ज्याने भारताला वर्ल्डकप जिंकून दिला तो होणार पाकिस्तानचा कोच, जाणून घ्या कोण बनणार नवीन प्रशिक्षक


कराची : पाकिस्तान क्रिकेट संघाने आयसीसी टी-२० विश्वचषक स्पर्धेत सलग दोन विजय मिळविल्याने त्यांचा आत्मविश्वास दुणावला आहे. भारत आणि न्यूझीलंड संघाचा पराभव करत त्यांनी उपांत्य फेरीचा मार्ग आणखी सुकर केला आहे. या पार्श्वभूमीवर पाकिस्तान संघासाठी मोठी बातमी समोर येत आहे. इंग्रजी वृत्तपत्र इंडियन एक्सप्रेसने दिलेल्या वृत्तानुसार, या विश्वचषकानंतर पाकिस्तान क्रिकेट संघाला कायमस्वरूपी मुख्य प्रशिक्षक मिळू शकतो.

दक्षिण आफ्रिकेचे गॅरी कर्स्टन विश्वचषकानंतर पाकिस्तानच्या मुख्य प्रशिक्षकाची जबाबदारी स्वीकारू शकतात, अशी माहिती समोर येत आहे. कर्स्टनशिवाय या शर्यतीत विराट कोहलीचा आयपीएल संघ रॉयल चॅलेंजर्स बेंगळुरूचे मुख्य प्रशिक्षक सायमन कॅटिच आणि दोन वेळा इंग्लंडचे प्रशिक्षक राहिलेले पीटर मोरेस यांचीही नावे आहेत. पाकिस्तान क्रिकेट बोर्डाचे अध्यक्ष रमीझ राजा परदेशी प्रशिक्षक निवडण्याच्या बाजूने आहेत. कर्स्टन हे यापूर्वी भारतीय क्रिकेट संघाचे प्रशिक्षक राहिले आहेत. २००८ ते २०११ या काळात त्यांनी ही जबाबदारी सांभाळली. त्यांच्या मार्गदर्शनाखाली टीम इंडियाने एकदिवसीय विश्वचषक जिंकला होता. तसेच कसोटीतही नंबर-१ बनला होता. कर्स्टनने आयपीएलमध्ये आरसीबीसोबतही काम केले आहे. त्यामुळे कर्स्टनला आंतरराष्ट्रीय क्रइकेटचा दांडगा अनुभव आहे. त्यामुळे आता पाकिस्तानचे प्रशिक्षपद स्विकारल्यावर संघात नेमके कोणते बदल होतात, याकडे सर्वांचेच लक्ष राहील. कारण आतापर्यंत पाकिस्तानचे खेळाडू आणि परदेशी प्रशिक्षक यांचे सुत चांगले जुळल्याचे पाहायला मिळालेले नाही.

मिसबाहने सोडले पद
रमीझ राजा यांचा पाकिस्तान क्रिकेट बोर्डात प्रवेश झाल्यानंतर मिसबाह-उल-हकने विश्वचषकापूर्वी संघाच्या मुख्य प्रशिक्षकपदाचा राजीनामा दिला. त्यांच्यासोबत गोलंदाजी प्रशिक्षक वकार युनूस यांनीही आपले पद सोडले. त्यानंतर संघाने ऑस्ट्रेलियाच्या मॅथ्यू हेडनचा कोचिंग स्टाफमध्ये समावेश केला. सध्या पाकिस्तानचा माजी ऑफस्पिनर सकलेन मुश्ताक आणि मिसबाह हे संघाचे अंतरिम प्रशिक्षक असून त्यांच्या मार्गदर्शनाखाली संघ विश्वचषक स्पर्धेत सहभागी झाला आहे. विश्वचषकात पाकिस्तानने भारताला कधीही हरवले नव्हते, पण यावेळी बाबर आझमच्या नेतृत्वाखाली संघाने हा इतिहास बदलून टाकला.



Source link

Leave a Reply

Your email address will not be published. Required fields are marked *

%d bloggers like this: