पंढरपूरचा अभिमान! पॅरा कमांडो समाधान थोरात यांची गोवा हाफ आयर्नमॅन स्पर्धेत दमदार कामगिरी
वर्ल्ड चॅम्पियनशिपसाठी पात्रता
पंढरपूर/ज्ञानप्रवाह न्यूज : पंढरपूर सायकलर्स क्लबचे सदस्य आणि देशसेवेत पॅरा कमांडो म्हणून कार्यरत असलेले समाधान थोरात यांनी गोवा हाफ आयर्नमॅन 70.3 या आंतरराष्ट्रीय दर्जाच्या स्पर्धेत उल्लेखनीय यश मिळवत पंढरपूर तालुक्याचा गौरव वाढवला आहे. पहिल्याच पदार्पणात त्यांनी ही कठीण त्रिस्पर्धा केवळ 5 तास 28 मिनिटांत पूर्ण करत आपली प्रभावी कामगिरी नोंदवली.
या स्पर्धेत 1.9 कि.मी.पोहणे,90 कि.मी. सायकलिंग आणि 21.2 कि.मी. धावणे असा एकूण 8 तास 30 मिनिटांचा आव्हानात्मक टप्पा पूर्ण करायचा असतो. त्यातही 5 तास 30 मिनिटांच्या आत स्पर्धा पूर्ण करणाऱ्या स्पर्धकांना वर्ल्ड हाफ आयर्नमॅन चॅम्पियनशिपसाठी पात्रता मिळते. समाधान थोरात यांनी पहिल्याच प्रयत्नात ही पात्रता मिळवत आपली जिद्द, शिस्त आणि कठोर परिश्रम सिद्ध केले.
यापूर्वीही त्यांनी सायकलिंगमधील कठीण मानल्या जाणाऱ्या डेक्कन क्लिफहॅंगर -पुणे टू गोवा (649 किमी) ही स्पर्धा केवळ 35 तासांत पूर्ण करत उल्लेखनीय कामगिरी केली होती. दोन भिन्न आणि अत्यंत आव्हानात्मक स्पर्धांमध्ये मिळवलेल्या या दुहेरी यशामुळे समाधान थोरात यांचे सर्वत्र कौतुक होत आहे.
त्यांच्या या प्रचंड यशाबद्दल पंढरपूर सायकलर्स क्लबच्यावतीने त्यांचा विशेष सन्मान करण्यात आला. या कार्यक्रमाला क्लबचे सर्व सदस्य उपस्थित होते.
