आषाढी यात्रा सोहळ्यानंतर जिल्हाधिकारी यांनी केली शहरातील विविध ठिकाणची पाहणी
साठलेल्या कचऱ्यामुळे नागरिकांना आरोग्याची समस्या उद्भवू नये यासाठी नगरपरिषद प्रशासनाची 24 तासांची स्वच्छता मोहीम
पंढरपूर,दि.०८/०७/२०२५ :- आषाढी यात्रेचा प्रमुख सोहळा रविवारी पार पडल्यानंतर आता वारकरी परतू लागले आहेत. आषाढी यात्रेच्या सोहळ्यासाठी महाराष्ट्राच्या कानाकोपऱ्या तून लाखोंच्या संख्येने भाविक पंढरपुरात दाखल झाले होते. त्यामुळे शहरात व परिसरात मोठ्या प्रमाणात कचरा साठला आहे. साठलेल्या कचऱ्यामुळे नागरिकांना आरोग्याची समस्या उद्भवू नये, यासाठी नगरपरिषद प्रशासनाने 24 तासांची स्वच्छता मोहीम सुरु केली असून, शहरात ठिकठिकाणी साठलेला कचरा शिल्लक राहू नये याची दक्षता घेण्याच्या सूचना जिल्हाधिकारी कुमार आशीर्वाद यांनी दिल्या आहेत.
जिल्हाधिकारी कुमार आशिर्वाद यांनी आज शहरातील विविध ठिकाणची पाहणी केली. यावेळी त्यांच्यासमवेत, प्रांताधिकारी सचिन इथापे, तहसीलदार सचिन लंगुटे, मुख्याधिकारी महेश रोकडे, आरोग्य निरिक्षक शरद वाघमारे, नागनाथ तोडकर, नाना गोरे आदी उपस्थित होते.
आषाढी यात्रा कालावधीत वारकरी भाविक वाखरी,रेल्वे स्टेशन, टाकळी, कासेगाव रोड, ६५ एकर परिसरासह शहरातील अन्य मोकळे मैदान, मठ, नागरिकांच्या घरात मुक्कामी होते़ यामुळे कचराकुंड्यांत शिळे अन्न, पत्रावळ्या मोठ्या प्रमाणात होत्या.यात्रा कालावधीत अनेक छोटे-छोटे व्यापारी व्यवसाय करत होते.
त्यामुळे अनेक ठिकाणी प्लास्टिकच्या पिशव्या पडल्या होत्या.यामुळे दररोज शहरातून मोठ्या प्रमाणात कचरा उचलला जात आहे. वाळवंटात विशेष स्वच्छता राहावी म्हणून पंढरपूर नगरपरिषद व जिल्ह्यातील इतर नगरपरिषदेच्या कर्मचाऱ्यांमार्फत शहरात दररोज स्वच्छता करण्यात येत असल्याचे मुख्याधिकारी महेश रोकडे यांनी यावेळी सांगितले.
जिल्हाधिकारी कुमार आशिर्वाद यांनी मुख्याधिकारी महेश रोकडे यांच्यासमवेत पंढरपूर शहर आणि परिसर स्वच्छता कामाची पाहणी करताना जिल्हाधिकारी कुमार आशिर्वाद यांनी स्वच्छता कर्मचार्यांची आस्थेने चौकशी करत त्यांना काही अडचणी आहेत याबाबत विचारपूस केली त्यामुळे या स्वच्छता कर्मचार्यांचा उत्साह वाढला असून जिल्हाधिकारी कुमार आशिर्वाद यांनी प्रत्यक्ष त्यांच्या कामाची दखल घेतल्या मुळे आनंद वाटत असल्याची प्रतिक्रिया देताना सांगितले की अशी घटना प्रथमच होत आहे.
