मंगळवेढा पोलिसांचा प्रशंसनीय उपक्रम : विविध गुन्ह्यात जप्त केलेल्या 44 मोटारसायकली मूळ मालकांना परत
धूळ खात पडलेल्या जप्त मोटारसायकलींचा शोध पूर्ण; 44 वाहनमालकांच्या चेहऱ्यावर आनंदाची लहर
मंगळवेढा /ज्ञानप्रवाह न्यूज : मंगळवेढा पोलिस प्रशासनाने विविध गुन्हे तसेच कोरोना काळातील कारवाईत जप्त करण्यात आलेल्या 44 मोटारसायकलींचा शोध घेऊन त्या मूळ मालकांकडे सुपूर्द केल्याने नागरिकांमधून समाधानाची भावना व्यक्त होत आहे. विशेष म्हणजे याआधीही दोन महिन्यांपूर्वी 50 मोटारसायकली मालकांना परत करण्यात आल्या होत्या.
कोरोना महामारीच्या काळात संचारबंदी असताना काही नागरिकांनी विनाकारण रस्त्यावर फिरत असल्याने त्यांच्या दुचाकी जप्त करून पोलिस स्टेशनच्या आवारात ठेवण्यात आल्या होत्या. त्यासोबतच इतर विविध गुन्ह्यांमध्येही अनेक मोटारसायकली जप्त करण्यात आल्या. परिणामी मंगळवेढा पोलिस स्टेशनचे आवार मोटारसायकलींनी अक्षरशः भरून गेले होते.
या वाढत्या जप्त वाहनांच्या समस्या ओळखून कोल्हापूर परिक्षेत्राचे आयजी सुनील फुलारी व पोलिस अधीक्षक अतुल कुलकर्णी यांच्या मार्गदर्शनाखाली ही प्रक्रिया गतीमान करण्यात आली. त्यानुसार गेल्या अनेक वर्षांपासून धूळ खात पडलेल्या या मोटारसायकलींचे मालक शोधून त्यांची पडताळणी करण्यात आली.
डीवायएसपी डॉ. बसवराज शिवपुजे व पोलिस निरीक्षक दत्तात्रय बोरीगिड्डे यांच्या पुढाकाराने या 44 मोटारसायकली त्यांच्या मालकांच्या ताब्यात देण्यात आल्या. वाहन मिळताच मालकांच्या चेहऱ्यावर समाधान आणि आनंद झळकत होता.
