पंढरपूर पालिका निवडणूक: प्रभाग ७ (ब) मध्ये २० डिसेंबरला मतदान; पाच उमेदवार रिंगणात
प्रभाग क्रमांक ७ (ब) साठी २० डिसेंबरला मतदान सहा केंद्रांवर ईव्हीएमद्वारे प्रक्रिया
पंढरपूर /उमाका/ ज्ञानप्रवाह न्यूज,दि.१७ : पंढरपूर नगरपरिषद निवडणुकीसाठी राज्य निवडणूक आयोगाकडून सुधारित निवडणूक कार्यक्रम जाहीर करण्यात आला असून प्रभाग क्रमांक ७ (ब) मध्ये दि.२० डिसेंबर २०२५ रोजी मतदान होणार आहे. या प्रभागात नगरसेवक पदासाठी पाच उमेदवार निवडणूक रिंगणात असून, मतदारांसाठी सहा मतदान केंद्रांची व्यवस्था करण्यात आली आहे, अशी माहिती सहाय्यक निवडणूक निर्णय अधिकारी तथा पंढरपूर नगरपरिषदेचे मुख्याधिकारी महेश रोकडे यांनी दिली.
या निवडणुकीसाठी ईव्हीएम मतदान यंत्र सील करण्याची प्रक्रिया १९ डिसेंबर २०२५ रोजी पारदर्शक व नियमबद्ध पद्धतीने पार पाडण्यात येणार आहे. प्रभाग क्रमांक ७ (ब) साठी नियुक्त निवडणूक अधिकारी व कर्मचाऱ्यांना आवश्यक ते निवडणूक प्रशिक्षण देण्यात आले आहे.सहा मतदान केंद्रांसाठी प्रत्येकी एक याप्रमाणे सहा ईव्हीएम यंत्रे उपलब्ध राहणार असून त्यासोबतच चार राखीव ईव्हीएम यंत्रांची अतिरिक्त व्यवस्था करण्यात आली आहे.
प्रभाग क्रमांक ७ (ब) मधील मतदारांना सकाळी ७.३० ते सायंकाळी ५.३० वाजेपर्यंत मतदान करता येणार आहे. मतदान प्रक्रिया शांततापूर्ण सुरळीत व पारदर्शकपणे पार पाडण्यासाठी नगरपालिका प्रशासनाची संपूर्ण यंत्रणा सज्ज असल्याचेही मुख्याधिकारी महेश रोकडे यांनी स्पष्ट केले.
