आषाढी यात्रेप्रमाणे कार्तिकी यात्रेत भाविकांना सोई सुविधा – सह अध्यक्ष गहिनीनाथ महाराज औसेकर
दि.26 ऑक्टोंबर पासून 24 तास दर्शन
मंदिर जतन व संवर्धन कामाबाबत विभागीय आयुक्त यांच्या अध्यक्षतेखाली बैठक
पंढरपूर/ज्ञानप्रवाह न्यूज,दि.05 :- कार्तिकी शुध्द एकादशी रविवार दि.02 नोव्हेंबर 2025 रोजी असून यात्रा कालावधी दि.22 ऑक्टो. ते 05 नोव्हें. असा राहणार आहे. या यात्रा कालावधीत सुमारे आठ ते दहा लाख भाविक श्री विठ्ठल रुक्मिणी मातेच्या दर्शनासाठी येतात.येणाऱ्या वारकरी भाविकांना मंदिर समितीकडून आषाढी यात्रेप्रमाणेच आवश्यक सोयीसुविधा उपलब्ध करून देण्यात येणार असल्याची माहिती मंदिर समितीचे सहअध्यक्ष गहिनीनाथ महाराज औसेकर यांनी दिली.
कार्तिकी यात्रा पूर्व नियोजनाबाबत मंदिर समितीची बैठक श्री विठ्ठल रुक्मिणी भक्त निवास येथे संपन्न झाली.या बैठकीसाठी सदस्या शकुंतलाताई नडगिरे, डॉ.दिनेश कुमार कदम,संभाजी शिंदे,ह.भ.प.ज्ञानेश्वर देशमुख (जळगांवकर), ॲड.माधवी निगडे, ह.भ.प.प्रकाश जवंजाळ,ह.भ.प. शिवाजीराव मोरे,कार्यकारी अधिकारी राजेंद्र शेळके,प्रभारी व्यवस्थापक पृथ्वीराज राऊत तसेच पुरातत्व विभागाचे डॉ.विलास वाहणे,कार्यकारी अभियंता श्रीनिवास गुजरे, वास्तुविशारद तेजस्विनी आफळे, जतन संवर्धन कामाचे ठेकेदार व सर्व खाते प्रमुख उपस्थित होते.
यावेळी मंदिर समितीचे सहअध्यक्ष औसेकर महाराज म्हणाले की,रविवार दि 2 नोव्हेंबर रोजी पहाटे 2.20 वाजता राज्याचे उपमुख्यमंत्री व मानाचे वारकरी यांचे हस्ते सपत्नीक श्रीची शासकीय महापुजा संपन्न होणार आहे.या यात्रा कालावधीत वारकरी भाविकांना श्री विठ्ठल रुक्मिणी मातेचे सुरळीत व सुलभ दर्शन व्हावे यासाठी परंपरेनुसार दि.26 ऑक्टोंबर पासून 24 तास दर्शन उपलब्ध करण्यात येणार आहे. मंदिर जतन-संवर्धन कामाबाबत विभागीय आयुक्त पुणे यांच्या अध्यक्षतेखाली बैठक आयोजित करण्यात येणार असल्याचेही त्यांनी सांगितले.
यावेळी मंदिर समिती कार्यकारी अधिकारी राजेंद्र शेळके यांनी बैठकीत कार्तिकी एकादशीला राज्याचे उपमुख्यमंत्री यांच्या हस्ते श्रींची शासकीय महापूजा करण्याची प्रथा आहे.परंतु राज्याच्या मंत्रिमंडळात सध्या दोन उपमुख्यमंत्री असल्याने कोणत्या मान्यवरांच्या हस्ते पूजा करावी याबाबत शासनाकडून मार्गदर्शन मागविणे तसेच दि. 26 ऑक्टोंबर ते 09 नोव्हेंबर या कालावधीत 24 तास दर्शन उपलब्ध करून देणे.
श्री विठ्ठल रूक्मिणी मंदिर व परिवार देवता मंदिराचे जतन-संवर्धन कामाच्या अनुषंगाने विभागीय आयुक्त पुणे यांच्या अध्यक्षतेखाली बैठक आयोजित करणे, प्रस्तावित पंढरपूर विकास आराखड्यामध्ये मुख दर्शनरांग,प्रशासकीय कार्यालय, अन्नछत्र व इतर अनुषंगीक सोई सुविधा उपलब्ध करून देण्याबाबत जिल्हाधिकारी यांना प्रस्ताव देणे, कम्युनिटी रेडीओ केंद्र स्थापन करण्यासाठी 4 कोटी रुपये इतका निधी उपलब्ध करून देणेबाबत शासनास प्रस्ताव देणे,एमटीडीसी भक्तनिवासाचा करारनामा वाढवून घेणेबाबत शासनास प्रस्ताव देणे इत्यादी निर्णय घेण्यात आल्याचे सांगितले.
तसेच कार्तिकी यात्रेला भाविकांना देण्यात येणा-या सोई सुविधांचा आढावा घेण्यात आला.
