समीर वानखेडेंवर वसुलीचे आरोप; नवाब मलिक यांनी मालदीव, दुबईमधले फोटो केले शेअर

मुंबई: गेल्या काही दिवसांपासून नार्कोटिक्स कंट्रोल ब्यूरो (NCB) व एनसीबीचे मुंबई विभागीय संचालक समीर वानखेडे (Sameer Wankhede) यांच्याविरोधात आरोपांची राळ उडवून देणारे राष्ट्रवादी काँग्रेसचे प्रवक्ते नवाब मलिक (Nawab Malik) यांनी आज आणखी एक धक्कादायक गौप्यस्फोट केला. ‘वानखेडे यांच्या कुटुंबीयांचे दुबई व मालदीवमधले काही फोटो सोशल मीडियात शेअर करत मलिक यांनी त्यांच्यावर वसुलीचा गंभीर आरोप केला आहे.

आर्यन खान याला ड्रग्ज प्रकरणात अटक केल्यानंतर नवाब मलिक यांनी पहिल्यांदा पत्रकार परिषद घेऊन ही कारवाई बोगस असल्याचा दावा केला होता. त्यानंतर ठराविक अंतरानं वेगवेगळे पुरावे सादर करत मलिक यांनी एनसीबी व समीर वानखेडे यांच्यावर प्रश्नाचा मारा सुरूच ठेवला आहे. आज काही फोटो शेअर करत मलिक यांनी वानखेडे यांना प्रश्न केले आहेत. वानखेडे यांच्या कुटुंबातील काही सदस्यांचे मालदीव व दुबईतील हे फोटो आहेत. त्या फोटोचा संदर्भत दे मलिक यांनी वानखेडे यांच्यावर वसुलीचे आरोप केले आहेत.

वाचा: आर्यन खानला तातडीचा दिलासा नाही! २६ ऑक्टोबरपर्यंत कोठडीत राहावं लागणार

‘करोनाच्या काळात संपूर्ण फिल्म इंडस्ट्री मालदीव आणि दुबईमध्ये होती. त्यावेळी समीर वानखेडे यांच्या कुटुंबातील लोकही तिथं उपस्थित होते. समीर वानखेडे हे स्वत: दुबई किंवा मालदीवमध्ये होते का? त्यांची लेडी डॉन मालदीवला गेली होती का याचं उत्तर त्यांनी द्यावं,’ अशी मागणी मलिक यांनी केली आहे.

सुशांतसिंह राजपूत याच्या आत्महत्येनंतर केंद्र सरकारनं समीर वानखेडे यांची एनसीबीमध्ये बदली केली आणि लगेच रिया चक्रवर्ती हिला अटक करण्यात आली. चार-चार हजार रुपयांच्या पेमेंटच्या आधारावर त्यांच्यावर गुन्हा दाखल करण्यात आला. व्हॉट्रसअॅप चॅटच्या माध्यमातून अभिनेत्री व अभिनेत्यांना एनसीबीच्या दारात उभं करण्यात आलं व दहशत निर्माण करण्याचं काम केलं गेलं, असा आरोप नवाब मलिक यांनी केला. मालदीव व दुबईमध्ये बॉलिवूडवाल्यांकडून ही वसुली करण्यात आली,’ असा थेट आरोप नवाब मलिक यांनी केला आहे.

वाचा: धक्कादायक! शिर्डी संस्थानच्या अधिकाऱ्याकडून साईभक्त महिलांना अश्लील संदेश