शासकिय धान्य गोदामातील कामगारांचा कडकडीत बंद , आश्‍वासनानंतर आंदोलनास स्थगिती

जिल्हाध्यक्ष शिवाजी शिंदे; पुरवठा अधिकारी वर्षा लांडगे व माथाडी बोर्डाचे सचिव अशोक कांबळे यांच्या आश्‍वासनानंतर आंदोलनास स्थगिती

पंढरपूर/प्रतिनिधी,27/10/2021 -सोलापूर जिल्हा शासकीय धान्य गोदामातील कामगारांचे थकित पगारीबाबत आज सोलापूर जिल्ह्यातील शासकीय धान्य गोदाम बंद ठेवून आंदोलन करण्यात आले. जिल्हा पुरवठा अधिकारी वर्षा लांडगे व माथाडी बोर्डाचे सचिव अशोक कांबळे यांनी जिल्हाध्यक्ष शिवाजी शिंदे यांना थकित बिलाविषयी आश्‍वासन दिल्यानंतर तात्पुरते हे आंदोलन स्थगित करण्यात आले असल्याचे जिल्हाध्यक्ष शिवाजी शिंदे यांनी सांगितले.

एप्रिल 2020 पासून कोरोना कालावधीमध्ये अतिआवश्यक सेवा म्हणून शासकिय धान्य गोदामा तील कामगारांनी पंतप्रधान मोफत धान्य व रेग्युलर धान्य वाटप असे वाटप शासकीय धान्य गोदामातून अहोरात्र केले परंतु गेल्या अनेक महिन्यांपासून या कामगारांचे पगार थकित होते. त्या संदर्भात 21 ऑगस्ट 2021 रोजी जिल्हा पुरवठा अधिकारी सोलापूर यांच्या दालनात बैठक होवून संबंधीत ठेकेदार व जिल्हा पुरवठा ऑफिसने वेळेत बिले आदा करण्याचे आश्‍वासन दिले. परंतु त्याच्यावर अद्यापर्यंत कोणताही तोडगा न निघाल्याने कामगारांवर उपासमारीची वेळ आली. त्यामुळे सोलापूर जिल्हा हमाल मापाडी माथाडी श्रमजिवी कामगार समन्वय समितीच्या वतीने दि.20 ऑक्टोंबर रोजी जिल्हाधिकारी, जिल्हा पुरवठा अधिकारी तसेच सहाय्यक कामगार आयुक्त, पोलिस आयुक्त सोलापूर,पोलिस अधिक्षक ग्रामिण यांना शासकिय धान्य गोदामातील थकीत पगार बिले 27 ऑक्टोंबरपर्यंत आदा न केल्यास सोलापूर जिल्हा शासकिय धान्य गोदामातील कामगार काम बंद करतील असे निवेदन जिल्हा अध्यक्ष शिवाजी शिंदे यांनी दिले.परंतु त्याकडे दुर्लक्ष केले गेले . म्हणून दि. 27 ऑक्टोंबर रोजी सोलापूर जिल्ह्यातील नातेपुते, माळशिरस, अकलुज, अक्कलकोट, टेंभुर्णी, माढा, बार्शी, वैराग, मोहोळ आदी ठिकाणी कामबंद आंदोलन करण्यात आले.

जिल्हाध्यक्ष शिवाजी शिंदे यांनी जिल्हा पुरवठा अधिकारी लांडगे मॅडम यांच्याशी फोनद्वारे चर्चा करून थकित बिलांविषयी चर्चा केली त्यानंतर सप्टेंबर अखेरपर्यंतची बिले दिवाळी सणा अगोदर आदा करण्याचे आश्‍वासन जिल्हा पुरवठा अधिकारी लांडगे यांनी दिल्यानंतर स्वत: आपण लक्ष घालून कामगारांची बिले आदा लवकरात लवकर करू असे आश्‍वासन जिल्हा धान्य पुरवठा अधिकारी व जिल्हा माथाडी बोर्डाचे सचिव अशोक कांबळे यांनी दिल्यानंतर तूर्तास हे आंदोलन स्थगित करण्यात आल्याचे जिल्हाध्यक्ष शिवाजी शिंदे यांनी सांगितले.

Leave a Reply

Your email address will not be published. Required fields are marked *

%d bloggers like this: