बऱ्याच जणांसाठी इंग्लिश खाडीचा विजय हा एकदाच साध्य असतो, पण सलग दुसऱ्या वर्षी पोहून सहिष्णू याला अपवाद ठरला

पुन्हा इंग्लिश खाडीत झेपावला भारताचा अभिमान: सहिष्णू जाधव

डोव्हर – इंग्लंड – ३१ जुलै २०२४/ज्ञानप्रवाह न्यूज – सहिष्णू जाधव या पंढरपूरच्या १६ वर्षीय मुलाने दुसऱ्यांदा इंग्लिश खाडी पोहून जाण्याचा भीम पराक्रम केला आहे. बऱ्याच जणांसाठी इंग्लिश खाडीचा विजय हा एकदाच साध्य असतो, पण सलग दुसऱ्या वर्षी पोहून सहिष्णू ह्याला अपवाद ठरला आहे. हा धाडसी जलतरणपटू २९ जुलै २०२४ रोजी पुन्हा इंग्लिश खाडी पोहून पार करून गेला.सदरचा सहिष्णू जाधव हा युवक पंढरपूर येथील भाऊसाहेब महाराज भोसेकर यांचा नातू आहे.

गेल्या वर्षी, सहिष्णूने सहा व्यक्तींच्या टीमसोबत १६ तासांच्या संघर्षानंतर इंग्रजी खाडी पार केली होती. यावर्षी त्याने तीन जणांच्या टीमसोबत मागच्या वर्षीपेक्षा कमी वेळेत म्हणजे १५ तास ८ मिनिटांत हे अंतर पार केले. सहिष्णू हा दोन वेळा इंग्रजी खाडी पार करणारा सर्वात तरुण भारतीय असून आजवरच्या इतिहासात केवळ ६५ भारतीयांनी इंग्लिश खाडी पोहली आहे. त्याच्या या उल्लेखनीय कामगिरीने भारतीयांची मान उंचावली आहे आणि त्याचबरोबर असंख्य तरुण खेळाडूंना प्रेरणा देखील दिली आहे.

खाडी पोहून पूर्ण केल्यानंतर त्याच्या कुटुंबीयांनी त्याचे औक्षण करून अभिनंदन केले तेव्हा तो सांगत होता की – ओपन वॉटर स्विमिंग हा मुळातच अवघड क्रीडा प्रकार असून त्यात इंग्लिश खाडी ही तर अत्यंत खडतर अशा परीक्षेला सामोरे जायला लावणारी आहे. ह्या पूर्ण प्रवासात मला माझ्या शारीरिक आणि मानसिक अश्या दोन्ही मर्यादा वाढवाव्या लागल्या. ज्या क्षणी मी त्या थंड चॅनलच्या पाण्यात उडी घेतली, तेव्हा ते एप्रिल मधील अचानक आलेल्या पावसासारखे वाटले – धक्कादायक आणि तीव्र. प्रत्येक स्ट्रोक हा एक लढा होता. काही क्षण असे आले जेव्हा मला आपण समुद्राशी कबड्डीचा न संपणारा खेळ खेळत असल्यासारखे वाटले . समुद्र मला मागे खेचत होता तर मी स्वतःला पुढे ढकलत होते आणि जेलीफिश? बरं, ते त्या नातेवाईकांसारखे होते जे कुटुंबाच्या समारंभात आगंतुकपणे येतात – त्रासदायक पण तरी manageable!

मी अशा असंख्य भारतीय व्यक्तींविषयी वाचन केल्यानंतर पटलेली आणि कळलेली गोष्ट म्हणजे त्यांनी अशक्य वाटणाऱ्या अडथळ्यांवर मात करूनच विजय मिळवलेला आहे. पोहताना येणाऱ्या अडथळ्यांवर त्यांचा आदर्श समोर ठेवत मी मात केली. मी माझ्या प्रशिक्षणाने माझ्यात विकसित झालेली शिस्त, आणि भारतीय योग्यांप्रमाणे आपल्या ध्येयाकडे पूर्ण लक्ष केंद्रित करून केलेलं समर्पण ह्या गोष्टींना समोर ठेऊन पोहत राहिलो , मला पुढे नेत राहिलो . भारताचे प्रतिनिधित्व करण्याचा अभिमान आणि जगाला आपण भारतीय काय करू शकतो हे दाखवण्याची मिळालेली संधी, याने मला माझे सर्वस्व देण्यास प्रवृत्त केले.

हे यश माझे एकट्याचे नाही तर त्या प्रत्येक व्यक्तीचे आहे ज्यांनी मला पाठिंबा दिला, माझे कुटुंब, माझी टीम आणि आपल्या मातीचे आहे. दृढनिश्चय, योग्य प्रशिक्षण, आणि आपल्या इच्छाशक्तीच्या बळाने, आपण जागतिक मंचावर महानता साध्य करू शकतो.

जलतरण इतिहासातील प्रवास:

सहिष्णूचा जलतरणातील प्रवास मागील वर्षी म्हणजे त्याच्या वयाच्या १५ व्या वर्षी सुरु झाला. इंग्लिश खाडी, वाहते प्रवाह (currents) आणि अनिश्चित हवामान हे त्याच्या प्रसिद्ध वैशिष्ट्यांपैकी आहेत, जलतरणपटूंसाठी ही एक आव्हानात्मक परिक्षा असते.

प्रशिक्षण आणि अभ्यासाचे संतुलन:

सहिष्णूचे प्रशिक्षण कठोर होते, त्याच्या प्रशिक्षकांनी त्याची कौशल्ये आणि मानसिक तग धरण्याची क्षमता वाढविण्यात महत्वाची भूमिका बजावली. त्याच्या प्रशिक्षणामध्ये लांब अंतराचे जलतरण, थंड पाण्यातील प्रशिक्षण, आणि खाडीच्या स्थितीचे अनुकरण समाविष्ट होते.

टीमचे जलतरण २९ जुलै रोजी पहाटे सुरु झाले, आणि प्रवाह, तापमान बदल, आणि थकव्याच्या अडचणींना तोंड देत त्यांनी हा प्रवास संध्याकाळी पूर्ण केला.

यावर्षी सहिष्णूसाठी खरे आव्हान होते ते त्याच्या शाळेच्या अंतिम वर्षाच्या परीक्षा आणि प्रशिक्षण यांचे संतुलन साधणे. गेल्यावर्षी अनुभवलेल्या जेलीफिश दंशामुळे “जेलिफिश अजूनही भितीदायकच आहेत ,” असे सहिष्णूने मान्य केले, “पण त्यापेक्षा अभ्यास आणि प्रशिक्षण यांचा मेळ घालणे ही माझी तारेवरची कसरत होती. मी आज एक परीक्षा दिली, आणि लगेच जलतरण पात्रता परीक्षेसाठी गेलो आणि पुन्हा दुसऱ्या दिवशी दुसरी परीक्षा दिली. हे कठीण होते, पण यामुळे असाध्य ते साध्य करावयासाठी लागणाऱ्या प्रयत्नांची ती नांदीच होती असे मला वाटले.मला ही संधी मिळाली, हे माझे भाग्य आहे, तो विनम्रपणे म्हणाला. मी हे साध्य करू शकतो, तर योग्य सहकार्य आणि सुविधा मिळाल्यास इतर मंडळी काय काय साध्य करू शकतील, हा विचार करा.

जलतरणाची आव्हाने:

२९ जुलैच्या जलतरणात खूप आव्हाने होती. शेवटच्या दोन तासांत सात फुटांच्या मोठ्या लाटा आणि प्रवाह होते ज्यामुळे पायलटला जलतरण रद्द करावे लागेल अशी परिस्थिती शेवटच्या काही तासांमधे निर्माण झाली होती. प्रवाह, वारे, आणि मोठ्या लाटांमुळे – मार्ग साधारणपणे इंग्रजी S आकाराचा असतो. हा प्रवास २१ मैलांचा होता, पण प्रवाह आणि उच्च लाटांमुळे २९.८ मैल (४८ किमी) झाला.

अनेकांसाठी प्रेरणा:

सहिष्णूच्या यशस्वी इंग्रजी खाडी रिले जलतरणाची बातमी भारतभर झपाट्याने पसरली, सोशल मीडिया प्रशंसेच्या संदेशांनी भरून गेली. लोकांनी त्याने अडचणींच्या प्रवासात दाखवलेल्या दृढ निश्चयाचे कौतुक केले.

सहिष्णूचे यश भारतभरातील तरुण खेळाडूंना मोठे स्वप्न पाहण्याची प्रेरणा देईल. त्याची कथा दृढ संकल्पाची आणि स्वतःच्या क्षमतेवरच्या अविचल विश्वासाची साक्ष आहे. ही घटना भारतीय क्रीडा प्रेमींना योग्य संधी आणि सहकार्य मिळाल्यास ते काय साध्य करू शकतात यावर प्रकाश टाकते. सहिष्णूचे यश संपूर्ण राष्ट्रभर साजरे केले जाईल. त्याचा प्रवास हेच सांगतो की, यश साध्य करण्यासाठी वयाचा अडथळा नसतो. समर्पण आणि कष्टाने स्वप्ने साकार होतात. सहिष्णूचे इंग्लिश खाडी जलतरण रिलेमधील अद्वितीय कर्तृत्व भारतासाठी, पुण्यासाठी, आणि महाराष्ट्रासाठी अपार अभिमानाचे स्त्रोत आहे.

सहिष्णु लवकरच एकट्याने इंग्रजी खाडी जाण्याची तयारी करत असून, त्याच्या या धाडसी प्रयत्नासाठी आमच्या मनःपूर्वक शुभेच्छा त्याच्यासोबत आहेत.

पुणे, पंढरपूर, किंवा जगाच्या कुठल्याही कोपऱ्यातील लोकांसाठी सहिष्णूने दाखवून दिले की स्वप्नं साध्य करण्यासाठी समर्पण, कष्ट, आणि अनिश्चिततेमध्ये उडी मारण्याची तयारी आवश्यक आहे. दृढ संकल्प आणि उदात्त उद्देशाने, सामान्य माणसे असामान्य गोष्टी साध्य करू शकतात.

शेवटी, खाडी पोहून पार करणे हे क्रिकेट सामन्याच्या शेवटच्या चेंडूवर षटकार मारण्यापेक्षा मला चांगले वाटले. पण अधिक महत्त्वाचे म्हणजे, याने मला शिकवले की आपल्या मर्यादा अनेकदा केवळ भ्रम असतात आणि चिकाटीने आपण आपल्या विचारांपेक्षा पुढे जाऊ शकतो.

तर, सर्व तरुण स्वप्नवेड्यांसाठी – तुम्ही मोठ्या शहरातून असाल किंवा छोट्या गावातून, तुमचे ध्येय समुद्र पोहणे असो किंवा पर्वत चढणे , कोणत्या खेळात पारंगत होणे असो किंवा अभ्यासात प्राविण्य मिळवणे असो – हे लक्षात ठेवा: तुम्ही कोणत्याही अडचणींवर मात करू शकता आणि भारताची शान वाढवू शकता !