त्यांचा जागीच मृत्यू झाला पण ज्यानं अपघात घडवला त्या वेदांत अग्रवालला अवघ्या काही तासात जामीन

पोलिस ठाण्यातील सीसीटीव्ही तपासून ते खरे असेल तर तत्काळ संबंधितांवर निलंबनाची कारवाई करा- देवेंद्र फडणवीस

पुणे/ज्ञानप्रवाह न्यूज,ता.20/05/2024 – प्रसिद्ध व्यावसायिकाच्या मुलानं दोन आयटी अभियंत्यांना आपल्या गाडीखाली चिरडलं त्यांचा जागीच मृत्यू झाला पण ज्यानं अपघात घडवला त्या वेदांत अग्रवालला अवघ्या काही तासात जामीन मिळाला.आरोपीला पोलिस ठाण्यात विशिष्ठ पद्धतीने वागणुक मिळाल्याचा आरोपी मृतांच्या मित्रांनी केला आहे. आरोपी वेदांत अग्रवाल हा अल्पवयीन असल्याचं पोलिसांचं म्हणणं आहे. पुण्यात रात्री-अपरात्री, उशिरापर्यंत सुरु असलेले बार आणि धनाढ्य बापाच्या मुलाचा बेदरकारपणा आज दोन आयटी अभियंत्यांच्या जिवावर बेतला. या घटनेनंतर प्रचंड संताप व्यक्त होत आहे. आता या प्रकरणाची कठोर चौकशी करण्यचे आदेश उपमुख्यमंत्री देवेंद्र फडणवीस यांनी दिले आहेत.

या अपघातानंतर स्थानिक नागरिकांनी विशाल अग्रवाल यांच्या मुलाला पोर्शे गाडीतून बाहेर काढून मारहाण केली होती. त्यानंतर त्याला पोलिसांच्या हवाली करण्यात आले. मात्र, त्यानंतर हा धनिकपुत्र अवघ्या 15 तासांमध्ये जामिनावर बाहेर आला. याबद्दल समाजमाध्यम आणि नागरिकांकडून प्रचंड चीड व्यक्त केली जात आहे. उपमुख्यमंत्री देवेंद्र फडणवीस यांचे आदेश दिले आहेत. देवेंद्र फडणवीस यांनी पुणे पोलिस आयुक्तांना फोन करुन आदेश दिले. या प्रकरणातील आरोपीला जामीन मिळाला असला तरी त्याविरुद्ध अपील दाखल करण्याच्या सूचना दिल्या आहेत.

विशेष वागणूक दिली असेल तर सीसीटीव्ही तपासा, फडणवीसांचे आदेश

पोलिसांकडून विशाल अग्रवाल यांच्या मुलाला विशेष वागणूक देण्यात आल्याचा आरोप करत आहे. या प्रकरणात आरोपीला कोणती विशेष वागणूक दिली असल्यास, त्यावेळचे पोलिस ठाण्यातील सीसीटीव्ही तपासून ते खरे असेल तर तत्काळ संबंधितांवर निलंबनाची कारवाई करा, अशाही सूचना देवेंद्र फडणवीस यांना दिला आहे.

पुण्यातील कल्याणीनगरमध्ये घडलेल्या अपघाताला संबंधित कारचालक मुलाच्या वडीलांना कारणीभूत ठरवलंय. या प्रकरणी कारचालक मुलाचे वडील विशाल अग्रवाल आणि त्याला दारु देणाऱ्या दोन पब चालकांवर गुन्हा दाखल करण्यात आलाय. मुलगा अल्पवयीन असूनही त्याला कार चालवायला दिल्याबद्दल विशाल अग्रवाल यांच्यावर कारवाई करण्यात आलीये. तर मुलाला दारु देणारे हॉटेल काझीचे मालक प्रल्हाद भुतडा आणि मॅनेजर सचिन काटकर त्याचबरोबर हॉटेल ब्लॅकचे संदीप सांगळे आणि बार काऊंटर जयेश बोनकरवर गुन्हा दाखल करण्यात आलाय.

पुण्यातल्या ब्रह्मा कॉर्प या नामांकित बिल्डरचा मुलगा आहे. पुण्यातल्या रस्त्यावर तो मध्यरात्री भरधाव वेगात गाडी चालवत होता. कल्याणीनगर भागात याच भरधाव गाडीनं एका दुचाकीला धडक दिली.ही धडक एवढी जोरदार होती, की या धडकेत दोघांचा जागीच मृत्यू झाला. अनिस अवधिया आणि अश्विनी कोस्टा असे नाव आहे. हे दोघे आपल्या मित्रांसोबत पार्टी करुन घरी चालले होते. पण वेदांत अग्रवालच्या भरधाव वेगानं त्यांना अक्षरश: चिरडलं. धक्कादायक म्हणजे ज्यावेळी अपघात झाला त्यावेळी आरोपीच्या कारला ना पुढे नंबर प्लेट होती ना मागे होती.

या अपघातानंतर गुन्हा दाखल करण्यात आल्यानंतर विशाल अग्रवाल हे फरारी झाले होते.त्यांना पोलीस पथकाने छत्रपती संभाजी नगर येथून अटक केली आहे.

या अपघातानंतर विशाल अग्रवाल यांच्या विरोधात वातावरण तापले असून भाजप , कॉंग्रेससह विविध पक्ष आणि सामाजिक संघटना या पब संस्कृती विरोधात तसेच आरोपी विरोधात कडक कारवाई करावी अशी मागणी करत आहेत.