गुणवंत विद्यार्थी संधी मिळाल्यास विविध क्षेत्रात यश संपादित करू शकतो : आमदार समाधान आवताडे

पालकांनी विद्यार्थ्यांना त्यांच्या कौशल्य प्रमाणे विकसित होऊ द्यावे : इंद्रजीत देशमुख

गुणवंत विद्यार्थी संधी मिळाल्यास विविध क्षेत्रात यश संपादित करू शकतो : आमदार समाधान आवताडे

कै.महादेवराव बाबुराव आवताडे प्रतिष्ठान मंगळवेढा यांच्या वतीने गुणवंत विद्यार्थ्यांचा गुणगौरव सोहळा आणि मार्गदर्शन शिबिर संपन्न

पंढरपूर /ज्ञानप्रवाह न्यूज – पंढरपूर मंगळवेढा मतदारसंघाचे आमदार समाधान आवताडे यांच्या संकल्पनेतून कै. महादेवराव आवताडे प्रतिष्ठान मंगळवेढा यांच्यावतीने पंढरपूर मंगळवेढा मतदार संघातील इयत्ता दहावी आणि बारावी मध्ये यश संपादित केलेल्या विद्यार्थ्यांचा गुणगौरव सोहळा आणि मार्गदर्शन शिबिराचे आयोजन गुरुवारी पंढरपूर येथील श्रेयश पॅलेस येथे करण्यात आले होते.

यावेळी विद्यार्थ्यांना मार्गदर्शन करताना प्रसिद्ध व्याख्याते व माजी सनदी अधिकारी इंद्रजीत देशमुख आपल्या अध्यक्षीय भाषणात म्हणाले की ,सध्याच्या सोशल मीडियाच्या जमान्यात विद्यार्थ्यांनी आपला कल ओळखून आपले करिअर घडवावे. पालकांनी विद्यार्थ्यांना त्यांच्या कौशल्याप्रमाणे विकसित होऊ द्यावे.

आमदार समाधान आवताडे विद्यार्थ्यांना मार्गदर्शन करताना म्हणाले की आपल्या ग्रामीण भागात देखील अनेक विद्यार्थी गुणवान आहेत. त्यांना योग्य संधी मिळाल्यास ते विविध क्षेत्रात मोठे यश संपादन करू शकतात त्यामुळे त्यांच्या पाठीवर कौतुकाची थाप टाकणे आपली कर्तव्य आहे यासाठी हा कार्यक्रम आयोजित केला आहे.

पंढरपूर येथे आयोजित केलेल्या या कार्यक्रमाच्या अध्यक्षस्थानी व्याख्याते व माजी सनदी अधिकारी इंद्रजीत देशमुख हे होते. बक्षीस वितरण आमदार समाधान आवताडे यांच्या हस्ते संपन्न झाले. या कार्यक्रमात दहावी आणि बारावी मध्ये यश मिळवलेल्या विद्यार्थ्यांचा स्कूल बॅग व सन्मानचिन्ह देऊन मान्यवरांच्या हस्ते सत्कार करण्यात आला.

यावेळी मंचावर पंढरपूर विभागाचे उपविभागीय अधिकारी सचिन इथापे, पंढरपूरचे तहसीलदार सचिन लंगुटे, पंढरपूर शहर पोलीस ठाण्याचे वरिष्ठ पोलीस निरीक्षक विश्वजीत घोडके, गटविकास अधिकारी सुशील संसारे, गटशिक्षणाधिकारी मारुती लिगाडे आदी मान्यवर उपस्थित होते.