या भोवऱ्यात आहे.
तणाव,तक्रारी आणि तडजोडींचा खेळ
गेल्या काही महिन्यांपासून फलटण पोलिसांशी संबंधित महिला डॉक्टरचे मतभेद उघड झाले होते.पोलिसांना हवे तसे वैद्यकीय अहवाल न दिल्याने अनेक वेळा चकमकी झाल्या. परिणामी तिच्याविरोधात जिल्हा आरोग्य विभागात तक्रार दाखल झाली आणि चौकशी समिती नेमण्यात आली.या चौकशीत डॉक्टरने पोलिस आणि राजकीय दबावाविषयी स्पष्टपणे लिहिले होते.
तिच्या मते, तुम्ही बीडच्या असल्याने पोलीसांना अनुकूल अहवाल देत नाही, असा आरोप खासदारांनी फोनवर केला होता.या घटनेनंतर तिच्यावर मानसिक दडपण वाढत गेले.
फिटनेस सर्टिफिकेटवरून सुरु झालेला संघर्ष
31 जुलै 2025 रोजी फलटण पोलिसांनी एका आरोपीला वैद्यकीय तपासणीसाठी आणले असता डॉक्टरने त्या आरोपीचे रक्तदाब वाढलेले असल्याने उपचारासाठी रुग्णालयात दाखल करण्याचा निर्णय घेतला.मात्र पोलिसांना आरोपी ताब्यात हवा होता. या निर्णयामुळे वाद उफाळले. त्यानंतर अनेक आरोपींच्या वैद्यकीय तपासण्या आणि अहवालांवरून दडपशाही वाढली, आणि या सर्वातून ती डॉक्टर अधिकच त्रस्त होत गेली.
तो शेवटचा कॉल – तपासासाठी निर्णायक ठरणार ?
आत्महत्येच्या काही तास आधी डॉक्टरला एका खासदाराच्या पीएचा कॉल आला होता, असा दावा तिच्या सहकाऱ्यांनी केला आहे. हा संवाद आणि त्यानंतरची घटनाक्रम आता तपासाचा केंद्रबिंदू ठरला आहे.
आठ तासांनंतर अंत्यसंस्कार
डॉक्टरचा मृतदेह तब्बल आठ तास शवविच्छेदनासाठी ठेवण्यात आला होता. अखेर वडवणी तालुक्यातील कवडगाव बुद्रुक येथे तिचे अंत्यसंस्कार करण्यात आले. तिच्या मृत्यूमुळे केवळ वैद्यकीय क्षेत्रात नव्हे तर राजकीय वर्तुळातही संतापाची लाट उसळली आहे.
आता प्रश्न उरतो —
एका महिला डॉक्टरला न्याय मिळेल का?
तो खासदार अखेर कोण?
पोलिस विभाग आणि सत्तेतील हातमिळवणीचा हा आणखी एक नमुना आहे का ?
या सर्व प्रश्नांची उत्तरे आता तपासावर अवलंबून आहेत. मात्र एक गोष्ट निश्चित आहे ही आत्महत्या महाराष्ट्रातील सत्ताधाऱ्यांना हादरा देणारी आहे.
भाऊबीजेच्या रात्री आत्महत्या,खासदाराचा कॉल आणि चार बलात्काराचा आरोप – फलटण हादरलं
डॉक्टरची आत्महत्या की सिस्टीमची हत्या ? – राजकीय दडपशाहीमागचं सत्य काय
तो खासदार कोण? – महिला डॉक्टरच्या मृत्यूमागील सत्तेचा सावलीतील चेहरा
