Fate Scam: ‘फटे स्कॅम’ची व्याप्ती मोठी; डॉक्टर, पोलीस, पत्रकारांसह भले भले फसले! दोन आरोपी अटकेत

सोलापूर: बार्शीतल्या ‘फटे स्कॅम’ (Fate Scam) प्रकरणात पोलिसांनी विशालचे वडील आणि भावाला शुक्रवारी मध्यरात्री सांगोला येथून अटक केली आहे. स्थानिक गुन्हे शाखेने या दोघांना ताब्यात घेतलं. कोट्यवधीच्या रुपयांच्या फसवणूक प्रकरणी विशाल फटेसोबत त्याच्या कुटुंबातील पाचही सदस्य फरार झाले होते. त्यापैकी विशालचे वडील आणि भाऊ अशा दोघांना अटक करून बार्शी न्यायालयासमोर हजर केले असता त्यांना चार दिवसांची पोलीस कोठडी सुनावण्यात आली आहे.

बार्शी शहर पोलिस ठाण्यात तक्रारींचा आता पाऊस पडत आहे. गुन्हा दाखल होत असताना केवळ ५ लोकांनी यासंदर्भात तक्रार दिली होती. मात्र, शुक्रवारी अन् शनिवारी या दोन दिवसांत आणखी ४० लोकांनी आपली फसवणूक झाल्याची माहिती पोलिसांना दिली आहे. त्यामुळे या गुन्ह्याची व्याप्ती लक्षात घेऊन सोलापूर ग्रामीण पोलिसांनी याप्रकरणी एसआयटी स्थापन केली असून पुढील तपास सुरू केला आहे. त्यासाठी आठ पथके तयार करण्यात आली असून त्यांच्याकडून विशालचा शोध घेण्यात येत आहे.

वाचा: खासगी रुग्णालयांना तंबी; संशयित करोना रुग्णांवर परस्पर उपचार कराल तर…

दरम्यान, विशालने बार्शीसह देशभरातील गुंतवणूकदारांना गंडा घातल्याची माहिती समोर येत आहे. त्यात उच्च शिक्षित नोकरदार, डॉक्टर, व्यापारी, पोलीस अधिकारी, पत्रकार आणि हिंदी चॅनेलच्या न्यूज अँकर्सचाही समावेश आहे. मात्र, अधिकृतपणे कुणीही तक्रार द्यायला तयार नाही किंवा बोलायला तयार नाहीत. त्यामुळे अल्गोरिदमच्या नावाखाली फैलावलेल्या या आर्थिक जाळ्यात कोण, कोण अडकले आहे याचा शोध पोलिसांकडून सुरू आहे. विशाल फटेच्या अटकेनंतरच सर्व पत्ते उघड होणार आहेत.

वाचा: किरण माने प्रकरणावर गृह राज्यमंत्र्यांची परखड भूमिका; म्हणाले…