शिक्षकांकडे शुद्ध आचरण आणि विचार स्पष्टपणे मांडण्याचे सामर्थ्य असावे -प्राचार्य डॉ.संजय चाकणे

शिक्षकांकडे शुद्ध आचरण आणि विचार स्पष्टपणे मांडण्याचे सामर्थ्य असावे -प्राचार्य डॉ.संजय चाकणे Teachers should have ability to express pure conduct and thoughts clearly – Principal Dr. Sanjay Chakne

स्वेरीमध्ये शिक्षक दिन साजरा

 पंढरपूर,दि.०५/०९/२०२१ - शिक्षकांकडे शुद्ध आचरण आणि विचार स्पष्टपणे मांडण्याचे सामर्थ्य असणे अत्यंत आवश्यक आहे. आज भारतीय समाजव्यवस्थेला शिक्षकांमुळे अधिक महत्त्व प्राप्त झालेले आहे. स्पर्धेचे युग पाहता सध्याच्या शिक्षण पद्धतीत आमूलाग्र बदल करणे आवश्यक बनले आहे. नवीन शैक्षणिक धोरणातून शिक्षणाचे भारतीयीकरण करण्याचे कार्य हे उत्तम दर्जाचे आहे. क्रेडीट बेस्ड एज्युकेशन शिक्षण पद्धती अमलात आणण्याची गरज आहे. भविष्यातील नोकरी व उद्योग पाहता शिक्षण पद्धतीत अमुलाग्र बदल होणे अपेक्षित आहे. यासाठी राष्ट्र उभारणी मध्ये शिक्षकांचे योगदान व भूमिका अत्यंत महत्वाची आहे. विद्यार्थी हा शिक्षकांची प्रत्येक कृती अमलात आणत असतो. त्याचे शिक्षकावर बारकाईने लक्ष असते. यासाठी शिक्षकांनी आपली कृती, आपले विचार आणि आचार हे सर्वोत्तम ठेवले पाहिजेत, असे प्रतिपादन इंदापूरच्या आर्ट्स, सायन्स अँड कॉमर्स कॉलेजचे प्राचार्य डॉ. संजय चाकणे यांनी केले. 

  गोपाळपूर ,ता.पंढरपूर येथील श्री विठ्ठल एज्युकेशन अँड रिसर्च इन्स्टिटयूट, पंढरपूर संचलित अभियांत्रिकी महाविद्यालयातर्फे भारतरत्न डॉ.सर्वपल्ली राधाकृष्णन यांच्या १३४ व्या जयंतीनिमित्त आयोजिलेल्या शिक्षक दिनाच्या ऑनलाईन मार्गदर्शनपर कार्यक्रमात प्रमुख पाहुणे म्हणून इंदापूरच्या आर्ट्स, सायन्स अँड कॉमर्स कॉलेजचे प्राचार्य डॉ.संजय चाकणे यांनी गुगल मिट या ऍपच्या माध्यमातून ‘राष्ट्र उभारणी आणि शिक्षक’ या विषयावर विद्यार्थी,पालक व प्राध्यापकांना ऑनलाईन मार्गदर्शन करत होते.

  प्रास्ताविकात संस्थेचे संस्थापक सचिव व अभियांत्रिकी महाविद्यालयाचे प्राचार्य डॉ.बी.पी. रोंगे यांनी पाहुण्यांचे स्वागत करून शिक्षकांची भूमिका स्पष्ट करताना 'शिक्षकांची भूमिका ही समाजाला नेहमी योग्य दिशा देणारी असावी ,असे सांगितले.

  यावेळी संस्थेचे अध्यक्ष नामदेव कागदे ,माजी अध्यक्ष व विश्वस्त धनंजय सालविठ्ठल,एन.एम. पाटील,संस्थेअंतर्गत इतर महाविद्यालयांचे प्राचार्य, अधिष्ठाता,विभागप्रमुख,प्राध्यापक वर्ग उपस्थित होते.कोरोनाच्या पार्श्वभूमीवर महाविद्यालयाच्या पोर्चमध्ये प्रतिमेचे पूजन करण्यात आले.या ऑनलाईन मार्गदर्शनपर कार्यक्रमाचे प्रा.यशपाल खेडकर यांनी सूत्रसंचालन केले.संस्थेचे ज्येष्ठ विश्वस्त दादासाहेब रोंगे यांनी आभार मानले.