खासदार प्रणिती शिंदे यांच्या हस्तक्षेपानंतर प्राथमिक आरोग्य केंद्र सुरू करण्याचे लेखी आश्वासन

डोणगाव उपोषण प्रकरणात तोडगा; खासदार प्रणिती शिंदे यांच्या हस्तक्षेपानंतर प्राथमिक आरोग्य केंद्र सुरू करण्याचे लेखी आश्वासन

सोलापूर/ज्ञानप्रवाह न्यूज –उत्तर सोलापूर तालुक्यातील डोणगाव येथे प्राथमिक आरोग्य केंद्र सुरू करण्याच्या मागणीसाठी सामाजिक कार्यकर्ते रघुनाथ खजूरकर गेल्या चार दिवसांपासून आमरण उपोषणाला बसले होते.या उपोषणाची माहिती मिळताच सोलापूर लोकसभा खासदार प्रणिती ताई शिंदे यांनी उपोषण स्थळी भेट देऊन खजूरकर यांच्या प्रकृतीची विचारपूस केली आणि त्यांच्या मागण्या जाणून घेतल्या.

डोणगाव येथे प्राथमिक आरोग्य केंद्र आधीच मंजूर असून शासनस्तरावर निर्णय लांबणीवर पडत असल्याची माहिती खजूरकर यांनी खासदार प्रणिती शिंदे यांना दिली.जिल्हा आरोग्य अधिकारी संतोष नवले यांच्याकडून अपेक्षित दखल न घेतल्यामुळेच त्यांनी उपोषणाचा मार्ग अवलंबल्याचे सांगितले.

खासदार प्रणिती शिंदे यांनी तातडीने जिल्हा परिषद मुख्य कार्यकारी अधिकारी (CEO) कुलदीप जंगम यांच्याशी दूरध्वनीद्वारे संपर्क साधून प्रकरणाची सविस्तर माहिती दिली आणि त्वरीत उपाययोजना करण्याच्या सूचना केल्या. त्यानुसार सीईओ जंगम यांनी तत्परता दाखवत जिल्हा आरोग्य अधिकारी श्री. नवले यांच्याकडे लेखी अहवाल मागवला. एक महिन्याच्या आत शासनस्तरावर पाठपुरावा करून डोणगाव प्राथमिक आरोग्य केंद्र सुरू करण्याचे आश्वासन सीईओ जंगम यांनी स्वतः उपोषणकर्ते खजूरकर यांना भ्रमणध्वनीद्वारे दिले.

त्यानंतर जिल्हा आरोग्य अधिकारी संतोष नवले यांनीही लेखी स्वरूपात सहीसह हमी दिल्याने उपोषणाची सांगता करण्यात आली.

दरम्यान गेल्या चार दिवसांपासून ग्रामस्थ, युवक आणि विविध राजकीय पदाधिकारी यांनी उपोषण सोडवण्यासाठी प्रयत्नांची पराकाष्ठा केली.खासदार प्रणिती शिंदे यांच्या सूचनेनुसार उत्तर सोलापूर तालुका काँग्रेस कमिटीचे अध्यक्ष भारत जाधव यांनी जिल्हा प्रशासन, उपोषणकर्ते आणि ग्रामस्थ यांच्यात समन्वय साधून उपोषण स्थळी अखेरपर्यंत उपस्थित राहून मध्यस्थाची भूमिका बजावली.

याप्रसंगी तालुका प्राथमिक आरोग्य अधिकारी श्री.आईवळे, डॉ.मुंदडा, उपकेंद्रातील कर्मचारी तसेच डोणगाव ग्रामपंचायतीचे सरपंच बाबा आमले, उपसरपंच रमेश पाटील,लता जावीर, राजाराम कोलते,राहुल सुरवसे,बन्सी मेटे, भैय्या रसाळ,प्रमोद चराटे,गोटू गायकवाड, कोंडीबा जगदाळे,बबलू मेटे,श्रीखंड खजूरकर, राजू सुरवसे, रमाकांत चराटे, माजी उपसरपंच सौ.अश्विनी सुरवसे,सौ. संगीता जगदाळे,बाळासाहेब पाटील, बाबा मोहिते,अंतू चौगुले,विठ्ठल वाघमारे, मारप्पा साबळे,अर्जुन ननवरे,खाजासाब नदाफ यांसह अनेक ग्रामस्थांनी प्रयत्न केले.

खासदार प्रणिती शिंदे यांच्या तातडीच्या हस्तक्षेपामुळे डोणगाव प्राथमिक आरोग्य केंद्र सुरू करण्याचा मार्ग मोकळा होत असल्याने ग्रामस्थांनी समाधान व्यक्त केले आहे.