डॉ.बाबा आढावांचा सामाजिक वारसा पुढे नेऊ – उपसभापती डॉ.नीलम गोऱ्हे यांची आढाव कुटुंबियांना ग्वाही
बाबा आढावांचे विचार अमर; सामाजिक चळवळ अखंड सुरू ठेवण्याचा निर्धार – डॉ.नीलम गोऱ्हे
पुणे/ ज्ञानप्रवाह न्यूज,दि.१६ डिसेंबर २०२५ : ज्येष्ठ सामाजिक कार्यकर्ते व कष्टकऱ्यांचे आधारस्तंभ डॉ.बाबा आढाव यांचे निधन झाले असले तरी त्यांचे विचार,संघर्ष आणि कार्य सदैव प्रेरणादायी राहतील. बाबांनी आयुष्यभर जोपासलेली सामाजिक चळवळ यापुढेही अखंड सुरू राहावी,यासाठी आम्ही सर्वतोपरी कार्यकर्त्यांच्या पाठीशी खंबीरपणे उभे राहू,अशी ठाम ग्वाही विधानपरिषदेच्या उपसभापती डॉ.नीलम गोऱ्हे यांनी दिली.
डॉ.बाबा आढाव यांच्या निधनानंतर उपसभापती डॉ.नीलम गोऱ्हे यांनी त्यांच्या निवासस्थानी भेट देत शिलाताई आढाव व कुटुंबीयांचे तसेच कार्यकर्त्यांचे सांत्वन केले.या भेटी दरम्यान त्या भावूक झाल्या. दुःख व्यक्त करण्यापुरते न थांबता बाबांनी उभारलेल्या सामाजिक चळवळीला पुढे नेण्यासाठी शासनस्तरावर आणि सामाजिक पातळीवर आवश्यक ते सहकार्य करण्याचा निर्धार त्यांनी यावेळी व्यक्त केला.
डॉ.नीलम गोऱ्हे म्हणाल्या,डॉ.बाबा आढाव हे केवळ एक व्यक्ती नव्हते तर एक जिवंत संस्था होती.एक गाव–एक पाणवठा आंदोलन असो वा हमाल-मापाडी कामगारांचा संघर्ष, त्यांनी नेहमीच शोषित, वंचित आणि कष्टकऱ्यांचा आवाज बुलंद केला.आज डॉ.बाबा आढाव आपल्यात नसले तरी त्यांनी पेटवलेली सामाजिक जाणीव विझू देता कामा नये.बाबांची अपूर्ण स्वप्ने पूर्ण करण्यासाठी शासन आणि समाज म्हणून आम्ही तुमच्यासोबत आहोत.
यावेळी डॉ.नीलम गोऱ्हे यांनी बाबांच्या आठवणींना उजाळा देत कुटुंबीयांना धीर दिला.बाबांचा लढाऊ,निर्भीड आणि समाजाभिमुख वारसा जपणे हीच त्यांना खरी आदरांजली ठरेल, अशी भावना त्यांनी व्यक्त केली.
या प्रसंगी आढाव कुटुंबीयांसह विविध सामाजिक चळवळींतील कार्यकर्ते, शिवसेना स्थानिक पदाधिकारी श्री. सुधीर कुरुमकर तसेच स्थानिक शिवसैनिक उपस्थित होते.
