नवी दिल्ली : जैन समाजात वाढत्या कौटुंबिक वाद आणि घटस्फोटांच्या घटनांचा सखोल अभ्यास करून त्यावर प्रभावी उपाययोजना राबविण्यासाठी डॉ. विनायक अशोक लुनिया यांच्या नेतृत्वाखाली जैन मीडिया सोशल वेलफेअर सोसायटी विशेष अभियान सुरू करणार आहे. या उपक्रमांतर्गत समाजातील कौटुंबिक सौहार्द जपण्यासाठी डिजिटल फॅमिली काउन्सेलिंग सेंटर स्थापन करण्याचा महत्त्वपूर्ण निर्णय घेण्यात आला असून, ऑगस्टपर्यंत ते कार्यान्वित होण्याची शक्यता आहे.
अलीकडेच आयोजित करण्यात आलेल्या बैठकीत देशातील ११ राज्यांतील प्रतिनिधींनी सहभाग घेतला. बैठकीत जैन समाजातील वाढत्या वैवाहिक आणि कौटुंबिक वादांच्या मूळ कारणांचा अभ्यास करून त्यावर दीर्घकालीन उपाययोजना करण्यासाठी मानसशास्त्रज्ञ, कायदेतज्ज्ञ, सामाजिक कार्यकर्ते आणि कौटुंबिक समुपदेशक यांची तज्ज्ञ समिती स्थापन करण्याचा निर्णय घेण्यात आला.
डॉ. विनायक अशोक लुनिया यांनी सांगितले की, वाढते कौटुंबिक विघटन केवळ न्यायालयीन प्रक्रियेद्वारे कमी होऊ शकत नाही. त्यासाठी संवाद, समुपदेशन आणि सामाजिक जनजागृती अत्यावश्यक आहे. याच उद्देशाने संस्था फॅमिली काउन्सेलिंग, कायदेविषयक जनजागृती शिबिरे आणि सामाजिक न्यायाशी संबंधित विविध उपक्रम राबविणार आहे.
प्रस्तावित डिजिटल फॅमिली काउन्सेलिंग सेंटरच्या माध्यमातून देशभरातील जैन कुटुंबांना ऑनलाइन समुपदेशनाची सुविधा उपलब्ध करून दिली जाणार आहे. कौटुंबिक संवाद वाढवून वादांचे वेळेवर आणि सामंजस्याने निराकरण करणे, तसेच घटस्फोटासारखी परिस्थिती निर्माण होण्यापूर्वीच मतभेद मिटविणे, हा या उपक्रमाचा प्रमुख उद्देश असल्याचे संस्थेने स्पष्ट केले.
बैठकीला उपस्थित प्रतिनिधींनी या उपक्रमाचे स्वागत करत, जैन समाजातील कौटुंबिक मूल्ये अधिक बळकट करण्याच्या दिशेने हे महत्त्वपूर्ण आणि सकारात्मक पाऊल असल्याचे मत व्यक्त केले.
